Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺Aleph IIk ben een man siende mijn armoede in die roede sijnder verbolghenheyt.

+ A

2

Aleph. Hy heeft my ghedreuen ende ghebracht in duysternisse ende niet int licht.

3

Aleph. Hy heeft teghen my alleenlijck ghekeert, ende sijn hant omghekeert alle den dach.

4

Beth. Hy heeft mijn huyt ende mijn vleesch oudtghemaect, mijn ghebeenten heeft hy heel ghebroken.

5

Beth. Hy heeft in mijnen omganck ghetimmert, ende hy heeft my omuanghen met galle ende arbeyt.

6

Beth. Hy heeft my in duyster plaetsen ghestelt, als die eewighe dooden.

7

Guimel. Hy heeft teghen my rontsomme ghetimmert, dat ick niet wtgaen en soude, ⁺hi heeft mijn vetere beswaert.

+ B

8

Guimel. Maer als ick gheroepen hebbe ende ghebeden, soe heeft hy mijn ghebedt wtghesloten.

9

Guimel. Hy heeft mijn weghen besloten met viercantighe steenen, hi heeft mijn weghen omgheworpen.

10

Daleth. Hy is my gheworden eenen beyr laghen legghende, eenen leuw in verborghen plaetsen.

11

Daleth. Hy heeft mijn weghen omghekeert, ende hy heeft my heel ghebroken, ende hy heeft my verlaten ghemaect.

12

Daleth. Hi heeft sijnen boge gespannen, ende my ghestelt als een teeken teghen den pijl, om daer naer tescieten.

13

He. Hy heeft in mijn nieren ghesonden die dochteren van sijnen pijlkoker.

14

He. Ick ben tot eenen spot gheworden alle mijnen volcke, haerlieder sanck alle den dach.

[p. *631]

15

He. Hy heeft my met bitterheden veruult, hy heeft my met alsen droncken ghemaect.

16

Vau. Ende hy heeft mijn tanden by ghetale ghebroken, Hy heeft my met asschen ghespijst.

17

Vau. Ende mijn ziele is verstooten gheweest, ic heb die goede dinghen vergheten.

18

Vau. Ende ick heb gheseyt mijn eynde is vergaen, ende mijn hope vanden Heere.

19

Zain. Weest ghedachtich mijnder armoeden, ende mijnder ouertredinghen, des alsens, ende der gallen.

20

Zain. Met een ghedenckenisse sal ick ghedencken, ende mijn ziele sal in my verdwijnen.

21

Zain. Dit herdenckende in mijn herte, daerom sal ick hopen.

22

Heth. Des Heeren bermherticheden sijnt dat wy niet heel verdaen en sijn, want sijn bermherticheden en hebben niet ghefaelgeert.

23

⁺Heth. Ick weet vroech inden dagheraert dat v ghelooue veel is.

+ C

24

Heth. Mijn deel is die Heere, heeft mijn ziele gheseyt, daer om sal ick hem verbeyden.

25

Theth. Die Heere is goet den ghenen die in hem hopen, der zielen die hem soect.

26

Theth. Het is goet met stillicheyt te verwachten Godtssalicheyt.

27

Theth. Het is den man goet als hy des Heeren iock ghedraghen heeft van sijn ioncheyt.

28

Iod. Hy sal alleen sitten ende swijghen, want hy heeft hem seluen bouen sij seluen ghehauen.

29

Iod. Hy sal int ghestubbe zijnen mont stellen, ofter by auontueren eenighe hope ware.

30

Iod. Hy sal den ghenen die hem slaet die wanghe bieden, hy sal met versmaetheden versaet worden.

31

Caph. Want die Heere en sal inder eewicheyt niet verstooten.

32

Caph. Want heeft hy verworpen, soo sal hy oock ontfermen, ⁺nae die menichfuldicheyt zijnder bermherticheden.

