Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliij. Capittel.

1

⁺ENde tis ghesciet doen Ieremias voldaen hadde sprekende tot dat volck alle die woorden des Heeren haerlieder God, om die welcke hem die Heere haerlieder Godt tot hen ghesonden hadde, alle dese woorden,

+ A

2

soo heeft gheseyt Azarias Iosias sone, ende Iohanan Caree sone, ende alle die hoouerdighe mannen segghende tot Ieremiam. Ghi spreect een logene, die Heere onse God en heeft v niet ghesonden segghende. En gaet niet in Egipten om daer te woonen,

3

Maer Baruch Nerias sone verwect v teghen ons, om dat hy ons leueren soude inder Chaldeen hant dat hy ons dooden soude, ende doen oueruoeren in Babilonien.

4

⁺Ende Iohanan Caree sone, ende alle die princen der orloochscher mannen ende alle tvolc en hebben des Heeren stemme niet ghehoort dat sij blijuen souden int landt van Iuda,

+ B

5

Maer Iohanan Caree sone ende alle die princen der orloochs mannen nemende alle die van die bleuelinghen van Iuda waren, die weder ghekeert waren van alle die Heydenen, tot die welcke sij te voren verstroeyt hadden gheweest, dat sij int lant van Iuda woonen souden,

6

die mannen ende vrouwen ende cleyn kinderen, ende des conincs dochters, ende alle die zielen die Nabuzardan die capeteyn des heyrs ghelaten hadde met Godolia den sone Ahicams des soons Saphan, ende Ieremiam den propheet ende Baruch Nerias sone.

7

⁺Ende sij zijn in dlant van Egipten ghegaen, want sij en hebben des Heeren stemme niet onderdanich gheweest, ende sij sijn ghecomen tot Taphnis toe,

+ C

8

ende dwoort des Heeren is gesciet tot Ieremiam in Taphnis seggende.

9

Neemt groote steenen in v hant, ende ghy sultse berghen inden crocht die daer is onder den muer van ghebacken steenen ghemaect in die poorte van Pharaos huys in Taphnis, daert die Ioetsche mannen sien.

10

Ende ghy sult tot henlieden segghen. Dit seyt die Heere der heyrscaren Israels Godt. Siet ick sal seynden, ende tot my nemen Nabugodonosor den coninc van Balilonien mijnen knecht ende ick sal sijnen throon stellen op dese steenen die ick gheborghen hebbe, ende hi sal sijnen rijckstoel daer op setten.

11

⁺Ende hy sal comende dlant van Egipten slaen, die ter doot ghescict zijn, ter doot, ende die ter geuanghenissen ghescict sijn, ter gheuanghenissen, ende die ten sweerde ghescict sijn, ten sweerde.

+ D

12

Ende hy sal tvier ontsteken in die tempelen der affgoden van Egipten, ende hy salse verbranden, ende hy salse gheuanghen leyden, ende dlant van Egipten sal ouerdect worden, ghelijck een herder ouerdect wort met sijnen mantel, ende hy sal daer wt ghaen met vrede.

13

Ende hy sal der afgoden beelden breken vander sonnen huys die in dlant van Egipten sijn, ende die tempels der affgoden van Egipten sal hy metten viere verbranden.