Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .l. Capittel.

1

⁺DWoert dat die Heere ghesproken heeft van Babilonien ende vander Chaldeen lant, in Ieremias des Propheets hant.

+ A

2

Vercondighet onder die Heydenen, ende maect datment hoore heft op een teeken, preect, ende en willet niet verberghen, segt, Babilon is ghewonnen, Bel is bescaemt, Merodach is verwonnen, zijn ghesneden affgodsbeelden zijn bescaemt, hen affgoden zijn verwonnen.

3

Want teghen haer is een volck opgeclommen vant noorden, die haer lant sal tot een woestijne maken, ende daer en sal niemant zijn die daer in woont, van den mensche tot die beesten toe, ende sij zijn beroert gheweest, ende sijn wech ghegaen.

4

In die daghen, ende in dien tijt, seyt die Heere, sullen die kinderen van Israel comen, sij ende die kinderen van Iuda te samen wandelende ende weenende sullen sij hen haesten, ende sij sullen den Heere haren Godt soecken.

5

⁺In Sion sullen sij den wech vraghen, hen aensichten sijn herwaerts, sij sullen comen, ende totten Heere versaemt worden met een eewich verbont, dwelck doer gheen verghetelijcheyt en sal wtghedaen worden.

+ B

6

Een verloren cudde is mijn volck gheworden, hen herders hebbense verleydt, ende sij hebbense doen dwalen op die berghen, vanden berch zijn sij opden hueuel voerts ghegaen, sij hebben hen rustplaetse vergheten.

7

Alle diese gheuonden hebben, die hebbense gheten, ende hen vianden hebben gheseyt, Wy en hebben niet ghesondicht, om dat sij ghesondicht hebben den Heere, die schoonheyt der rechtuerdicheyt ende haerder vaderen verwachtinghe, den Heere.

8

Gaet wech wt dat midden van Babilonien, ende

[p. *625]

gaet wt der Chaldeen landt, ende weest als ionghe boxkens voer tcudde.

9

Want siet ick verwecke, ende sal brenghen in Babilonien, een vergaderinghe van groote volcken vant noorden lant, ende die sullen bereydt worden teghen haer, ende daer aff sal sij verwonnen worden. Sijnen pijl is als den pijl van eenen stercken man die dootslaet hy en sal niet ydel wederkeeren.

10

Ende Chaldeen lant sal tot eenen roof wesen, alle die haer verderuen die sullen veruult worden, seyt die Heere,

11

Om dat ghy v verhuecht ende groote dinghen spreect, beroouende mijn erffenisse, om dat ghy wtghestort sijt als een calf opt tcruyt ende hebt ghebrult ghelijck eenen stier.

12

V moeder is wtermaten seer bescaemt, ende sij is den ghestubbe ghelijck gheworden die v lieden ghebaert heeft, siet sij sal duyterste wesen onder die volcken, verwoest, sonder wech, ende drooghe.

13

Van des Heeren gramscap en sal sij niet bewoont worden, maer sij sal gheheel tot een wildernisse ghebracht worden. ⁺Alle die doer Babilonien passeert, die sal hem seer verwonderen ende spotten ouer allen haer plaghen.

+ C

14

Bereyt v teghen Babilonien al rontsomme ghy allegader die den booghe spant, bestrijdtse, en spaert gheen pijlen. Want sij heeft den Heere ghesondicht.

15

Roept teghen haer, sij heeft allesins die hant ghegheuen, haer fundamenten zijn gheuallen, haer mueren zijn verdoruen. Want het is des Heeren wrake, neemt wrake van haer, ghelijck sij ghedaen heeft, alsoo doet haer.

16

Verderft den saeyere van Babilonien, ende die de sickele houdt in den tijt des oochst, van daensicht des sweerts vander duyuen sal een ieghelijck wederom tot sijn volck ghekeert worden, ende een ieghelijck sal tot zijn lant vlieden.

17

Israel is een verstroyt cudde, die leuwen hebben hem verdreuen. Ierst heeft hem gheten die coninck van Assyrien, dese alderlaetste Nabugodonosor die coninck van Babilonien heeft hem zijn ghebeente wt ghedaen.

18

Daer om dit seyt die Heere der heyrscaren Israels Godt. ⁺Siet ick sal den coninck van Babilonien besoecken, ende zijn lant ghelijck ick besocht hebbe den coninck van Assur,

+ D

19

ende ick sal Israel wederom leyden tot zijn wooninghe, ende Carmelus sal affgheweyt worden, ende Basan, ende opden berch van Ephraim ende Galaad sal zijn ziele versaedt worden.

20

In die daghen, ende in dien tijt, seyt die Heere, sal Israels boosheyt ghesocht werden, ende sij en sal niet zijn, ende die sonde van Iuda, ende men en salse niet vinden, want ick sal hen ghenadich wesen den ghenen die ick daer sal achterghelaten hebben.

21

Climt opt lant der gheender die heerscappie hebben, ende besoect op haer bewoonders, verstroyt, ende slaet doodt dat achter hen lieden is, seyt die Heere, ende doet nae alle die dinghen die ick v gheboden hebbe.

22

Daer is een stemme der orloghen int landt, ende een groote vernielinghe.

