Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlviij. Capittel.

1

⁺TOt Moab. Dit seyt die Heere der heyrscaren Israels Godt. Wee ouer Nabo, want sij is verdoruen ende bescaemt, Cariathaim is inghenomen, die stercke is beschaemt, ende sij heeft ghebeeft,

+ A

2

Moab en heeft voortaen gheen verhueghen meer teghen Hesebon, si hebben quaet ghedacht. Coemt ende laet ons die vernielen wten volcke, daerom suldy swijghende heel stil wesen, ende tsweert sal v volghen.

3

Een stemme des gheroeps van Oronaim verwoestheyt ende groote vernielieghe

4

Moab is in stucken ghebroken, bootscapt sijnen cleynen kinderen dat gheroep,

5

want door den opganc van Luith sal hi screyende opgaen in gheweene, want inden nederganc van Oronaim hebben die vianden tghehuyl der vernielinghen ghehoort.

6

Vliedt, behoudt v zielen, ende ghy sult wesen als die heyde in die woestijne,

7

om dat ghi betrouwen hebt ghehadt in v stercten, ende in v scatten, ende ghy sult oock in ghenomen worden, ende Chamos sal in die oueruoeringhe gaen, zijn priesters, ende princen al te samen.

8

⁺Ende die roouer sal tot alle steden comen, ende gheen stadt en sal behouden worden, ende die valleyen sullen vergaen, ende die platte velt landen sullen verstroeyet worden, want die Heere heuet gheseyt.

+ B

9

Gheeft Moab die bloeme, want hy sal al bloeyende wtgaen, ende sijn steden sullen verwoest sijn, ende onbewoonlijc.

10

Vermalendijt is hy die des Heeren werck bedrieghelijc doet, ende vermalendijt is hy die sijn sweert verbiet van bloede,

11

Moab heeft vruchtbaer gheweest van sijn ioncheyt, ende hy heeft in sijnen gheest gherust, ende hy en is niet vergoten van deen vat in dander vat, ende hy en is in die veruoeringhe niet wech ghegaen, daerom is sijnen smaeck in hem ghebleuen, ende sijnen ruec, en is niet verandert.

12

Daerom siet die daghen comen seyt die Heere, ende ick sal hen seynden ordineerders ende nedersetters der flesschelkens, ende si sullen hem nederleggen ende sijn vaten wtsceppen ende hen flesschelkens sullen si teghen een stooten.

13

Ende Moab sal bescaemt worden van Chamos, ghelijc thuys van Israel bescaemt is van Bethel waer in hy betrouwen hadde.

14

Hoe segdy. Wij sijn sterc, ende vrome mannen om te strijden?

15

⁺Moab is verwoest, ende sijn steden hebben si verbrant, ende sijn wtgecoren iongelingen sijn nedergegaen ter doodinghen, seyt die coninc, die Heere der heyrscaren is sijnen naem.

+ C

16

Die verderffenisse van Moab is nae by om te comen, ende zijn quaet sal bouen maten seer haestelijc toe-

[p. *623]

loopen.

17

Troost hem alle ghy die alomme omtrent hem sijt ende ghy alle die sijnen naem kent, segt. Hoe is die stercke roede ghebroken, den glorioosen stock?

18

Daelt neder vander glorien, ende sidt inden dorst ghy wooninghe der dochter van Dibon, want die verderuer van Moab sal tot v opclimmen, ende hy sal v stercke plaetsen in stucken breken.

19

Staet inden wech, ende siet van verre ghi wooninghe van Aroer. Vraecht den vliedende, ende den ghenen die ontgaen is, segt. Wat isser gheschiet?

20

Moab is bescaemt, want hy is verwonnen, Huylt, ende roept, vercondighet in Arnon dat Moab verwoest is.

21

Ende het ordeel is ghecomen tot dat plat veltachtich lant, ⁺op Helon ende op Iafa, ende op Mephaath,

+ D

22

ende op Dibon, ende op Nabo, ende opt huys Deblathaim,

23

ende op Cariathaim, ende op Bethgamul, ende op Bethmaon,

24

ende op Carioth, ende op Bosra, ende op alle die steden van Moabs lant, die verre ende die by zijn.

25

Moabs horn is affgheslaghen, ende sijnen arm is in stucken ghebroken, seyt die Heere.

