Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xl. Capittel.

1

⁺DWoort dat ghesciet is tot Ieremiam vanden Heere nae dat hy vrij ghelaten was van Nabuzardan den capeteyn des heyrs van Rama, als hy hem ghehaelt heeft met ketenen ghebonden int midden van allen die ghene die ouer reysden van Ierusalem ende Iuda, ende gheleyt worden in Babilonien.

+ A

2

Hierom die prince des heyrs nemende Ieremiam heeft tot hem gheseyt. Die Heere v God heeft dit quaet ghesproken op dese plaetse,

3

ende die Heere heeft dat ooc aengebracht ende ghedaen ghelijc hy ghesproken heeft, want ghy hebt den Heere ghesondicht, ende ghy en hebt sijn stemme niet ghehoort, ende dit woort is v lieden ghesciet.

4

Daerom siet nv ick heb v heden ontbonden vanden ketenen die aen v handen zijn, ist dat v belieft dat ghy met my coemt in Babilonien soo coemt, ende ick sal mijn ooghen op v stellen, maer ist dat v mishaecht met my te comen in Babilonien, soo blijft hier, siet alle dlant is voor v aenschijn, wat ghy verkiest, ende werwaerts dat v belieft te gaen derwaerts reyst.

5

⁺Ende en wilt met my niet comen, maer woont bi Godoliam den sone van Ahicam den sone Saphan den welcken die coninc van Babilonien ouer die steden van Iuda ghesteldt heeft, daerom woont met hem int midden des volcs oft waer dat v belieft te gaen, daer gaet. Ende die capeteyn des heyrs heeft hem oock spijse ende ghiftkens ghegheuen, ende heeft hem laten gaen.

+ B

6

Ende Ieremias is ghecomen tot Godoliam Ahicams sone in Masphath ende hy heeft met hem ghewoont int midden des volcs, datter ghelaten was int lant.

7

Ende doen alle die princen des heyrs die verstroeyt hadden gheweest door die lantscappen, si ende hen ghesellen gehoort hadden dat die coninck van Babilonien Godoliam Ahicams sone ghesteldt hadde ouer dlant, ende dat hy hem die mannen, ende vrouwen, ende cleyn kinderen ende van des lants armen beuolen hadde die in Babilonien niet ouer gheuoert en waren,

8

soo sijn si ghecomen tot Godoliam in Masphath, ende Ismahel Nathanias sone, ende Iohanan, ende Ionathan die sonen van Caree, ende Sareas Thanehumeths sone, ende die kinderen van Ephi, die van Netophati waren, ende Iezonias die sone Maachati, sij ende hen mannen.

9

⁺Ende Godolias die sone Ahicam des soons Saphan heeft hen ende haren medeghesellen ghesworen seggende. En wilt niet vreesen den Chaldeen te dienen, woont int lant, ende dient den coninc van Babilonien, ende v sal wel sijn.

+ C

10

Siet ic woone in Masphath, dat ick mach antwoorden der Chaldeen ghebode die tot ons ghesonden worden, maer vergadert ghilieden die wijnsnijdinghe, ende den oochst, ende die olie, ende sluyt dat op in v lieder vaten, ende blijft in v steden, die ghy houdt,

11

Maer oock alle die Ioden die daer waren in Moab, ende onder die kinderen van Ammon, ende in Idumeen, ende in alle die lantscappen ghehoort hebbende dat die coninc van Babilonien bleuelinghen ghelaten hadde int Ioetsche lant, ende dat hy ouer hen ghesteldt hadde Godoliam den sone Ahicam des soons Saphan,

12

soo sijn (seg ic) ⁺alle die Ioden weder ghekeert van alle die plaetsen daer sij henen gheuloden waren, ende sij sijn ghecomen int lant van Iuda tot Godoliam in Masphath, ende sij hebben den wijn vergadert, ende wtermaten grooten oochst.

+ D

13

Maer Iohanan Caree sone, ende alle die princen des heyrs die verstroeyt hadden gheweest in die lantscappen, sijn ghecomen tot Godoliam in Masphath,

14

ende sij hebben hem gheseyt. Weet dat Baalis die coninck van die kinderen van Ammon heeft ghesonden Ismael Nathanias sone om v ziele te slaen. Ende Godolias Ahicams sone en heeft hen niet ghelooft.

15

Maer Iohanan Caree sone heeft gheseyt tot Godoliam besijden in Masphath sprekende. Ic sal gaen, ende verslaen Ismael Nathanias sone sonder iemants weten, dat hy v ziele niet en verslae, ende dat alle die Ioden verstroeyt werden die tot v verghadert sijn, ende soo sullen alle die bleuelinghen van Iuda vergaen.

16

Ende Godolias Ahicams sone heeft gheantwoort tot Iohanan Caree sone. En wilt dit woort niet doen, want ghy spreect valschelijc van Ismael.