Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlix. Capittel.

1

⁺TOt Ammons kinderen dit seyt die Heere. En heeft Israel gheen kinderen? oft en sal hy gheenen erffghenaem hebben? Waerom heeft Melchom dan Gad beseten, ende waerom heeft sijn volck in die steden van henlieden ghewoont?

+ A

2

Daerom siet die daghen comen, seyt die Heere, ende ick salt doen hooren ouer Rabbath der kinderen van Ammon het gheruysch des strijdts, ende tsal int gherucht verstroeyt sijn, ende haer dochteren sullen metten vier verbrant worden, ende Israel sal sijn besitters besitten, seyt die Heere,

3

Huylt Hesebon, want Hay is verwoest, Roept ghy dochteren van Rabath omgort v met haren cleederen, ende gaet al om neuen die tuynen, want Melchom sal ter oueruoeringhen gheleyt worden, sijn priesters ende sijn princen te samen

4

Wat glorieerdi in die valleyen? V valleye is veruloten ghi teeder dochter, die in v scatten betrouwen haddet ende seydet. Wie sal tot my comen?

5

Siet ick sal op v veruaertheyt brenghen, seyt die Heere die God der heyrscaren. ⁺Van alle den ghenen die rontsom v sijn, ende ghy sult verstroeyt worden een ieghelijc, ende daer en sal niemant sijn die de vliedende verghadert van uwen aensichte.

+ B

6

Ende nae desen sal ick die gheuanghene der kinderen van Ammon doen wedercomen, seyt die Heere tot Idumeen.

7

Dit seyt die Heere der heyrscharen. En isser voorts gheen wijsheyt meer in Theman? Den raet is vergaen van die kinderen, hen wijsheyt is onnut gheworden.

8

Vliedt, ende keert die rugghen, daelt neder in die diepe holen der eerden ghy bewoonders van Dedan, want ick heb Esaus verderffenisse op hem ghebracht, den tijt van sijnder besoeckinghen,

9

Waert dat die wijnsnijders op v ghecomen waren, sij en souden daer niet een crappeken ghelaten hebben, hadden die dieuen des nachts ghecomen, si souden gherooft hebben dat hen ghenoech hadde gheweest.

10

Maer ick heb Esau ontdect, ick heb zijn verholentheden gheopenbaert ende hy en sal niet moghen verholen blijuen, sijn saet is verwoest, ende zijn broeders, ende zijn ghebueren, ende ten sal niet wesen.

11

⁺Verlaet v weesen, ick salse doen leuen, ende v weduwen sullen in my hopen,

+ C

12

Want dit seyt die Heere. Siet die niet verordeelt en waren dat

[p. *624]

sij den kelck drincken souden, sullen dien drinckende drincken, ende suldi ghy als onnoosele achterghelaten worden? ghy en sult niet onnosel wesen, maer ghy sult dien drinckende drincken.

13

Want by my seluen heb ic ghesworen, seyt die Heere, dat Bosra tot een wildernisse, ende tot een verwijt ende tot een woestijne, ende tot een vermalendijdinghe sal wesen, ende alle haer steden sullen wesen tot eewighe woestijnen.

14

Ick heb een ghehoor ghehoort vanden Heere, ende daer is een legaet aen die Heydenen ghesonden. Vergadert v ende coemt teghen haer, ende laet ons te samen opstaen ten strijde.

15

Want siet ick heb v seer cleyn ghestelt onder die Heydenen versmadelijck onder die menschen.

16

V vermetelijckheyt heeft v bedroghen, ende ws herten hoouerdicheyt, die daer woont in die holen der steenrootsen, ende ghy arbeydt om te aengrijpen die hoocheyt des hueuels, als ghy als eenen arent uwen nest sult hooghe ghemaect hebben, van daer sal ick v aff trecken, seyt die Heere.

17

⁺Ende Idumea sal verwoest wesen, alle die daer doer gaen sal, die sal hem verwonderen ende wispelen ouer allen haer plaghen.

+ D

18

Ghelijck Sodoma omgheworpen is ende Gomorrha, ende haer ghebuerinnen, seyt die Heere. Daer en sal gheen man woonen, ende gheens menschen sone en sal die bewoonen.

