Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lij. Capittel.

1

⁺EEn sone van eenentwintich iaren was Sedecias doen hy begonste te regneren, ende elf iaren heeft hy gheregneert in Ierusalem, ende zijns moeders naem was Amital Ieremias dochter van Lobna.

+ A

2

Ende hy heeft quaet ghedaen in des Heeren ooghen nae alle tghene dat Ioacim ghedaen hadde.

3

Want des Heeren rasende gramscap was in Ierusalem ende in Iuda tot dat hy die verwierp van zijnen aensichte, ende Sedecias is affghesceyden van den coninck van Babilonien.

4

Ende tis ghesciedt int neghenste iaer van zijnen rijcke in die thienste maent, opden thiensten dach der maent, dat Nabugodonosor die coninck van Babilonien ghecomen is hy ende alle zijn heyr teghen Ierusalem, ende sij hebben die omleydt, ende sij hebben teghen haer bolwercken opghericht al rontsomme.

5

Ende die stadt heeft al om beleyt gheweest tot des conincs Sedecias elfste iaer.

6

⁺Maer in die vierde maent, opden neghensten dach der maent, soe heeft den hongher die stadt beuanghen, ende dat volck des lants en hadde gheen voetsel.

+ B

7

Ende die stadt is ghebroken gheweest, ende allen haer orloochs mannen zijn ghevloden, ende sijn wtghegaen vander stadt des nachts, doer den wech der poorten, die daer is tusschen die twee mueren, ende leydt tot des conincs hoff (biewijle dat die Chaldeen die stadt rontsomme beleyden) ende sij zijn wech ghegaen doer den wech die daer leydt in die woestijne,

8

ende der Chaldeen heyr heeft den coninck veruolcht, ende sij hebben Sedeciam ghegrepen in die woestijne, die daer is by Iericho, ende alle zijn gheselscap is van hem ghevloden.

[p. *628]

9

Ende doen sij den coninck gheuanghen hadden, soo hebben sij hem ghebracht totten coninck van Babilonien, in Reblatha, welck is int dlant van Emath, ende hy heeft tot hem ordeelen ghesproken.

10

Ende die coninck van Babilonien heeft Sedecias sonen ghedoodt voer zijn ooghen, ende hy heeft oock alle die princen van Iuda ghedoodt in Reblatha.

11

Ende hy heeft Sedecias ooghen wtghesteken, ende hem met veteren ghebonden, ende die coninck van Babilonien heeft hem ghebracht in Babilonien, ende hy heeft hem gesedt in des kerckers huys totten dach van sijnder doot.

12

Maer in die vierde maent, opden thienden dach der maent, dat is Nabugodonosors des conincs van Babilonien neghenthienste iaer, soo is Nabuzardan die prince der orloghen, die voer den coninck van Babilonien stont, ghecomen in Ierusalem.

13

⁺Ende hy heeft des Heeren huys aenghesteken, ende des conincs huys, ende alle die huysen van Ierusalem, ende alle groote huysen heeft hi metten viere verbrant.

+ C

14

Ende den gheheelen muer van Ierusalem rontsomme heeft dat heyr der Chaldeen dat metten capiteyn der orlooghen was, verdoruen.

15

Maer van die arme des volcs, ende van dat ouerghebleuen ghemeyn volck dat in die stadt ghebleuen was, ende van die vluchtighe die ouerghevloden waren totten coninck van Babilonien, ende tot die andere van die menichte, heeft Nabuzardan die prince der orloghen ouergheuoert.

16

Maer van die arme des lants heefter Nabuzardan die prince der orloghen ghelaten tot wijngaerders ende arkerlieden.

17

Ende die metalen columnen die in des Heeren huys waren, ende die Basementen, ende die metalen zee die in des Heeren huys was hebben die Chaldeen ghebroken, ende sij hebben alle dat metael van dien ghedraghen in Babilonien.

18

⁺Ende die metalen potten ende die vleesch crauwels, ende die psalter spelen, ende die scalen, ende die mortierkens, ende alle die metalen gheretscappen die inden dienst gheweest hadden, hebben sij wechghenomen,

+ D

19

ende die water cruycken, ende die vaten tot die ruecofferande, ende die scencbekers, ende die beckens, ende die kandelaers, ende mortieren, ende die croesen, alle die gulden waren, gulden, ende die silueren waren silueren heeft die capeteyn des heyrs ghenomen.

20

Twee columnen ende een zee twaelf metalen calueren, die onder die basementen waren die de coninck Salomon ghemaect hadde in des Heeren huys, daer en was gheen ghetal des ghewichts van alle dese vaten.

21

Maer van die columnen, waren achtien cubitus lingden in een columne, ende een zeelken van twaelf cubitus ghinck daer rontsomme, voerts was die dicte daer af van vier vingeren, ende binnen waren sij hol.

22

⁺Ende op beyde waren metalen capiteelen. Die hoochde van dat een capiteelken was van vijf cubitus, ende daer waren oock netekens ende granaet appelen op die croone int ronde, alle gader van metale. Desghelijcs waert ooc van die tweede columne, ende die granaet appelen.

+ E

23

Ende daer waren sessenneghentich granaet appelen nederwaerts hanghende, ende alle die hondert granaet appelen worden met nettekens omringhet.

24

Ende die oppervelt heere heeft ghenomen Saraiam den ierste priester, ende Sophoniam den tweede priester, ende drij bewaerders des portaels.

25

Ende wter stadt heeft hy ghenomen eenen ghesneden man die ghesedt was ouer die orloochs mannen, ende seuen mannen van die ghene die des conincs aensicht saghen, die in die stadt gheuonden zijn, ⁺ende den scrijuer den prince der chryschknechten, die de nieuwe ruyters proefde, ende tsestich mannen van den volcke des lants, die gheuonden sijn int midden der stadt.

+ F

26

Ende Nabuzardan die opperveltheere heeftse ghenomen, ende gheleydt totten coninck van Babilonien in Reblatha.

27

Ende die coninck van Babilonien heeftse gheslaghen ende ghedoodt in Reblatha int lant van Emath, ende Iuda is wech gheuoert wt zijnen lande.

28

Dit is tvolck dwelck Nabugodonosor ouergheuoert heeft, int seuenste iaer, drij duysent ende drijentwintich Ioden.

29

Int achtienste iaer van Nabugodonosor van Ierusalem acht hondert ende drijendertich zielen.

30

Int drijentwintichste iaer van Nabugodonosor heeft Nabuzardan die prince der orloghen ouerghevoert seuenhondert, ende vijfenveertich Ioden zielen, aldus waren alle die zielen vier duysent ses hondert.

31

Ende tis ghesciedt int seuen ende dertichste iaer des ouervoerens van Ioachin den coninck van Iuda, ⁺in die twaelfste maent, op den vijuentwintichsten dach der maent, dat Euil-merodach die coninck van Babilonien int selfde iaer zijns rijcs opghehauen heeft Ioacin des conincs van Iuda hooft, ende hy heeft hem gheleydt wt des kerckers huys.

+ G

32

Ende hy heeft met hem goet ghesproken, ende hy heeft zijnen throon ghestelt bouen die throonen der coninghen die by hem waren in Babilonien.

33

Ende hy heeft sijns kerkers cleederen verandert, ende hy adt altijt broot voer hem alle die daghen zijns leuens.

34

Ende zijn spijsen waren eewighe spijsen die hem ghegheuen werden van den coninck van Babilonien ghestelt tot elcken daghe besonder, totten daghe sijnder doot alle die daghen zijns leuens.