Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xli. Capittel.

1

⁺ENde tis ghesciet in die seuenste maent, dat Ismael die sone Nathanie des soons Elisama vant coninclijc saet is ghecomen ende die edelste des conincs, ende thien mannen met hem tot Godoliam Ahicams sone in Masphath, ende si hebben daer te samen brooden gheten in Masphath,

+ A

2

Maer Isamel Nathanias sone is opghestaen, ende die thien mannen die met hem waren, ende sij hebben Godoliam den sone Ahicam Saphans sone gheslaghen metten sweerde, ende sij hebben hem verslaghen, den welcken die coninc van Babilonien ouer dlant ghestelt hadde

[p. *619]

3

Ende alle die Ioden die met Godolia waren in Masphath, ende die Chaldeen die daer gheuonden waren, ende die orloochsche mannen heeft Ismahel verslagen

4

Maer opden tweeden dach nae dat hy Godoliam dootgheslaghen hadde, alst noch niemant en wiste,

5

soo zijn daer mannen ghecomen van Sichem, ende van Silo, ende van Samarien, tachtentich mannen met affghescoren baerden ende ghescoorde cleederen, ende mismaect van aensicht, ende si hadden ghiften ende wierooc in hen hant dat sij die offeren souden in des Heeren huys.

6

⁺Hierom is Ismahel Nathanias sone wtghegaen hem te ghemoete van Masphath gaende ende weenende ghinc hi, ende als hy hen te ghemoete ghecomen was soo heeft hy tot hem gheseyt. Coemt tot Godoliam Ahicams sone.

+ B

7

Ende doen si ghecomen waren tot dat midden vander stadt, so heeftse Ismahel Nathanias sone ghedoodt, omtrent die middel vanden poele, hy ende die mannen die met hem waren.

8

Maer daer sijn thien mannen onder henlieden gheuonden die tot Ismahel geseyt hebben. En wilt ons niet dooden, want wi hebben scatten in eenen acker van tarwe ende gherste, ende olie, ende honich. Ende hi heeft opghehouden, ende hy en heeftse niet gedoodt met haren broeders,

9

ende den poel daer Ismahel alle die doode lichamen der mannen ingheworpen heeft, die hy gheslaghen hadde om Godoliams wille, is den ghenen die Asa die coninck ghemaect heeft om Baasa den coninck van Israel, desen heeft Ismahel Nathanias sone met den gedoodden gheuult.

10

⁺Ende Ismahel heeft alle die bleuelinghen des volcs gheuanghen gheleydt die in Masphath waren, des conincs dochters, ende alle tvolc dat in Masphath ghebleuen was, die Nabuzardan die capeteyn des heyrs beuolen hadde Godolie Ahicams sone, ende Ismahel Nathanias sone heeftse gheuanghen ghenomen, ende hy is wechgegaen dat hy ouertrecken soude tot die kinderen van Ammon.

+ C

11

Ende Iohanan Caree sone heuet ghehoort, ende alle die princen der orloochscher mannen die met hem waren, alle tquaet dat Ismahel Nathanias sone ghedaen hadde.

12

Ende mede ghenomen hebbende alle die mannen, sijn sij ghereyst, dat sij strijden souden teghen Ismahel Nathanias sone, ende sij hebben hem gheuonden by veel wateren, die in Gabaon sijn.

13

Ende als alle tvolc dat met Ismahel was Iohanan Caree sone ghesien hadden, ende alle die princen der orloochscher mannen die met hem waren, so sijn si verblijt gheweest.

14

Ende alle tvolc dat Ismahel in Masphath gheuanghen hadde is wederghekeert, ende wedergekeert sijnde ist wechgheghaen tot Iohanan Caree sone,

15

⁺Maer Ismahel Nathanias sone is gheuloden met acht mannen van Iohanans aensicht, ende is wechghegaen tot die kinderen van Ammon.

+ D

16

Aldus heeft Iohanan Caree sone, ende alle die princen der orloochscher mannen die met hem waren ghenomen alle die bleuelinghen des ghemeynen volcs, die sij wederom ghebracht hadden van Ismahel Nathanias sone van Masphath nae dat hy Godoliam Ahicams sone gheslaghen hadde, stercke mans te strijden, ende vrouwen ende kinderen, ende ghesneden camerlinghen die hy wederom ghebracht hadde van Gabaon.

17

Ende sij sijn wechghegaen, ende sijn neder gheslaghen vreemdelinghen in Chamaam, welck is by Bethlehem, dat sij voorts reysen souden ende gaen in Egipten vander Chaldeen aensicht,

18

want sij ontsaghen hen, om dat Ismahel Nathanias sone Godoliam Ahicams sone doot gheslaghen hadde, den welcken die coninc van Babilonien ouerste gemaect hadde int lant van Iuda.