Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺DAer om heeft die Heere onse Godt zijn woert vast ghemaect dat hy ghesproken heeft tot ons, ende tot onse rechteren die Israel gheordeelt hebben, ende tot onse coninghen ende tot onse princen, ende tot gheheel Israel ende Iuda,

+ A

2

om dat die Heere op ons soude brenghen groote quaden, die niet ghesciedt en zijn onder den hemel, ghelijck sij ghesciedt sijn in Ierusalem. Nae dat die ghescreuen sijn in Moyses wet,

3

dat een mensch sijns soons vleesch eten soude, ende sijns dochters vleesch.

4

Ende hy heeftse ghegheuen onder die hant van alle den coninghen die rontsomme ons zijn, tot een verwijt, ende tot een verwoestheyt, ⁺ende onder alle die volcken in die welcke ons die Heere verstroyt heeft.

+ B

5

Ende wy sijn gheworden tonder ende niet te bouen, want wy hebben ghesondicht den Heere onsen Godt, niet onderdanich sijnde sijnder stemmen

6

Den Heere onsen Godt sij rechtuerdicheyt, maer ons ende onsen vaderen bescaemtheyt des aensichts, ghelijck desen dach is.

7

Want die Heere heeft ouer ons ghesproken alle dese quade dinghen die op ons ghecomen sijn,

8

ende wy hebben des Heeren ons Godts aensicht niet ghebeden, dat wy wederkeeren souden een ieghelijck van ons, van onse alderquaetste weghen,

9

ende die Heere heeft gewaect in die quaden, ende hy heeft die op ons ghebracht. Want die Heere is rechtuerdich in alle sijn wercken, die hy ons gheboden heeft

[p. *634]

10

ende wy en hebben zijn stemme niet ghehoort, dat wy gaen souden in des Heeren gheboden die hy ghegheuen heeft voer ons aensicht.

11

Ende nu Heere Godt van Israel die v volck wtgheleydt hebt, wten lande van Egypten in een machtighe hant, ende doer teekenen ende wonder wercken, ende doer v groote cracht, ende in eenen verhauen arm, ende ghy hebt v eenen naem ghemaect ghelijck desen dach is,

12

wy hebben ghesondicht, wy hebben ongoddelijck ghedaen, wy hebben onrechtelijck gheleeft, Heere onse Godt, in alle uwe rechtuerdicheden.

13

Laet v gramscap van ons ghekeert worden, want wy sijn luttel ghelaten onder die heydenen, daer ghy ons verstroyt hebt.

14

⁺Verhoort Heere onse aenroepen, ende onse ghebeden, ende leyt ons wt om v seluen, ende gheeft ons gratie te vinden voer hen aensicht die ons wech gheleyt hebben.

+ C

15

Op dat alle deerde wete dat ghy die Heere onse Godt sijt, ende dat uwen naem aengheroepen is op Israel, ende op zijn gheslachte.

16

Aensiet Heere van uwen heylighen huyse op ons, ende buycht v oore ende verhoort ons.

17

Opent v ooghen ende siet, dat die dooden die in der hellen sijn, der welcker gheest ghenomen is van haren binnenste niet en sullen den Heere eere ende rechtuerdichmakinge gheuen,

18

maer die ziele die droeuich is ouer die grootheyt des quaets, ende gaet crom ende cranck ende wiens ooghen gebrekende sijn, ende die hongherighe ziele gheeft den Heere glorie ende rechtuerdichmakinghe.

19

⁺Want niet nae onser vaderen rechtuerdicheden en storten wy ghebeden, noch en begheren wy die bermherticheyt niet voer v aensicht Heere onse Godt.

+ D

20

Maer om dat ghy v gramscap ende uwen rasenden torn op ons ghesonden hebt ghelijck ghy ghesproken hebt in uwer knechten der Propheten hant, seggende,

21

Aldus seyt die Heere, Neycht v scouder ende uwen neck nederwaerts, ende maect die wercken des conincs van Babilonien, ende ghy sult int lant sitten dwelck ick uwen vaderen ghegheuen hebbe.

22

Maer ist dat ghy die stemme des Heeren ws Godts niet en hoort, om te wercken voer den coninck van Babilonien, soo sal ic v affvallinghe maken van die steden van Iuda, ende van buyten Ierusalem,

23

ende ick sal van v nemen die stemme der blijscap, ende die stemme der vrolijcheyt, ende die stemme der bruyt ende die stemme des brudegoms, ⁺ende alle dlant sal wesen sonder voetstappe vanden ghenen diet bewoonen.

+ E

24

Ende sij en hebben v stemme niet ghehoort dat sij voer den coninck van Babilonien souden wercken, ende ghy hebt v woerden vast ghemaect die ghy ghesproken hebt, in die handen van uwen knechten den propheten, dat die ghebeenten onser coninghen, ende die ghebeenten onser vaderen souden ghevoert worden van hen plaetse,

25

ende siet sij sijn gheworpen in die hitte der sonnen, ende in den vorst des nachts, ende sij sijn ghestoruen in seer quade pijnen, in hongher ende doert sweert, ende doer die wtseyndinghe.

26

Ende ghy hebt den tempel ghestelt, inden welcken uwen naem aengheroepen is, ghelijck desen dach, om die ongherechticheyt des huys van Israel, ende des huys van Iuda.

27

Ende ghy hebt in ons ghedaen Heere onse Godt, ⁺nae allen uwe goetheyt, ende nae alle die uwe groote ontfermherticheyt

+ F

28

ghelijck ghi ghesproken hebt in die hant ws knechts Moysi inden dach als ghy hem gheboden hebt die wet te scrijuen voer die kinderen van Israel,

29

segghende. Ist dat ghi mijn stemme niet en hoort, soo sal dese groote menichte verkeert worden in die aldercleynste onder die heydenen, waer henen dat icse verstroeyen sal.

30

Want ic weet dat het volck my niet hooren en sal, want het is een hartneckich volck, ende het sal tot sijn herte bekeert worden int lant van sijnder gheuanghenissen,

31

ende sij sullen weten dat ic die Heere hen Godt ben, ende ic sal hen een herte gheuen ende sij sullen verstaen, ⁺ende sij sullen hooren,

+ G

32

ende sij sullen my louen in dlant van mijnder gheuanghenissen, ende sij sullen mijns naems ghedachtich wesen.

33

Ende sij sullen hen seluen affkeeren van haren harden rugghe, ende van hen quaetwillicheden, want sy sullen haerder vaderen wech ghedencken, die in my ghesondicht hebben.

34

Ende ic salse wederom roepen in dlant dat ic ghesworen hebbe haren vaderen Abraham Isaac ende Iacob, ende sij sullen daer heerscappie ouer hebben, ende ic salse vermenichfuldighen, ende sij en sullen niet vermindert worden,

35

ende ic sal hen stellen een ander eewich testament, dat ic hen sij tot eenen God, ende sij sullen my wesen tot een volc, ende ick en sal mijn volck die kinderen van Israel niet meer verroeren van dlant dat ick hen ghegheuen hebbe.