Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .li. Capittel.

1

⁺DIt seyt die Heere, Siet ick verwecke op Babilonien ende haer bewoonders diet herte opwaerts ghehauen hebben tseghen my, als eenen pestilencialen wint.

+ A

2

Ende ick sal in Babilonien wanners seynden, ende sij sullense wannen, ende sij sullen haer lant verderuen, want sij sijn op haer ghecomen van alle sijden inden dach van haer verdriet.

3

Hy en spanne niet, die sijnen boghe spant, ende die een pansier aen heeft die en climme niet opwaerts, en wilt haer ionghelingen niet sparen, slaet doot alle haer orloochs volck.

4

Ende die verslaghene sullen vallen in der Chaldeen lant, ende die ghewonde in haer lantscappen.

5

Want Israel ende Iuda en hebben niet verlaten gheweest van haren Godt den Heere der heyrscaren, maer hen lant is veruult gheweest met misdaet vanden heylighen van Israel.

6

Vliedt wt dat midden van Babilonien ende een ieghelijck die behoude zijn ziele, en wilt niet swijghen van haer boosheyt, want tis den tijt der wraken vanden Heere, Hy sal haer wedergheuen haer vergheldinghe.

7

Babilon is gheweest eenen guldenen kelck in des Heeren handt, droncken makende gheheel eertrijck, van haren wijn hebben die Heydenen ghedroncken, ende daer om zijn sij beroert gheweest.

8

Haestelijck es Babilon gheuallen, ende heel ghebroken, Huylt op haer, neemt termentijn tot haer smerte oft sij bij auontueren ghenesen worde.

9

Wy hebben Babilonien ghemeestert, ende sij en is niet ghenesen, laetse ons verlaten, ende laet ons gaen een ieghelijck in zijn lant, want haer ordeel is totten hemel ghecomen, ende het is verhauen tot die wolcken.

10

Die Heere heeft onse rechtuerdicheden voertghebracht, coemt ende laet ons in Sion vertellen des Heeren ons Godts werck,

11

⁺scerpt die pijlen, vult die pijlkokers, die Heere heeft den gheest der coninghen van Meden verwect, ende teghen Babilonien is zijn meyninghe, dat hy die verderuen soude. Want het is des Heeren wrake, die wrake zijns tempels.

+ B

12

Heft een teeken op die mueren van Babilonien, vermeerdert die hoede, stelt hoeders int hooghe, bereydt die laghen. Want die Heere heuet ghedacht ende ghedaen alle dat hy ghesproken hadde teghen die inwoonders van Babilonien.

13

Die daer woont op veel wateren rijck van scatten, v eynde is ghecomen dat v die voeten sullen affghesneden worden.

14

Die Heere der heyrscaren heeft ghesworen by zijn ziele. Want ick sal v veruullen met menschen als met cruyt wormen, ende den wijntreders sanck sal ouer v ghesongen worden.

15

Die deerde gemaect heeft in zijn stercheyt, ende heeft die eerde bereydt in sijn wijsheyt, ende met zijn voersienicheyt heeft die hemelen wtgherect.

16

Als hy een stemme gheeft soe worden die wateren vermenichfuldicht in den hemel, die de wolcken opheft van duyterste der eerden, hy heeft die blixemen tot reghenen ghemaect, ende hy heeft den wint ghebracht wt sijn scatten.

17

Alle mensch is dwaes gheworden van wetenheyt, alle metael ghieter is bescaemt gheworden in dat ghesneden affgods beelt, want zijn maecsel in valsch, ende daer en is gheenen gheest inne

18

Tsijn ydel wercken ende weerdich om te bespotten inden tijt van haerder besoeckinghe sullen sij vergaen.

19

Iacobs deel en is niet ghelijck dese. Want diet al ghemaect heeft die ist selue, ende Israel is den scepter van sijnder erffenisse. Die Heere der heyrscaren is sijnen naem.

20

⁺Ghy stoot my te tsamen die orloochsche instrumenten, ende ick sal die Heydenen in v te samen stooten, ende ick sal in v die rijcken verderuen.

+ C

21

Ende ick sal in v te samen stooten het peert, ende sijnen berijder, ende ick sal in v te samen stooten den waghen ende den beclimmer van dien.

22

Ende ick sal in v teghen een stooten den man ende die vrouwe, ende ick sal in v tsamen stooten den ouden man ende tkint, ende ick sal in v tsamen stooten den ionghelinck ende die maghet.