19

Siet hy sal als eenen leeuw opclimmen van die houerdicheyt der Iordanen, tot die vrome schoonheyt. Want ick sal onuersienlijck tot haer loopen, ende wie sal die wtuercorene wesen die bouen hem stellen sal? Want wie is mijns ghelijck? ende wie sal my verdraghen, ende wie is dese herder die mijnen aensicht sal moghen wederstaen?

20

Daer om hoort des Heeren raet die hy ghesloten heeft van Edom, ende die ghedachten die hy ghedacht heeft van die bewoonders van Theman. Ist dat hen die cleyne der cudden niet neder en worpen, ten sij dat sij met hen haerlieder wooninghe verstroyen.

21

⁺Van dat gheluyt van haerlieder val is die eerde beruert gheweest. In die roode zee is tgheroep van haer stemme ghehoort.

+ E

22

Siet als eenen arent sal hy opclimmen, ende wech vlieghen ende hy sal zijn vloghelen wtrecken op Bosram, ende therte der stercker van Idumeen sal wesen in dien dach, als therte van een barende vrouwe.

23

Tot Damascus, Emath is bescaemt, ende Arphad, want sij hebben een dalderquaetste ghehoor ghehoort, sij zijn verbaest in die zee, van sorchuuldicheyt en hebben sij niet connen gherusten.

24

Damascus is ommachtich gheworden, sij is ter vlucht ghekeert, anxt heeft haer beuanghen, benautheyt ende pijnen hebben haer beuanghen als der barender vrouwen.

25

Hoe hebben sij die loffelijcke stadt verlaten, die stadt der blijscap?

26

Daer om sullen haer ionghelinghen vallen in haer straten, ende alle die orloosche mannen sullen stil swijghen in dien dach, seyt die Heere der heyrscaren.

27

Ende ick sal een vier ontsteken inden muer van Damasco, ende dat sal Benadabs vesten verslinden.

28

⁺Tot Cedar ende tot die rijcken van Asor die welcke Nabugodonosor die coninck van Babilonien gheslaghen heeft, dit seyt die Heere, Staet op ende trect opwaerts tot Cedar, ende verderft die kinderen vanden oosten.

+ F

29

Hen tabernakelen ende hen cudden sullen sij nemen, hen vellen, ende alle hen ghereetscappen, ende hen kemelen sullen sij voer hen seluen wechnemen, ende sij sullen die vreese roepen ouer hen rontsomme.

30

Vliedt, gaet crachtelijck wech, sidt in die diepten der eerden die in Asor woont, seyt die Heere. Want Nabugodonosor die coninck van Babilonien heeft teghen v lieden eenen raet ghehouden, ende hy heeft teghen v lieden ghedachten ghedacht.

31

Staet te samen op, ende trect opwaerts tot dat gherust volck ende dat betrouwelijck woont, seyt die Heere, sij en hebben noch dooren noch grendelen, sij woonen alleene.

32

Ende hen kemelen sullen wesen ten rooue, ende die menichte van die behelpige beesten tot eenen buete, ende ick salse verstroyen in alle die winden die heel ghescoren zijn van haire, ende in allen hen palen rontsomme sal ic die verderffenisse op hen brenghen, seyt die Heere,

33

Ende Asor sal wesen tot een wooninghe der draken, verwoest tot inder eewicheyt, daer en sal gheen man blijuen, ende gheen sone des menschen en salse bewoonen.

34

⁺Dwoert des Heeren dat ghesciet is tot Ieremiam den Propheet teghen Elam, int beghinsel van Sedecias des coninc van Iuda conincrijck segghende,

+ G

35

Dit seyt die Heere der heyrscaren. Siet ick sal Elams boghe breken, ende hen stercheyt nemen,

36

ende ick sal ouer Elam brenghen die vier winden van die vier hoecken des hemels, ende ick salse verstroyen in alle dese winden, ende daer en sal gheen volck zijn tot die welcke die vluchtighe van Elam niet comen sullen.

37

Ende ic sal Elam doen vreesen voer haer vianden in daenschijn der gheender die hen ziele soecken, ende ick sal tquaet op hen brenghen, die gramscap van mijnen rasenden torn, seyt die Heere, ende ick sal tsweert achter hen senden, tot dat icse verniele.

38

Ende ick sal mijnen stoel stellen in Elam, ende ick sal daer wt verderuen die coninghen ende princen, seyt die Heere.

39

Maer in die laetste daghen sal ick Elams gheuanghene doen weder keeren, seyt die Heere.