Den gheheelen Bybel, Inhoudende het oude ende nieuwe Testament (Leuvense bijbel 1548)

Het .iiij. Capittel.

1

⁺Aleph. HOe ist tgout verduystert, hoe is die beste verwe verandert, hoe sijn die steenen der alderheylichster plaetsen verstroeyt int hooft van allen straeten?

+ A

2

Beth. Die heerlijcke kinderen van Sion, ende ghecleedt metten besten goude, hoe sijn sij gheacht voer eerden vaten, het werck van een pot backers hant?

3

Guimel. Maer die Lamien hebben die borst ghebloodt, sij hebben hen ioncskens ghesoocht, die dochter mijns volcs is wreet als eenen struys in die woestijne.

4

Daleth. Die tonghe vanden sooghende kinde, heeft ghecleeft aen sijn ghehemelte inden dorst, die cleyn kinderen hebben broodt vergadert, ende daer en was niemant diet hen brack.

5

He. Die wellustichlijck aten sijn ghestoruen in die weghen, die in gheel zijden cleederen opghevoet worden hebben dreck omhelst.

6

Vau. Ende die boosheyt van mijns volcs dochter is meerder gheworden dan de sonde der Sodomiten, die omgheworpen is in eenen oghenblick, ende aen haer en heeftmen gheen handen gheleyt.

[p. *632]

7

Zain. Haer Nazareen zijn witter gheworden dan sneu blinckender dan oudt yuoor, schoonder dan Sapphiren.

8

Heth. Hen aensicht is swerter gheworden dan colen, ende sij en sijn niet bekent gheweest in die straten, hen huyt heeft aen hen ghebeente ghecleeft, sij es verdroocht ende gheworden als een hout.

9

Teth. Beter waert den verslaghenen metten sweerde, dan die ghedoot waren metten hongher, want dese zijn verdwijnt, verteert wesende van die onvruchtbaerheyt der eerden.

10

Iod. Die handen der bermhertigher vrouwen hebben hens selfs kinderen ghecooct, ⁺sij zijn haer spijse gheworden in die bederffenisse van die dochter mijns volcs.

+ B

11

Caph. Die Heere heeft sijn rasende gramscap volbrocht, hy heeft den torn van sijn verbolghentheyt wtghestort, ende hy heeft een vier ghestort in Sion, ende dat heeft haer fundamenten verslint.

12

Lamed. Die coninghen der eerden, ende alle die bewoonders der werelt en hebben niet ghelooft dat die teghen partijder ende viant incomen soude door die poorten van Ierusalem.

13

Mem. Om die sonden van haren propheten ende om die boosheden van haren priesters, die int midden van haer der rechtuerdigher bloet wtghestort hebben.

14

Nun. Sy hebben blent ghewandelt in die straten, sij zijn met bloede besmet, ende als sijt niet en mochten, ⁺soo hebben sij hen slippen ghehouden.

+ C

15

Samech. Gaet wech ghi besmette, hebben sij tot hen gheroepen. Gaet wech, gaet van hier, en wilt niet raken, want sij hebben voerwaer ghekeuen, ende sijn beroert gheweest, sij hebben onder die Heydenen gheseyt, Hy en sal voert aen daer niet toe doen om meer te woonen met hen.

16

Phe. Des Heeren aensicht heeftse ghedeylt, hy en salder niet toe doen dat hyse aensie, voer der priesteren aensichten en hebben sij hen niet ghescaemt, noch der ouderen en hebben sij niet ontfermt.

17

Ain. Als wy noch heel staende waren, soo hebben ons ooghen ons begheuen tot onse ydele helpe, als wy naerstelijck aenmercten totten volcke, dat niet behouden en mocht.

18

Sadi. Onse voetstappen hebben gheslippert inden wech van onse straten, ⁺ons eynde is nae by comen, onse daghen sijn voleynt, want ons eynde is ghecomen.

+ D

19

Coph. Onse veruolghers hebben rasscher gheweest dan die arents des hemels, op die berghen hebben sij ons veruolcht, in die woestijne hebben sij ons laghen gheleydt.

20

Res. Die gheest ons monts Christus die Heere is gheuanghen in onse sonden, den welcken wy gheseyt hebben. In uwe scaduwe sullen wy leuen onder die Heydenen.

21

Sin. Verblijt v ende weest vrolijck dochter van Edom die daer woont int lant van Hus, tot v sal den kelck oock comen ghy sult droncken ghemaect worden, ende ghebloodt worden.

22

Thau. V boosheyt is volbracht dochter van Sion, hy en sal voorts daer niet meer toe doen om v te veruoeren, hy heeft v boosheyt besocht dochter van Edom, hy heeft v sonden ontdect.