Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliiij. Capittel.

1

⁺DWoort datter ghedaen is tot Ieremiam, tot alle die Ioden die int lant van Egipten woonden, woonende in Magdalo, ende in Taphnis, ende in Memphis, ende int lant van Phatures segghende.

+ A

2

Dit seyt die Heere der heyrscaren Israels Godt. Ghy hebt alle dit quaet ghesien, dat ic op Ierusalem ghebrocht hebbe, ende op alle die steden van Iuda, ende siet sij sijn heden verwoest, ende in hen en is gheen bewoonder,

3

om die quaetheyt die si ghedaen hebben, dat sij my tot gramscappen verwecken souden, ende souden gaen ende sacrificie doen ende dienen den vreemden goden, die welcke noch ghi noch v lieder vaderen niet en kenden.

4

Ende ick heb tot v lieden gesonden alle mijn knechten die propheten des snachts opstaende ende sendende, ende segghende. En wilt het woort van aldusdanighe affgrijselijcheyt niet doen, die ick gehaet hebbe.

5

Ende sij en hebben niet ghehoort, ende si en hebben hen oore niet gheneycht dat sij hen bekeeren souden van hen quaetheden, ende dat sij den vreemden goden niet en souden sacrificie doen.

6

Ende mijn verbolghentheyt ende mijnen rasenden torn is tsamen ghestort, ende is ontsteken in die steden van Iuda, ende in die straten van Ierusalem, ende si sijn tot een woestijne verkeert, ende een verderffenisse, ghelijck desen dach is.

7

⁺Ende nv dit seydt die Heere der heyrscharen Israels Godt. Waerom doet ghy dat groot quaet teghen v zielen, dat van v lieden vergaen soude man ende vrouwe, die cleyn kinderen, ende die suyghelinghen, wt dat midden van Iuda, ende dat v lieden gheen ouerblijfsel achterghelaten en werde.

+ B

8

Creytende my door die wercken van v lieder handen, sacrificie doende den vreemden goden, int lant van Egipten, daer ghy in ghegaen sijt om daer te woonen, ende daer heel vernielt te worden, ende dat ghy wesen soudt tot een vermalendijdinghe, ende tot een bescimpinghe alle den Heydenen der eerden?

9

Hebdy vergheten uwer vaderen quaetheden, ende der coninghen van Iuda, ende tquaet van zijn huysvrouwen ende v quaden, ende uwer huysvrouwen quaet die si ghedaen hebben in dlant van Iuda, ende in die contreyen van Iherusalem?

10

Sij en sijn niet ghesuyuert gheweest tot op desen dach toe, ende sij en hebben niet gheureest, ende sij en hebben in des Heeren wet niet ghewandelt ende in mijn gheboden die ick ghegheuen hebbe voor v lieden ende voor v lieder vaderen.

11

Daerom dit seyt die Heere der heyrscaren Israels Godt. Siet ick sal mijn aensicht teghen v lieden stellen int quaet, ende ick sal gheheel Iuda verderuen,

12

ende ick sal die bleuelinghen van Iuda nemen, ⁺die hen aensichten ghestelt hebben dat sij int lant van Egipten gaen souden, ende daer woonen, ende sij sullen alle vernielt worden int lant van Egipten, sij sullen vallen doort sweert, ende door den hongher, ende sij sullen verdaen worden vanden minsten totten meesten, doort sweert ende door den hongher sullen sij steruen, ende sij sullen wesen tot eenen eedt, ende tot een myrakele, ende tot een vermalendijdinghe, ende tot een versmaetheyt.

+ C

13

Ende ic sal des lants van Egipten bewoonders besoecken, ghelijc ic versocht hebbe op Ierusalem metten sweerde, hongher, ende pestilencie.

14

Ende daer en sal niemant wesen diet ontuliede, ende ouer-

[p. *621]

blijue vander Ioden bleuelinghen die gaen om vreemdelinghen te sijne int lant van Egipten, ende weder te keeren int lant van Iuda, tot dat welc sij hen zielen opheffen, dat si wederkeeren souden ende aldaer woonen. Si en sullen niet wedercomen dan die ghene die vlieden.

15

⁺Ende alle die mannen hebben Ieremie gheantwoort wetende dat hen huysvrouwen den vreemden goden dienden, ende alle die vrouwen der welcker een groote menichte daer stont, ende alle tvolc der gheender die daer woonden int lant van Egipten in Phatures segghende.