23

Hoe is den hamer van gheheel eertrijck ghebroken ende heel vernielt? Hoe is Babilon onder die Heydenen in een woestijne verandert?

24

Ick heb v bestrict, ende ghy sijt gheuanghen Babilon, ende ghy in wistes niet. ⁺Ghy sijt gheuonden ende ghegrepen, want ghy hebt den Heere ghecreyt.

+ E

25

Die Heere heeft zijnen scadt openghedaen, ende die vaten zijnder gramscappen voert ghebracht. Want dit is des Heeren des Godts der heyrscaren werck inder Chaldeen lant.

26

Coemt tot haer van die wterste palen, doet open, dat sijn moghen wtgaen die haer vertreden, neemt die steenen wech vanden wech, ende brengtse tot hoopen, ende slaetse doot, noch en laet daer niet ouer blijuen.

27

Verstroyt alle haer stercke, laetse nederdalen ter doodinghen, wee henlieden, want haerlieder dach is ghecomen den tijt van hen besoeckinghe.

28

Die stemme der vliedender, ende der gheender die ontgaen waren wten lande van Babilonien, dat sij in Sion souden vercondighen die wrake des Heeren ons Godts, die wrake zijns tempels.

29

Vercondicht seer vele in Babilonien alle den ghenen die den boghe spannen. Staet teghen haer al rontsomme, ende en laetter niemant ontvlieden, vergheldt haer nae haer werck, nae alle dat sij ghedaen heeft, doet haer, want sij is teghen den Heere opghericht, teghen den heylighen van Israel.

30

Daerom sullen haer ionghelinghen vallen in haer straten, ende allen haer orloochsche mannen sullen stil swijghen in dien dach, seyt die Heere,

31

Siet ic spreke tot v ghy houerdighe, seyt die Heere die Godt der heyrscaren, want uwen dach is ghecomen, den tijt van uwer besoekinghen.

32

⁺Ende die houerdighe sal vallen, ende heel neder vallen ende daer en sal niemant zijn die hem oprechte, ende ick sal een vier ontsteken in haer steden, ende dat salt al verslinden rontsomme haer.

+ F

33

Dit seyt die Heere der heyrscaren, Die kinderen van Israel ende die kinderen van Iuda te samen lijden valsche besculdinghe, alle die hen gheuanghen hebben die houdense, sij en willense niet laten gaen.

34

Hen sterck verlosser wiens naem is, Heere der heyrscaren, die sal int ordeel hen sake bescermen, dat hy die eerde veruaere ende beroere die bewoonders van Babilonien.

35

Tsweert coemt tot die Chaldeen, seyt die Heere, ende tot die inwonders van Babilonien, ende tot haer princen, ende wijse.

36

Tsweert coemt tot haer waersegghers, die dwaes zijn sullen, tsweert tot hen stercke die vreesen sullen.

37

Tsweert coemt tot hen peerden, ende tot hen waghenen, ende tot alle tghemeyn volck dat int midden van haer is, ende sij sullen zijn ghelijck vrouwen, tsweert tot haer scatten die gherooft sullen worden.

38

Droocheyt sal op hen wateren wesen, ende sij sullen verdrooghen, want het is een lant der ghesnedender beelden, ende sij glorieren in monstren.

39

⁺Daerom sullen die draken woonen met die dwase moorders, ende die struyssen sullen daer in woonen, ende sij en sal voertaen niet meer bewoont worden tot inder eewicheyt, noch sij en sal niet op getimmert worden van geslachte tot gheslachte.

+ G

40

Ghelijc die Heere omgheworpen heeft Sodomam ende Gomorrham, ende haer bijligghende steden seyt die Heere, daer en sal gheen man woonen, ende gheen sone des menschen salse bewoonen.

41

Siet daer coemt een volck vanden noorden, ende een groot volck, ende veel coninghen sullender opstaen van die wterste der eerden.

42

Sy sullen boghen ende scilden grijpen, sij zijn wreedt, ende onghenadich, hen stemme sal als die zee gheluyt gheuen, ende sij sullen op peerden climmen, als een man ten strijde bereydt teghen v dochter Babilon.

43

Die coninck van Babilonien heeft hen same ghehoort, ende zijn handen sijn slap gheworden, Benautheyt heeft hem beuanghen, pijne als eender barender vrouwen.

44

Siet het sal als eenen leuw opclimmen van die houerdie der Iordanen, tot die machtighe schoonheyt. Want ick salt haestelijck doen loopen tot haer, ende wie sal die wtuercoren zijn die ick ouer die stellen sal? want wie is mijns ghelijck? ende wie sal my verdraghen? ende wie is dese herder die mijnen aensichte wederstaen

[p. *626]

sal?

45

Daerom hoort des Heeren raet, dien hy metter herten begrepen heeft teghen Babilonien, ende zijn ghedachten die hy ghedacht heeft opder Chaldeen lant. Ist dat die cleyne der cudden hen niet aff en trecken, ten sij dat hen wooninghe met henlieden niet verdoruen en worde.

46

Van tgheluyt der Babilonischer gheuanghenissen is die eerde beroert, ende tgheroep is onder die Heydenen ghehoort.