Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *629]

Dat ierste Capittel.

1

⁺Aleph. HOe sidt die stadt vol volcs alleen, hoe is die vrouwe der heydenen gheworden als een weduwe? die Princesse der lantscappen is gheworden onder tribuyt.

+ A

2

Beth. Weenende heeft sij gheweent des nachts, ende haer tranen sijn op haer wanghen, daer en is niemant diese trooste, wt allen haer beminde, alle haer vrienden hebben haer versmaedt, ende sij zijn haer vianden gheworden.

3

Guimel. Iudas is verhuyst om die quellinghe, ende menichte der slauernien, hy heeft ghewoont onder die Heydenen, ende hy en heeft gheen ruste gheuonden, ⁺alle zijn veruolghers hebben hem achterhaelt tusschen die benautheden.

+ B

4

Daleth. Die weghen van Sion trueren, om datter gheen en zijn die ter hooch feesten comen. Alle haer poorten zijn verdoruen, haer priesters zijn suchtende, haer maechden mismaect, ende sij is verdruct van bitterheyt.

5

He. Haer vianden zijn gheworden int thooft, haer vianden zijn rijck gheworden, want die Heere heeft op haer ghesproken om die menichte van haren sonden, haer cleyn kinderen sijn in die gheuanghenisse gheleyt, voer daensicht des veruolghers.

6

Vau. Ende van die dochter van Sion is allen haer schoonheyt wech ghegaen, haer princen sijn gheworden als rammen die gheen weyde en vinden, ende ⁺sij zijn wech ghegaen sonder stercheyt voer daensicht des nae volghers.

+ C

7

Zain. Ierusalem is ghedachtich gheweest der daghen haers lijdens, ende haer ouertredinghe, alle haerder lustigher dinghen die sij ghehadt hadde van die oude daghen, als tvolck viel in der vianden hant, ende datter gheen helper en was, die vianden hebben haer ghesien ende hebben haer Sabbothen bespot.

8

Heth. Ierusalem heeft een sonde ghesondicht, daer om is sij onghestadich gheworden, alle die haer gloficeerden hebben haer versmaedt, want sij hebben haer versmaetheyt ghesien, maer sij is suchtende gheweest ende achterwaerts omme ghekeert.

9

Theth. Haer vuylicheden sijn aen haer voeten, noch sij en heeft haers eyndes niet ghedachtich gheweest, ⁺sij is crachtelijck affgheset, gheenen trooster hebbende, Heere siet mijn lijden, want die viant is opghericht.

+ D

10

Iod. Die viant heeft zijn hant ghesonden tot allen haer lustighe dinghen. Want sij heeft ghesien dat die Heydenen ghegaen waren in haer heylichste plaetse, waer aff dat ghy gheboden hadt, dat sij in v vergaderinghe niet comen en souden.

11

Caph. Alle haer volck is suchtende, ende broot soeckende, sij hebben alderhande costelijcheden ghegheuen om spijse, om die ziele te vermaken, siet Heere ende aenmercket, dat ick snoode gheworden ben.

12

Lamed. O ghy allegader die voer by gaet ouer den wech, aenmerct, ende besiet, ofter eenighe pijne is ghelijck mijn pijne, want hy heeft my als den wijngaert affghesneden, soo die Heere ghesproken heeft, ⁺inden dach van zijn rasende gramscap.

+ E

13

Mem. Van die hoochde heeft hy vier in mijn ghebeente ghesonden, ende hy heeft my gheleert, ende hy heeft een nette mijnen voeten wtghespraeyt, hy heeft my achterwaerts omghekeert, hy heeft my verlaten ghemaect, den gheheelen dach met truericheyt becommert.

14

Nun. Het iock van mijn boosheden heeft ghewaect, sij zijn in sijn hant te gader ghewonden, ende gheleydt op mijnen hals, mijn cracht is cranck gheworden, die Heere heeft my gheleuert in die hant waer wt dat ick niet en sal connen opstaen.

15

Samech. Die Heere heeft alle mijn heerlijcke wech ghenomen wt dat midden van my, hy heeft den tijdt teghen my gheroepen dat hy mijn wtuercorene soude vernielen die Heere heeft die persse ghetreden der maghet des dochters van Iuda.

16

⁺Ain. Daerom ben ick weenende, ende mijn ooghe wateren voertsbrenghende, want die trooster, mijn ziele bekeerende is verre van my gheworden, mijn kinderen zijn verloren ghewerden, want die viant heeft die ouerhant ghecreghen.

+ F

17

Phe. Sion heeft haer handen wtghesteken, daer en is niemant die haer vertrooste die Heere heeft teghen Iacob beuolen, rontsom haer zijn haer vianden, Ierusalem is gheworden als besmet metter maensuchtigher vrouwen onreynicheyt onder hen lieden.

18

Sadi. Die Heere is rechtuerdich, want ick heb zijnen mont tot gramscap verwect. Hoort (doch) alle volcken, ende besiet mijn pijne, mijn maechden ende mijn ionghelinghen sijn in die gheuanghenisse wech ghegaen.

19

Coph. Ick heb mijn vrienden gheroepen, sij hebben my bedroghen, ⁺mijn priesters ende mijn ouders sijn in die stadt vernielt, want sij hebben spijse voer hen ghesocht, dat sij hen zielen vermaken souden.

+ G

20

Res. Heere siet dat ick ghequelt worde, mijnen buyck is heel ontstelt, mijn herte is omghekeert in mij seluen want ic ben vol bitterheyts, buyten verslaet het sweert, ende thuys is des ghelijck die doot.

21

Sin. Sy hebben ghehoort dat ick versuchte, ende daer en is niemant die my vertrooste, alle mijn vianden hebben mijn quaet ghehoort, sij sijn verblijt gheweest, om dat ghijt ghedaen hebt, ghy hebt den dach des troost aenghebracht, ende sij sullen mijns ghelijck worden.

22

Thau. Laet alle hen quaet incomen voer mijn, ende snydtse aff ghelijck ghy my affghesneden hebt, om alle mijn boosheden, want mijn suchtinghen sijn vele, ende mijn herte is truerende.