23

Ende ick sal in v te samen stooten den herder ende sijn cudde, ende ick sal in v te samen stooten, den ackerman ende sijn ackerbeesten, ende ick sal in v te samen stooten die vorsten ende wethouderen.

24

Ende ick sal Babilonien ende alle den bewoonders van Chaldeen verghelden alle tquaet dat sij ghedaen hebben in Sion in v ooghen, seyt die Heere,

25

Siet ic tot v ghy pestilenciael berch, seyt die Heere, die gheheel eertrijck verderft, ende ick sal mijn hant op v wtreycken, ende ick sal aff wentelen van die steenroetsen, ende ick sal v gheuen tot eenen berch der verberringhen.

26

Ende sij en sullen van v gheenen steen nemen tot eenen hoeck, ende eenen steen in die fundamenten, maer ghy sult verdoruen sijn inder eewicheyt, seyt die Heere.

27

Heft op het teeken op die eerde. Maect gheclanck metter basvenen onder die Heydenen. Heylicht die Heydenen ouer haer, vercondicht teghen haer den coninghen van Ararat, Menni ende Ascenez Telt teghen haer Taphsar, brengt peerden aen als cruyt wormen, die eenen anghel hebben.

28

⁺Heylicht teghen haer die Heydenen, die coninghen van Meden hen vorsten, ende alle hen raetsheeren, ende alle dlant van zijnder macht,

+ D

29

ende dlant sal beroert worden, ende onstelt, want des Heeren ghedachte sal wacker worden teghen Babilonien, dat hy dlant van Babilonien soude verwoest maken ende onwoonbaer.

30

Die stercke van Babilonien hebben opghehouden vanden strijdt, sij hebben in vaste plaetsen ghewoont, hen macht is verslint, ende sij sijn gheworden als vrouwen, haer tabernakelen zijn ontsteken, haer grendelen sijn heel ghebroken.

31

Die looper sal den loopenden te ghemoete comen, ende die bode sal den bootscappende ontmoeten, om den coninck van Babilonien te vercondighen, dat sijn stadt ghewonnen is van duyterste totten wterste,

32

ende dat die hauenen der wateren inghenomen zijn, ende dat die broecken metten vier ontsteken zijn, ende die orloochsche mannen verbaest zijn.

33

Want dit seyt die Heere der heyrscaren Israels Godt. Die dochter van Babilonien is als eenen dorschvloer, den tijt van haer wanninghe, noch een luttelken, ende den tijt van haren oochst sal comen.

34

Nabugodonosor die coninck van Babilonien heeft my gheten, hy heeft my verslint, hy heeft my ghemaect als een ydel vat, hy heeft my opghesopen als eenen draeck, hy heeft zijnen buyck veruult met mijn teericheyt, ende hy heeft my wtgheworpen.

35

Die boosheyt is teghen my, ende mijn vleesch is ouer Babilonien, seyt die wooninghe van Sion, ende mijn

[p. *627]

bloet is op die bewoonders van Chaldeen, seyt Ierusalem,

36

Daer om dit seyt die Heere. Siet ick sal v sake ordeelen end v wrake wreken, ende ic sal haer zee woest maken, ende ick sal haer adere verdrooghen.

37

Ende Babilon sal tot hoopen wesen, een wooninghe der draken, een verwonderinghe, ende een bespottinghe, om datter gheen bewoonder en is.

38

Sy sullen te samen ghelijck leeuwen briesschen, sij sullen hen hair verscudden, als der leeuwen welpens.

39

Ick sal hen drancken in die hitte stellen, ende ick salse droncken maken dat sij ontslapen sullen, ende slapen den eewighen slaep, ende dat sij niet opstaen en sullen, seyt die Heere.

40

Ick salse gheleyden als lammeren ten slachoffer, als rammen metten bocken.

41

Hoe is Sesach ghewonnen, ende hoe is inghenomen die heerlijcke stadt der gansscher eerden? Hoe is Babilon gheworden tot een verwonderinghe onder die Heydenen?

42

Die zee is op Babilon gheclommen, met die menichte van haren baren is sij ouerdect.

43

Haer steden sijn tot een verbaestheyt gheworden, haer lant ombewoonlijck, ende verwoest, een lant daer niemant in en woone, noch gheen sone des menschen doer en gae.

44

Ende ick sal versoeck doen op Bel in Babilonien, ende ick sal wtworpen tghene dat hy op ghesopen hadde wt zijnen mont, ende die Heydenen en sullen tot hem niet meer vergaderen. Want den muer van Babilonien sal voerwaer oock nedervallen.

