Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺ENde dit zijn die woerden des boecs die ghescreuen heeft Baruch die sone Nerie des soons Maasie des soons Sedecie, des soons Sedei, des soons Helcie, in Babilonien,

+ A

2

int vijfste iaer, in den seuensten dach der maent, inden tijt als die Chaldeen Ierusalem in namen, ende metten vier verbranden.

3

Ende Baruch heeft die woerden van desen boeck ghelesen aen die ooren van Iechonias Ioacims sone, den coninck van Iuda, ende tot die ooren van alle tvolck dat tot den boeck quam,

4

ende tot die ooren der machtigher kinderen, der coninghen, ende tot die ooren der priesteren, ende tot die ooren des volcs van den minsten totten meesten van hen allegader die in Babilonien woonden, aen den vloet Sodi.

5

Die welcke hoorende weenden, ende vasten, ende baden voer daensicht des Heeren.

6

Ende sij hebben ghelt vergadert, nae dat elcs handt vermocht,

7

ende sij hebben dat in Ierusalem ghesonden tot Ioacim den sone Helcie des soons Salom den priester, ⁺ende tot die priesters ende tot alle tvolck dat met hen gheuonden was in Ierusalem,

+ B

8

als hy die vaten van des Heeren tempel ontfinck, die wechghedraghen waren vanden tempel, om die wederom te brenghen int lant van Iuda, opden thiensten dach der maent Siban, die siluere vaten die ghemaect hadde Sedecias Iosias sone, die coninck van Iuda.

9

Nae dat Nabugodonosor die coninck van Babilonien Iechoniam, ende die princen gheuanghen hadde, ende die gheueterde, ende die machtighe, ende het volck des lants van Ierusalem ende hy heeftse gheleyt in Babilonien.

10

Ende sij hebben gheseyt, Siet wy hebben tot v lieden ghelt ghesonden, waer mede coopt heel brantofferen, ende wieroock, ende maect manna, ende offert voer die sonde aen den outaer des Heeren ons Godts.

11

Ende bidt voer dleuen van Nabugodonosor, den coninck van Babilonien ende voer Balthasar sijns soons leuen dat hen daghen moghen wesen als die daghen des hemels op die eerde,

12

ende dat die Heere ons cracht gheue, ende onse ooghen verlichte, dat wy leuen moghen onder die scaduwe van Nabugodonosor den coninck van Babilonien, ende onder Balthasar sijns soens scaduwe, ⁺ende dat wy hen dienen moghen veel daghen, ende dat wy gratie moghen vinden in hen aensicht.

+ C

13

Bidt oock voer ons seluen tot den Heere onsen Godt, want wy hebben den Heere onsen Godt ghesondicht, ende sijn rasende gramscap en is van ons niet affghekeert, tot op desen dach toe.

14

Ende leest desen boeck, den welcken wy tot v ghesonden hebben om ghelesen te worden, in des Heeren tempel opden hooghen feestdach, ende opden bequamen dach,

15

ende ghy sult segghen. Den Heere onsen Gode sij rechtuerdicheyt, maer ons sij bescaemtheyt ons aensichts, ghelijck desen dach is, allen den volcke van Iuda, ende den ghenen die in Ierusalem woonen,

16

onsen coninghen, ende onsen princen, ende onsen priesteren, ende onsen propheten, ende onse vaderen.

17

Wy hebben ghesondicht voer den Heere onsen Godt,

18

ende wy en hebben niet ghelooft, mishopende in hem, ⁺ende wy en hebben hem niet onderdanich gheeweest, ende wy en hebben die stemme des Heeren ons Godts niet ghehoort dat wy wandelen souden in sijn gheboden, die hy ons ghegheven heeft.

+ D

19

Vanden dach dat hy onse vaderen wt gheleydt heeft wten lande van Egypten, tot op desen dach waren wy ongheloouich tot den Heere onsen Godt, ende verstroyt wesende sijn wy wech ghegaen, dat wy sijn stemme niet hooren en souden.

20

Ende veel quade dinghen ende vermalendijdinghen zijn ons aenghecleeft, die die Heere ghestelt hadde Moysi sijnen diernaer, die onse vaderen gheleydt heeft wten lande van Egypten, om ons te gheuen een landt vloeyende van melck ende honich, alst op den dach van heden is.

21

Ende wy en hebben die stemme des Heeren ons Godts niet ghehoort, nae alle der propheten woerden die hy tot ons ghesonden heeft,

22

ende tot onse richters, ende wy sijn wech ghegaen een ieghelijck in den sin van ons quaet boose herte den vreemden goden te dienen, quade dinghen doende voer die ooghen des Heeren ons Godts.