Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvi. Capittel.

1

⁺DWoort des Heeren datter gheschiet is tot Ieremiam den propheet tseghen die Heydenen tot Egipten,

+ A

2

teghen Pharaos Nechao des conincs van Egipten heyr, dat by den vloet Euphrates was in Charcamis, den welcken Nabugodonosor die coninck van Babilonien gheslaghen heeft, int vierde iaer van Ioacim Iosias sone den coninck van Iuda.

3

Bereydt den scilt ende den bokelaer, ende gaet wt ten strijde.

4

Spant te samen die peerden, ende ghy rijders sidt daer op, staet in die helmen maect schoon die lancien, doet v pansieren aen,

5

Waerom dat? ick hebse veruaert ghesien ende den rugghe keerende, hen stercke verslaghen, si sijn haestelijc gheuloden ende sij en hebben niet omme ghesien aen alle sijden is veruaertheyt, seyt die Heere.

6

⁺Die rassche en vliede niet, noch die stercke en meyne niet dat hy mach behouden worden, aent noorden by den vloet Euphrates sijn si verwonnen ende gheuallen.

+ B

7

Wie is dese die als eenen vloet opclimt, ende als der riuieren soo swillen sijn baren op?

8

Egipten climt op als eenen vloet, ende als vloeden soo worden haer baren beroert, ende hy sal segghen. Ick sal opclimmende deerde ouerdecken, ick sal die stadt ende haer bewoonders verderuen.

9

Climt op die peerden ende verhuecht v in die wagenen, ende laet die vrome voortcomen. Die van dat Morianen lant, ende die Lybianen, den schilt houdende ende die Lydianen scichten nemende ende worpende.

10

Ende dien dach des Heeren der heyrscaren sal eenen dach der wraken sijn, dat hy soude wrake nemen van sijnen vianden. ⁺Tsweert sal verslinden ende versaet worden ende tsal droncken worden van haren bloede, want daer is een slachofferande des Heeren Gods der heyrscaren int noortlant bi den vloet Euphrates.

+ C

11

Climt op in Galaad ende neemt termentijn ghy maecht ghi dochter van Egipten, te vergeefs ver-

[p. *622]

menichfuldicht ghy die medecijnen, ghy en sult gheen ghesontheyt hebben.

12

Die Heydenen hebben v scandelijcheyt ghehoort, ende v ghehuyl heeft die eerde veruult, want die stercke heeft ghestooten teghen den stercken, ende sij zijn beyde tsamen gheuallen.

13

Dwoort dat die Heere ghesproken heeft tot Ieremiam den propheet, ⁺van dien dat Nabugodonosor die coninc van Babilonien comen soude, ende slaen dlant van Egipten.

+ D

14

Vercondighet Egipten, ende doetet hooren in Magdalo, laet dat gheluyt comen in Memphis, ende in Taphnis, segt. Staet ende bereyt v want het sweert sal verslinden tghene dat rontsom v is.

15

Waerom is v stercke verrot gheworden? hy en heeft niet ghestaen want die Heere heeft hem omghestooten.

16

Hy heeft die vallende vermenichfuldicht, ende die man is gheuallen tot sijnen naesten, ende sij sullen segghen. Staet op ende laet ons wederkeeren tot ons volck, ende totten lande van onser gheboorten, van daensicht des sweerts vander duyuen.

17

Noemt Pharaos des conincs van Egipten naem gherucht, den tijt heuet aenbracht.

18

⁺Ic leue (seyt die coninc) die Heere der heyrscaren is sijnen naem, want ghelijc Thabor onder die berghen ende ghelijc Carmelus in die zee, soo sal hi comen.

+ E

19

Ghi inwoonersse dochter van Egipten maect voor v ghereetscappen der veruoeringhen, want Nemphis sal een woestijne wesen, ende verlaten worden, ende onbewoont.

20

Egiptus is een welgedaen ende schoon veers calf, haer sal een drijuer comen wten noorden.

21

Ende haer huerlinghen die int midden van haer verkeerden, zijn ghekeert als ghemeste calueren, ende si zijn tsamen gheuloden, ende en hebben niet connen ghestaen, want den dach van haren dootslach is comen op hen, den tijt van haer besoeckinge.

22

Haer stemme sal als des copers gheluyt gheuen, want sij sullen met een heyr haestelijc comen ende met bijlen sullen sij hen comen, als hout afhouwende.

23

⁺Sij hebben sijn bosscagie affghehouwen, seyt die Heere, die niet en mach ghetelt worden, sij sijn vermenichfuldicht bouen die sprinchanen, ende hen en is gheen ghetal.

+ F

24

Die dochter van Egipten is bescaemt, ende gheleuert in des volcs van noorden hant.

25

Die Heere der heyrscaren Israels Godt heeft gheseyt. Siet ick sal versoeck doen ouer dat gherucht van Alexandrien, ende ouer Pharao, ende ouer Egipten, ende ouer haer goden, ende ouer haer coninghen, ende ouer Pharao ende ouer die ghene die in hem betrouwen,

26

ende ick salse gheuen in die handt der gheender die hen ziele soecken, ende in Nabugodonosor des conincs van Babilonien hant, ende in sijnder knechten hant, ende nae dese salse bewoont worden als in die voorleden daghen, seyt die Heere.

27

⁺Ende ghi en vreest niet o mijn knecht Iacob, ende en weest niet veruaert Israel, want ick sal v verlossen van verre, ende v saet van dlant uwer gheuanghenissen, ende Iacob sal wederom keeren, ende rusten ende voorspoedich wesen, ende daer en sal niemant wesen die hem veruaeren sal.

+ G

28

Ende ghy en wilt niet vreesen mijn knecht Iacob, seyt die Heere want ick ben met v, want ick sal alle die Heydenen vernielen, tot die welcke ick v wtghedreuen hebbe, maer v en sal ick niet vernielen, maer ick sal v castijden int ordeel, ende ick en sal v niet als den onnooselen sparen.