45

⁺Gaet wt dat midden van haer mijn volck, op dat een ieghelijck sijn ziele behoude van die gramscap der verbolghentheyt des Heeren.

+ E

46

Ende op dat by auontueren v lieder herte niet en vermorwe, ende dat ghy ontsien soudt het ghehoor dat int landt sal ghehoort worden, ende in deen iaer sal dat ghehoor comen, ende nae dit iaer een ghehoor ende een boosheyt int lant, ende een heerscapper bouen den heerscapper.

47

Daer om siet die daghen comen, ende ick salt versoecken op die ghesneden affgoden van Babilonien, ende alle haer lant sal bescaemt worden, ende alle haer verslaghene sullen vallen int midden van haer.

48

Ende ouer Babilonien sullen louen den hemel ende die eerde, ende alle dat in hen is. Want van den noorden sullen haer die roouers comen, seyt die Heere.

49

Ende ghelijck Babilon ghedaen heeft dat die verslaghene in Israel vallen souden, alsoe sullen die verslaghenen van Babilonien vallen op alle die eerde.

50

Diet sweert ghevloden hebt, coemt en wilt niet staen, weest van verre des Heeren ghedachtich, ende laet Ierusalem op v herte climmen.

51

Wy zijn bescaemt, want wy hebben tverwijt ghehoort, die bescaemptheyt heeft onse aensichten bedect, want die vreemde zijn ghecomen op die heylichmakinghe van des Heeren huys.

52

Daer om siet die daghen comen, seyt die Heere, ende ick sal versoecken op haer ghesneden affgoden, ende in allen haer lant, sal die ghewonde huylen.

53

Ist dat Babilon inden hemel climt, ende dat sij in die hoochde haer machticheyt vesticht, soo sullen van my haer verderuers comen, seyt die Heere.

54

Een stemme des gheroeps is van Babilonien, ende een groote vernielinghe van der Chaldeen lant.

55

⁺Want die Heere heeft Babilonien verwoest, ende hy heeft wt haer een groote stemme verdoruen, ende hen baren sullen gheluyt gheuen als vele wateren, hen stemme heeft gheluyt ghegheuen.

+ F

56

Want op haer, dat is op Babilonien, is een roouer ghecomen, ende haer stercke zijn gheuanghen, ende haren boghe is ommachtich gheworden. Want die stercke wreker die Heere sal vergheldende verghelden.

57

⁺Ende ick sal droncken maken haer princen, ende haer wijse, ende haer vorsten, ende haer wethouderen, ende haer stercke mannen, ende sij sullen eenen eewighen slaep slapen, ende sij en sullen niet ontwaken, seyt die coninck, die Heere der heyrscaren is sijnen naem. Dit seyt die Heere der heyscaren.

+ G

58

Den alderbreetsten muer van Babilonien sal met een ondergrauinghe ondergrauen worden, ende haer hooghe poorten sullen metten viere verbrant worden, ende der volcken arbeyden ende der Heydenen sullen te niete metten viere wesen, ende heel te niet gaen.

59

Dwoert dat Ieremias die prophete gheboden heeft Saraie den sone Nerie des soens Maasie, als hy met Sedecia den coninck reysde in Babilonien int vierde iaer van sijnen rijcke. Ende Saraias was die prince der prophetien.

60

Ende Ieremias heeft ghescreuen alle tquaet dat comen soude op Babilonien in eenen boeck, alle dese woerden die ghescreuen zijn teghen Babilonien.

61

Ende Ieremias heeft gheseyt tot Saraiam. Als ghi sult in Babilonien comen sijn, ende ghy sult ghesien hebben ende ghelesen alle dese woerden,

62

soo suldi segghen. Heere ghy hebt ghesproken teghen dese plaetse, dat ghy die verderuen soudt, alsoo datter niet en sij diese bewoone, vanden mensche totten vee toe, ende dat daer zijn soude een eewighe woestijne.

63

Ende als ghy desen boeck sult al heel ghelesen hebben, soo suldi aen dien eenen steen binden, ende dien werpen int midden van Euphrates,

64

ende ghy sult segghen. Alsoo sal Babilon versoncken worden, ende sij en sal niet wederop staen van daensicht des verdriets, dat ick op haer brenghe, ende sij sal van een sceyden. Tot hier toe sijnt Ieremias worden.