Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺Aleph. HOe heeft die Heere met een donckerheyt in zijn rasende gramscap die docher van Sion ouerdect, hoe heeft hy vanden hemel ter eerden gheworpen die edele vrouwe van Israel, ende en heeft niet ghedachtich gheweest des banckens sijnder voeten, in den dach van zijnder rasender gramscap?

+ A

2

Beth. Die Heere heeft ter nedergheworpen, ende niet ghespaert alle die schoonheden van Iacob, hy heeft in sijnen rasenden torn verdoruen alle die vaste plaetsen der maghet van Iuda, ende hy heeftse ter eerden gheworpen, hy heeft haer rijck besmet, ende haer princen.

3

Guimel. Hy heeft in die gramscap van den rasenden torn ghebroken alle den horn van Israel, hy heeft zijn rechte handt achterwaerts affghekeert, van des viants aensicht, ende hy heeft in Iacob

[p. *630]

ontsteken als een vier der vlammen al rontsomme verslindende.

4

Daleth. Hy heeft sijnen boghe ghespannen als een viant, hi heeft sijn rechte hant vast ghemaect als een teghenpartijder, ende hi heeft ghedoot alle dat schoon om sien was in des dochters van Sion tabernakele, hi heeft als een vier sijn verbolghentheyt wtghestort.

5

He. Die Heere is gheworden als een viant, hy heeft Israel neder gheworpen, hy heeft alle haer vesten neder gheworpen, hy heeft haer vaste plaetsen verdoruen, ende hy heeft in die dochter van Iuda veruult den verootmoedichden man, ende die verootmoedichde vrouwe.

6

Vau. Ende hy heeft sijn tente als eenen hoff verstroyt hy heeft zijn tabernakel verdoruen, die Heere heeft in Sion den Sabboth ende den feestdach vergheten, ⁺ende tot verwijt, ende tot verbolghentheyt van zijnder rasender gramscap den coninck ende den priester.

+ B

7

Zain. Die Heere heeft sijnen outaer verstooten, hy heeft zijnder heylichmakinghen vermalendijt, hi heeft in des viants hant gheleuert die mueren van haren torren, sij hebben een stemme ghegheuen in des Heeren huys, als in den hooghen feestdach.

8

Heth. Die Heere heeft ghedacht te verderuen den muer der dochter van Sion, hy heeft sijn zeelken wtghespannen, ende hy en heeft zijn hant niet affghekeert van die verderffenisse, ende dat voer gheweer des muers heeft ghetruert, ende den muer is tsamen oock ghebroken.

9

Theth. Haer poorten sijn in die eerde ghesoncken hy heeft haer grendelen verdoruen ende vernielt, haren coninck ende haer princen onder die Heydenen, ⁺daer en is gheen wet, ende haer propheten en hebben gheen visioen vanden Heere gheuonden.

+ C

10

Iod. Sy hebben op deerde gheseten, die ouders der dochter van Sion hebben tsamen ghesweghen, sij hebben met asschen hen hoofden bespraeyt, sij sijn met hairen cleederen omgort, die maechden van Ierusalem hebben haer hoofden ter eerden neder gheslaghen.

11

Caph. Mijn ooghen faelgeerden doer die tranen, mijn binnenste sijn heel ontstelt, mijn leuere is wtghestort op die eerde ouer die vernielinghe van die dochter mijns volcs, als dat cleyn kint, ende het suyghelinck verghinck in die straten der stadt.

12

Lamed. Sy seyden tot hen moederen, waer is die tarwe ende den wijn? als sij verghinghen als ghewonde in die straten der stadt, ⁺als sij hen zielen wtgauen in haerder moeder schoodt.

+ D

13

Mem. By wien sal ick v ghelijcken? oft wien sal ick v ghelijck maken ghy dochter van Ierusalem? wien sal ick v verghelijcken ende troosten ghy maghet dochter van Sion? Want v vernielighe es groote ghelijck die zee, wie sal v ghenesen?

14

Nun. V Propheten hebben v valsche ende dwase dinghen ghesien, noch sij en ondecten uwe boosheyt niet dat sij v tot penitencie verwecken souden, maer sij hebben v ghesien valsche openinghen ende wtdrijuinghen.

15

Samech. Alle die voerby gaen ouer den wech hebben ouer v die handen tsamen gheslaghen, sij hebben ghespot ende hen hooft ghescudt ouer die dochter van Ierusalem, segghende is die stadt van volcomender schoonheit, die blijscap van gheheel eertrijck?

16

Phe. Alle v vianden hebben haren mont open ghedaen op v, ⁺sij hebben ghespot, ende met haren tanden ghecrijselt ende gheseyt. Wy sullense verslinden, siet dits den dach den welcken wy verwachten, ⁺wy hebben den gheuonden, wy hebben den ghesien.

+ E

+ F

17

Ain. Die Heere heeft ghedaen dat hy ghedacht heeft, hy heeft zijn woert volbracht dat hy beuolen hadde van die oude daghen hy heeft v verdoruen, ende hy en heeft v niet ghespaert, ende hy heeft uwen viant ouer v verblijdt, ende hy heeft den horn uwer vianden verheuen.

18

Sadi. Hen herte heeft totten Heere gheroepen op die mueren der dochter van Sion. Brengt tranen voerts als een beke des daechs ende des nachts, en gheeft v seluen gheen ruste, noch en laet dien appel uwer ooghen niet swijghen.

19

Coph. Staet op, loeft inder nacht int beghinsel der waken, stort v herte wt ghelijck water voer des Heeren aenschijn, heft v handen op tot hem voer die ziele uwer cleynder kinderen die inden hongher ghestoruen sijn, ⁺in thooft van allen sceyweghen.

+ G

20

Res. Siet Heere, ende aenmerct wien ghy alsoo affghesneden hebt, sullen dan die vrouwen hen vrucht eten die cleyne kinderen van der maten eender palme? Wort die priester ende propheet dootgheslaghen in die heylighe plaetse des Heeren?

21

Sin. Het kint ende die oude man hebben op deerde buyten gheleghen, mijn maechden ende mijn ionghelinghen sijn gheuallen metten sweerde, ghi hebse ghedoodt op den dach van uwer rasender gramscap, ghi hebse gheslaghen, ende niet ontfermt.

22

Thau. Ghy hebtse gheroepen als tot eenen hooghelijcken feestdach die my veruaren souden van rontsomme, ende daer en heeft niemant gheweest inden dach van des Heeren gramscap diet ontvlieden mocht ende achterghelaten worde, die ick opghevoedt hebbe ende opghebracht, dese heeft mijn viant vernielt.