Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺MAer Saphatias Mathans sone ende Gedelias Phassurs sone, ende Iuchal Selemias so-

+ A

[p. *617]

ne, ende Phassur Melchias sone hebben ghehoort die redenen die Ieremias sprac tot alle tvolck segghende.

2

Dit seyt die Heere. Soo wie dat in dese stadt blijft die sal steruen metten sweerde, ende door den hongher, ende door die pestilencie, maer soo wie dat wt vliedt tot die Chaldeen die sal leuen, ende zijn ziele sal ghesont zijn ende leuende.

3

Dit seyt die Heere. Leuerende sal dese stadt gheleuert worden in die hant van des conincs van Babilonien heyr, ende hy sal die innemen.

4

Ende die princen hebben den coninc gheseyt. Wij bidden datmen desen man doode, want door een listich opset maect hy der strijdender mannen handen onmachtich, die in dese stadt ghebleuen zijn, ende alle des volcs handen, sprekende tot hen nae dese woorden, want voorwaer dese man en soect desen volck gheenen vrede, maer quaet.

5

⁺Ende die coninc Sedecias heeft gheseyt. Siet hy is in uwe handen, want ten is niet behoorlijc dat die coninc v lieden iet soude weygheren.

+ B

6

Hierom hebben si Ieremiam ghenomen ende hebben hem gheworpen inden put van Melchias Amelechs sone, die in dat voorbucht des kerkers was ende si hebben Ieremiam nederghelaten met zeelen in den put daer gheen water in en was, maer slijck, aldus is Ieremias nederghedaelt int slijck.

7

Ende Abdemelech die Moriaen een ghesneden camerlinc die in des conincs huys was, heeft ghehoort, dat si Ieremiam inden put gheworpen hadden. Maer die coninc sadt in Beniamins poorte.

8

Ende Abdemelech is wtgegaen van des conincs huys, ende hy heeft totten coninc ghesproken segghende.

9

⁺Mijn heere die coninc, dese mannen hebben qualijck ghedaen al wat si ghedaen hebben teghen Ieremiam den prophete worpende hem inden put, dat hy daer van hongher steruen soude, want daer en zijn gheen brooden meer in die stadt

+ C

10

Aldus heeft die coninc Abdemelech den Moriaen gheboden segghende. Neemt met v van hier dertich mannen ende heft Ieremiam wten put, eer dat hy sterue.

11

Hierom Abdemelech met hem nemende dertich mannen is ghegaen in des conincs huys datter was onder die bottelrie, ende hij heeft van daer ghenomen oude lakenen ende oude dinghen die verrot waren, ende hy heeft die neder ghelaten tot Ieremiam met zeelkens.

12

Ende Abdemelech die Moriaen heeft gheseyt tot Ieremiam, legt dese oude lakenen ende dese gheschoorde ende verrotte dinghen onder die elleboghen van uwen handen, ende op die zeelen, ende Ieremias heeft alsoo ghedaen.

13

⁺Ende si hebben Ieremiam met zeelen wt ghetrocken, ende ghebrocht wt den put, ende Ieremias is ghebleuen in dat voorbucht des kerckers.

+ D

14

Ende die coninc Sedecias heeft ghesonden ende tot hem ghenomen Ieremiam den prophete tot in die derde doere die daer was in des Heeren huys, ende de coninc heeft tot Ieremiam gheseydt. Ic vraghe v een woort, en verberghet niet voor my,

15

Maer Ieremias heeft tot Sedeciam gheseyt. Ist sake dat ict v te kennen gheue, en suldi my dan niet dooden? ende ist dat ic v raet gheue, soo en suldi my niet hooren.

16

Hierom heeft Sedecias Ieremie al heymelijc ghesworen seggende. Soo warachtelijc als die Heere leeft die ons dese ziele gemaect heeft, ick en sal v niet dooden, noch leueren in die handen van dese mannen die v ziele soecken.

17

⁺Ende Ieremias heeft tot Sedeciam gheseyt. Dit seyt die Heere der heyrscaren Israels Godt. Ist dat ghi reysende wtgaet tot des conincs van Babilonien princen, soo sal v ziele leuen, ende dese stadt en sal metten viere niet verbrant worden, ende ghy sult behouden worden ende v huys.

+ E

18

Maer ist dat ghy niet wt en gaet tot des conincs van Babilonien princen, soo sal dese stadt gheleuert worden inder Chaldeen handen, ende si sullen die metten vier verbranden, ende ghy en sult hen hant niet ontulieden.

19

Ende die coninc Sedecias heeft gheseyt tot Ieremiam. ⁺Ick ben besorgt om die Ioden die ouerghetrocken zijn tot die Chaldeen, dat ic by auontueren mocht gheleuert worden in hen handen, ende dat si my bespotten souden,

+ F

20

Maer Ieremias heeft gheantwoort. Sij en sullen v niet leueren. Hoort doch des Heeren stemme die ick tot v spreke, ende v sal wel zijn, ende v ziele sal leuen,

21

maer ist dat ghy niet en wilt wtgaen, soo is dit het woort dat my die Heere ghetoont heeft.

22

Siet alle die vrouwen die ouergebleuen zijn in des conincs van Iuda huys sullen wtgheleydt worden tot die princen des conincs van Babilonien, ende si sullen segghen. V vreedtsamighe mannen hebben v verleydt ende te machtich gheweest teghen v, si hebben v voeten int slijc ende in die slibberachtighe eerde ghesoncken, ende si zijn van v wech gheghaen.

23

Ende alle v huysvrouwen ende v kinderen sullen wtgheleydt worden tot die Chaldeen, ende ghi en sult haren handen niet ontulieden, maer ghy sult oock door des conincs van Babilonien hant gheuanghen worden, ende dese stadt sullen si metten vier verbranden.

24

Hierom heeft Sedecias gheseyt tot Ieremiam. ⁺En laet niemant dese woorden weten, ende ghi en sult niet steruen,

+ G

25

maer ist dat die princen hooren dat ick tot v ghesproken hebbe, ende dat si tot v comen ende v segghen. Gheeft ons te kennen wat ghy metten coninc ghesproken hebt, en willet voor ons niet verberghen, ende wij en sullen v niet dooden, ende wat die coninc met v ghesproken heeft.

26

Soo suldi tot henlieden segghen. Ic heb mijn ghebeden nederghestort voor den coninc, dat hy my niet wederom en soude doen leyden in Ionathans huys, ende dat ick daer steruen soude.

27

Hierom zijn alle die princen tot Ieremiam ghecomen, ende sij hebben hem gheuraecht, ende hy heeft hen gheseydt nae alle die woorden die hem die coninc gheseyt hadde, ende sij lieten aff van hem, want daer en was niet gehoort,

28

Maer Ieremias bleef int portael des kerckers, totten dach dat Ierusalem inghenomen was, ende tis ghebuert dat Ierusalem inghenomen worde.