Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvij. Capittel.

1

⁺DEs Heeren woort dat ghesciet is tot Ieremiam den propheet teghen die Palesthinen eer dat Pharao Gazam versloech.

+ A

2

Dit seyt die Heere. Siet daer comen wateren op vanden noorden, ende sij sullen wesen als een oueruloedende beke, ende sij sullen die eerde ouerdecken, ende haer volheyt die stadt ende haer bewoonders,

3

⁺die menschen sullen roepen, ende alle die bewoonders des lants sullen huylen van dat gheruysch der pomperien van sijn wapenen ende orloochsche mannen, van sijnder waghenen beroerten, ende van die menichte sijnder raderen. Die vaders en hebben hen kinderen niet aenghesien, met lamme handen,

+ B

4

⁺voor die toecoemste des daechs inden welcken alle die Philisthijnen sullen verdoruen worden, ende Tyrus ende Sydon met allen haren anderen helpen sullen verdoruen worden, want die Heere heeft die Palesthijnen verwoest, die bleuelinghen des eylants van Capadocien.

+ C

5

Daer is een caluheyt ghecomen ouer Gazam, Ascalon heeft stille ghesweghen, ende die bleuelinghen van hen valleye. ⁺Hoe langhe suldi in stucken ghehouwen worden?

+ D

6

O ghy sweert des Heeren, hoe langhe en suldi niet rusten? ghaet in v sceyde, wert vercoelt ende swijcht.

7

Hoe salt rusten, als die Heere hem gheboden heeft teghen Ascalon, ende teghen haer contreyen by die zee, ende hem aldaer beuel ghegeuen heeft?