26

Maect hem droncken want hy is teghen den Heere opghehauen. Ende Moab sal zijn hant stooten in zijn wtbrakinghe, ende hy sal selue ooc tot eenen spot wesen,

27

want hy heeft v tot eenen spot gheweest Israel, als oft ghi hem onder die dieuen gheuonden hadt, daerom suldy om v woorden die ghy teghen hem ghesproken hebt gheuanghen gheleydt worden.

28

Verlaet die steden, ende woont in die steenrootse ghy bewoonders van Moab, ende weest als die duyue nestelende inden oppersten mont vanden gate.

29

Wij hebben Moabs hoouerdie ghehoort, hy is seer hoouerdich, zijn hoocheyt ende zijn vermetelijcheyt, ende sijn houerdie, ende sijns herten hoocheyt.

30

⁺Ic kenne (seyt die Heere) zijn beroemelijcheyt, ende dat sijn macht dies ghelijck niet en is, ende dat hy hem (niet nae dat hy mocht) ghepijnt heeft te doene.

+ E

31

Daerom sal ick op Moab huylen, ende tot gheheel Moab sal ick roepen, tot die claghende mannen vanden muer van ghebacken steenen ghemaect.

32

Van Iazers beweeninghe sal ick v weenen ghy wijngaert Sabama, v rancken sijn ouer die zee ghegaen, ende tot die zee van Iazer sijn sij doorghecomen, op uwen oochst ende v wijnsnijdinghe is die roouer gheuallen.

33

Die blijscap ende tverhueghen is wech ghenomen van Carmelus, ende van dlant van Moab, ende den wijn heb ick van die perssen affghenomen, die druyuen treder en sal dat ghewoonlijc verweckende liedeken gheensins singhen.

34

Vanden gheroep van Hesebon tot Eleale ende Iasa hebben sij hen stemme ghegheuen, ende van Segor tot Oronaim toe dat drijiarich calf, ende die wateren van ⁺Nemrim sullen dalderquaetste wesen.

+ F

35

Ende ic sal van Moab wechnemen (seyt die Heere) den ghenen die op die hoochden offert, ende sijnen goden sacrificie doet.

36

Daerom sal mijn herte tot Moab als een fluyte wedergheluyt gheuen, ende mijn herte sal tot die mannen des muers van ghebacken steenen een gheluyt van fluyten gheuen, om dat hy meer ghedaen heeft dan hy vermocht, daerom zijn sij vergaen,

37

want elc hooft sal caluheyt hebben, ende elcken baert sal ghescoren wesen, in alle handen tsamen bindinge, ende op elcken rugghe een hairen cleedt,

38

op alle die daken van Moab ende in zijn straten sal alderhande gheween sijn want ic heb Moab gebroken als een onnut vat, seyt die heere.

39

Hoe is hi verwonnen, ende hoe hebben si gehuylt? Hoe heeft Moab sijnen necke nedergesoncken, ende is bescaemt gheweest? Ende Moab sal tot een bespottinghe wesen, ende tot een exempel alle den ghenen die rontsom hem sijn.

40

Dit seyt die Heere. Siet hy sal als eenen aernt vlieghen, ende hy sal sijn vloghelen wtrecken tot Moab,

41

⁺Carioth is inghenomen, ende die stercke vaste plaetsen sijn ghewonnen, ende therte der stercker mannen van Moab sal op dien dach wesen alst herte van een vrouwe die in barens noode is.

+ G

42

Ende Moab sal ophouden een volc te sijne, om dat hy teghen den Heere gheglorieert heeft.

43

Anxt ende grachte ende strick zijn op v o ghi bewoonder van Moab seyt die Heere.

44

Soo wie dat vliet van daensicht des anxts, die sal in die gracht vallen, ende wie wter grachten opclimt die sal met den strick gheuanghen worden, want ic sal ouer Moab brenghen diaer van hen versoeckinghe, seyt die Heere.

45

In die scaduwe van Hesebon hebben sij ghestaen die vanden strick vloden want daer is een vier ghegaen wt Hesebon, ende een vlamme wt dat midden van Sehon ende dat heeft verslint een deel van Moab, ende den tsop van die kinderen des gheruchts.

46

Wee v ghy Moab, ghy zijt vergaen o ghi volck van Chamos, want v sonen ende v dochteren sijn beuanghen in die gheuanghenisse.

47

Ende ick sal wederom keeren die gheuanghenisse van Moab, in die wterste daghen, seydt die Heere. Tot hier toe sijnt Moabs ordeelen.