+ D

16

Het woort dat ghy tot ons ghesproken hebt in des Heeren naem en sullen wij van v niet hooren,

17

maer wij sullen doende doen alle dwoort dat wt onsen mont comen sal, op dat wi sacrificie mogen doen der coninginnen des hemels, ende dat wij haer moghen dranc offerande offeren, gelijc wij ende onse vaderen, onse coningen, ende onse princen ghedaen hebben in die steden van Iuda, ende in die straten van Ierusalem, ende wij sijn versaedt gheweest met brooden ende ons was wel, ende wij en hebben gheen quaet ghesien.

18

Maer van dien tijde dat wij hebben opghehouden der coninghinnen des hemels sacrificie te doen, ende haer drancofferanden te offeren, soo lijden wij ghebrec van alles, ende wij zijn vernielt gheweest metten sweerde, ende met den hongher.

19

⁺Maer ist dat wij der coninghinnen des hemels sacrificie doen, ende haer drancofferanden offeren, hebben wij haer sonder onse mans vladen ghemaect, om haer te dienen, ende drancofferanden te offeren?

+ E

20

Ende Ieremias heeft geseyt tot alle tvolc teghen die mannen, ende teghen die vrouwen, ende teghen alle dat gemeyn volc, die hem dit woort geantwoort hadden, seggende.

21

En ist niet die offerande die ghi gheoffert hebt in die steden van Iuda, ende die straten van Ierusalem, ghy ende v vaderen, v coninghen, ende v princen, ende tvolc des lants, is die Heere deser ghedachtich gheworden, ende ist op sijn herte gheclommen?

22

Ende die Heere en mochts voorts niet meer draghen, om die boosheyt uwer beneerstingen, ende om die affgrijselijcheden die ghy ghedaen hebt, ende v lant is gheworden tot een verwoestinghe, ende tot een verwonderinghe, ende tot een vermalendijdinghe om datter gheen inwoonder en is, ghelijc desen dach is.

23

⁺Om dat ghy den affgoden sacrificie ghedaen hebt, ende den Heere ghesondicht hebt, ende des Heeren stemme niet ghehoort en hebt, ende dat ghy in zijn wet, ende in sijn gheboden ende in sijn ghetuyghenissen niet ghewandelt en hebt, daerom sijn v dese quade dinghen ghesciet, ghelijc desen dach is.

+ F

24

Ende Ieremias heeft gheseyt tot alle den volcke, ende tot alle die vrouwen. Hoort des Heeren woort gheheel Iuda die int lant van Egipten sijt.

25

Dit spreect die Heere der heyrscaren Israels Godt segghende. Ghy ende v huysvrouwen hebbet met uwen monde ghesproken ende met uwen handen volbracht seggende. Laet ons onse beloften doen die wij beloeft hebben, dat wy sacrificie doen souden der coninghinnen des hemels, ende laet ons haer drancofferanden offeren ghy hebt uwe beloften volbracht, ende ghy hebt die metten wercken voldaen.

26

Daerom hoort des Heeren woort gheheel Iuda die int lant van Egipten woont. Siet ick hebbe gesworen by mijnen grooten naem, seyt die Heere dat mijnen naem voorts niet meer en sal ghenoemt worden wt den mont van een ieghelijc Ioetsch man seggende. ⁺Die Heere Godt leeft in alle dlant van Egipten.

+ G

27

Siet ick sal op hen wacker wesen ten quade ende niet ten goede, ende alle die mannen van Iuda die int lant van Egipten sijn, sullen vernielt worden metten sweerde ende metten hongher, tot dat sij heel te niet worden.

28

Ende soo wie tsweert vlieden, die sullen wederom keeren van dlant van Egipten int lant van Iuda een luttel mannen, ende alle die bleuelinghen van Iuda van die ghene die int lant van Egipten gaen, om daer te woonen, sullen weten wiens woort dat volbracht sal worden, het mijne oft het hare.

29

Ende dits v een teeken, seyt die Heere, dat ick besoecke op v lieden in dese plaetse, op dat ghy weten moecht dat mijn woorden warachtelijck sullen volbracht worden teghen v lieden int quade.

30

Dit seyt die Heere. Siet ic sal Pharao Ephree den coninc van Egipten leueren in sijnder vianden hant, ende in die hant der gheender die sijn ziele soecken, ghelijc ic Sedeciam den coninc van Iuda gheleuert hebbe in die hant van Nabugodonosor den coninck van Babilonien sijnen viant, ende die sijn ziele soeckende was.