+ D

33

Caph. Want hy en heeft wt sijn herte niet vernedert ende verworpen die kinderen der menschen.

34

Lamed. Om dat hy onder zijn voeten soude in stucken terden alle die gheuanghenen der aerden.

35

Lamed. Om dat hy des mans ordeel soude affwijcken, voer daenscouwen van des alderhoochsten aensicht.

36

Lamed. Om dat hy den mensch verkeeren soude in zijn ordeel, die Heere en heues niet gheweten.

37

Mem. Wie is dese die gheseyt heeft datment doen soude, alst die Heere niet en beual?

38

Mem. En sullen wt des alderhoochsten mont noch goede, noch quade dinghen comen?

39

Mem. Wat heeft die leuende mensch ghemurmureert, die man voer sijn sonden?

40

Nun. Laet ons onse weghen ondersoecken, ende laet ons soecken, ende totten Heere wederkeeren.

41

Nun. Laet ons onse herten opheffen metten handen totten Heere nae die hemelen.

42

⁺Nun. Wy hebben booselijck ghedaen, ende tot gramscap verwect, daer om sijdi onuerbiddelijck.

+ E

43

Samech. Ghi hebt ons in de rasende gramscap ouerdect ende gheslaghen, ende hebt ghedoot, ende niet ghespaert.

44

Samech. Ghy hebt teghen v een wolcke ghestelt, om dat het ghebet niet doergaen en soude.

45

Samech. Ghi hebt my ghestelt tot een wtroeyinghe, ende verworpinghe int midden der volcken.

46

Phe. Alle die vianden hebben op ons haren mont open ghedaen.

47

Phe. Die prophetie is ons gheworden, een vreese ende eenen strick ende een vernielinghe.

48

Phe. Mijn ooghe heeft sceydinghen der wateren voertsghebracht, in die vernielinghe van die dochter mijns volcs.

49

Ain. Mijn ooghe is ghepijnicht, ende en heeft niet ghesweghen om datter gheen ruste en was.

50

Ain. Tot dat die Heere aensach, ⁺ende van die hemelen sach.

+ F

51

Ain. Mijn ooghe heeft mijn ziele berooft, in alle die dochteren van mijnder stadt.

52

Sadi. Metter iacht hebben mijn vianden my gheuanghen als eenen voghel sonder sake.

53

Sadi. Mijn leuen is inden put gheuallen, ende sij hebben eenen steen op my gheleydt.

54

Sadi. Die wateren hebben ouer mijn hooft ghevloeyt. Ick heb gheseyt, ick ben verdoruen.

55

Coph. Ick heb uwen naem aengheroepen Heere van den wtersten poel.

56

Coph. Ghy hebt mijn stemme ghehoort, en keert v aensicht niet aff van mijnen versuchten, ende van mijnen roepen.

57

Coph. Ghi hebt nae by ghecomen inden dach als ick v aengheroepen hebbe, ghy hebt gheseyt. En vreest niet.

58

⁺Res. Heere ghy hebt die sake van mijnder zielen gheordeelt, ghy verlosser van mijnder zielen.

+ G

59

Res. Heere ghy hebt hen ongherechticheden ghesien teghen my, ordeelt mijn ordeel.

60

Res. Ghy hebt alle die rasende gramscap ghesien, alle hen ghedachten teghen my.

61

Sin. Heere ghy hebt alle hen verwijt ghehoort alle hen ghedachten teghen my.

62

Sin. Die lippen der gheender die teghen my opstaen, ende hen ghedachten teghen my alle den dach.

63

Sin. Siet hen sittinghe ende hen weder opstaen, ick ben haren psalter sanck.

64

Thau. Heere ghy sult hen vergheldinghe gheuen, nae die wercken haerder handen.

65

Thau. Ghy sult hen gheuen den scilt des herten, uwen arbeyt.

66

Thau. Ghy sulse veruolghen in die rasende gramscap, ende ghy sultse vernielen van onder den hemel Heere.