Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlij. Capittel.

1

⁺ENde alle die princen der strijdtbaerder mannen, ende Iohanan Caree sone, ende Iezonias Ozaias sone, ende het ander gemeyn volc vanden cleynen totten grooten sijn sij ghecomen

+ A

2

ende hebben geseyt tot Ieremiam den prophete. Laet ons gebedt vallen voor v aensicht, ende bidt voor ons den Heere uwen God, voor alle dese bleuelinghen, want wij luttel sijn ouergebleuen van seer vele, ghelijc v oogen ons aensien.

3

Ende die Heere v God vercondige ons eenen wech door den welcken wij reysen moghen, ende dwoort dat wij doen moghen.

4

Ende Ieremias die prophete heeft tot henlieden geseyt. Ic hebt gehoort. Siet ic bidde tot den Heere uwen God nae uwe woorden, alle dwoort dat hi mi antwoorden sal, dat sal ick v lieden te kennen gheuen ende ick en sal niet voor v lieden verborghen.

5

Ende sij hebben gheseyt tot Ieremiam. Die Heere si tusschen ons een ghetuyghe der waerheyt, ende des gheloofs, ist sake dat wij alle dwoort, waer mede dat die Heere v God v seynden sal tot ons, also niet en doen.

6

T sij oft goet sij, oft quaet, wij sullen der stemmen des Heeren ons Gods totten welcken wij v seynden onderdanich wesen, op dat ons wel sij als wij die stemme des Heeren ons Gods ghehoort sullen hebben.

7

⁺Ende doender thien daghen ouerleden waren, soo is des Heeren woort ghesciet tot Ieremiam.

+ B

8

Ende hy heeft gheroepen Iohanan Caree sone ende alle die princen der orloochscher mannen die met hem waren, ende tgheheel volck vanden minsten totten meesten.

9

Ende hy heeft tot hen gheseyt. Dit seyt die Heere Israels Godt totten welcken ghy my ghesonden hebt, dat ic v lieder ghebeden nederstorten soude in sijn aensicht

10

Ist dat ghy rustende blijft in dit lant, soo sal ick v lieden stichten, ende niet verderuen, ic sal v planten ende niet wtroeyen, want ic ben nv te vreden ghestelt van tquaet dat ick v lieden ghedaen hebbe.

11

En wilt niet vreesen van des conincs van Babilonien aensicht, den welcken ghy veruaert sijnde ontsiet, en wilt hem niet ontsien, seyt die Heere, want ick ben met v lieden om v te behouden, ende te verlossen wt zijn hant,

12

ende ick sal v lieden bermherticheden gheuen, ende ick sal v lieder ontfermen, ende ick sal v doen woonen in v lant,

13

Maer ist dat ghy lieden seght. Wij en sullen in dit lant niet woonen, noch wij en sullen des Heeren ons Godts stemme niet hooren,

14

segghende. ⁺Gheensins, maer wi sullen totten lande van Egipten reysen daer en sullen wij gheen orloghen sien, noch tgheclanck van dat trompet hooren, ende gheenen hongher lijden, ende daer sullen wij woonen.

+ C

15

Daerom hoort nv des Heeren woort ghy bleuelinghen van Iuda. Dit seyt die Heere der heyrscaren Israels God. Ist dat ghy v aensicht steldt om te gaen in Egipten, ende dat ghy daer inghaet om daer te woonen,

16

soo sal het sweert dat ghy ontsiet v lieden daer beuanghen int lant van Egipten, ende den hongher daer ghy voor sorchuuldich zijt sal v lieden aencleuen in Egipten, ende ghy sult daer steruen,

17

ende alle die mannen die hen aensicht stellen dat si in Egipten gaen souden, om daer te woonen die sullen steruen metten sweerde ende hongher ende pestilencie, daer en sal niemant van hen lieden ouer blijuen nocht ontulieden van daensicht des quaets, dat ick op hen aenbrenghen sal

18

want dit seyt die Heere der heyrscaren Israels Godt Ghelijc mijnen rasenden torn, ende mijn verbolghentheyt tsamen ghegoten is op die inwoonders van Ierusalem

[p. *620]

⁺alsoo sal mijn verbolghentheyt tsamen ghegoten worden op v lieden als ghy sult in Egipten ghegaen sijn, ende ghi sult wesen tot eenen eedt, ende tot verwonderinghe ende tot vermalendijdinghe, ende tot verwijdt, ende ghi en sult voorts aen dese plaetse geensins meer sien.

+ D

19

Dwoort des Heeren op v lieden ghy bleuelinghen van Iuda. En wilt in Egipten niet gaen. Ghy sullet wetende weten, dat ick v lieden heden betuycht hebbe

20

dat ghy v zielen bedroghen hebt, want ghy hebt my ghesonden totten Heere onsen Godt segghende. Bidt voor ons totten Heere onsen Godt, ende nae alle dat die Heere onse God v sal segghen alsoo vercondicht ons, ende wij sullent doen.

21

Ende ick hebt v heden vercondicht, ende ghy en hebt die stemme des Heeren ws Gods niet gehoort, ouer alle die dinghen waerom dat hi my aen v lieden ghesonden heeft.

22

Daerom suldy nv wetende weten, dat ghy metten sweerde, honghere, ende pestilencie steruen sult in die plaetse daer henen ghy hebt willen gaen, dat ghi daer woonen soudt.