Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺INt neghenste iaer van Sedecias den coninc van Iuda in die thienste maent, is ghecomen Nabugodonosor die coninc van Babilonien ende alle zijn heyr tot Ierusalem, ende si belaghen die,

+ A

2

Ende int elfste iaer van Sedecias in die vierde maent, opden vijfsten dach der maent, is die stadt open ghedaen.

3

Ende alle des conincs van Babilonien princen zijn daer binnen ghegaen, ende hebben gheseten in die middelste poorte Neregel, Sereser, Semegarnabu, Sarsachim, Rabsares, Neregel, Sereser, Rebmag ende alle die ander princen des conincs van Babilonien.

4

Ende doen Sedecias die coninc van Iuda ende alle die strijdtbaere mannen hen ghesien hadden, zijn si gheuloden, ende sij zijn des nachts wtghegaen wt der stadt, door den wech van des conincs hof, ende door die poorte die tusschen twee mueren was, ende sij zijn wtghegaen door den wech der woestijnen.

5

⁺Ende het heyr der Chaldeen heeftse veruolcht, ende si hebben Sedeciam gheuanghen int velt der woestijnen van Iericho, ende hebben hem gheuanghen ghebracht tot Nabugodonosor den coninck van Babilonien in Reblatha, welck is int landt van Emath, ende hy heeft tot

+ B

[p. *618]

hem ordeelen ghesproken.

6

Ende die coninc van Babilonien heeft Sedecias sonen gedoot in Reblatha voor sijn ooghen, ende alle die edele van Iuda heeft die coninc van Babilonien ghedoot.

7

Ooc heeft hy Sedecias ooghen wtghesteken, ende hy heeft hem met veteren ghebonden, dat hy in Babilonien soude gheleyt worden.

8

⁺Ende des conincs huys ende het huys van tgemeyn volc hebben die Chaldeen metten viere verbrant, ende den muer van Ierusalem hebben si omgheworpen.

+ C

9

Ende die bleuelinghen des volcs die in die stadt ghebleuen waren, ende die ouergheulodene die tot hem ouerghetrocken waren, ende die ouertallighe vanden ghemeynen volcke die daer ouer ghebleuen waren, heeft Nabuzardan die capeteyn der ruyters in Babilonien ouergeuoert.

10

Ende van tghemeyn arm volc die niet met allen en hadden heeft Nabuzardan die capeteyn des rosuolcs int lant van Iuda ghelaten, ende hy heeft hen wijngaerden ende putten ghegheuen op dien dach.

11

Ende Nabugodonosor die coninc van Babilonien hadde gheboden van Ieremias Nabuzardan den capeteyn der ruyters, segghende.

12

Neemt hem, ende stelt v oogen op hem ende en doet hem gheen quaet, maer soo hy wilt, also doet hem.

13

⁺Aldus heeft Nabuzardan de capiteyn der ruyters ghesonden ende Nabusezbaz, ende Rebsares, ende Neregel, ende Sereser, ende Rebmag, ende alle die edelste des conincs van Babilonien

+ D

14

hebben ghesonden ende ghenomen Ieremiam wt dat portael des kerckers, ende hebben hem gheleuert Godolie den sone Ahicam des soons Saphan, dat hy in sijn huys gaen soude ende woonen onder tvolck,

15

Maer tot Ieremias was des Heeren woort ghesciet doen hi gesloten was int portael des kerckers seggende.

16

Gaet henen ende segt Abdemelech den Moriaen seggende. Dit seyt die Heere der heyrscaren Israels God. Siet ick sal mijn woorden brenghen op dese stadt, ten quade ende niet ten goede, ende sij sullen voor v aensicht sijn op dien dach.

17

Ende ic sal v verlossen in dien dach, seyt die Heere ende ghy en sult niet gheleuert worden in die handen der mannen die ghy ontsiet,

18

maer verlossende sal ic v verlossen, ende ghy en sult metten sweerde niet vallen, maer v ziele sal v ter salicheyt wesen, om dat ghy in my hebt betrouwen ghehadt, seyt die Heere.