Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvij. Capittel.

1

⁺ENde die coninc Sedecias Iosias sone heeft gheregneert voor Ieconias Ioacims sone, den welcken Nabugodonosor die coninc van Babilonien ghestelt heeft int lant van Iuda tot eenen coninck.

+ A

2

Ende hy ende zijn knechten ende tvolc des lants en heeft des Heeren woorden niet onderdanich gheweest, die hy ghesproken heeft in die hant van Ieremias den propheet.

3

Ende die coninc Sedecias heeft ghesonden Iuchal Selemias sone ende Sophoniam Maasias sone, den priester tot Ieremiam den propheete segghende. Bidt voor ons den Heere onsen Godt,

4

Ende Ieremias wandelde vrijlijc int midden des volcs, want si en hadden hem in die gheuanghenisse der kerkers niet ghesteken.

5

Aldus is Pharaos heyr ghetrocken wt Egipten, ende die Chaldeen die Ierusalem beleyden hoorende alsulcke tijdinghe, zijn van Ierusalem affghetrocken.

6

Ende des Heeren woort is tot Ieremiam den propheet ghesciet segghende.

7

⁺Dit seyt die Heere die Godt van Israel. Aldus suldi den coninck van Iuda segghen die v ghesonden heeft om my te vraghen. Siet Pharaos heyr dat wtghetrocken is tot uwer helpen sal wederom keeren in zijn lant in Egipten,

+ B

8

Ende die Chaldeen sullen wederom comen ende strijden teghen dese stadt, ende si sullen die innemen ende die metten vier verbranden.

9

Dit seydt die Heere. En wilt v zielen niet bedrieghen, segghende. Die Chaldeen sullen gaende wechgaen, ende die Chaldeen sullen van ons gaen, want si en sullen niet wech gaen.

10

Ende al waert oock dat ghy alle theyr der Chaldeen versloecht die teghen v strijden, ende datter van dien achter ghelaten worden eenighe ghewonde, die sullen elck wt hen tenten opstaen, ende si sullen dese stadt metten viere ontsteken.

11

Hierom doen der Chaldeen heyr wech gheghaen was van Ierusalem om Pharaos heyr,

12

Soo is Ieremias van Ierusalem wt ghegaen dat hy gaen soude int lant van Beniamin, ende dat hy daer die besittinge deylen soude inder borgers aenschouwen.

13

⁺Ende als hy ghecomen was tot Beniamins poorte, soo was daer poortier by boerten een ghenaemt Ierias die sone Selemie des soons Hananie, ende hy heeft Ieremiam den prophete aenueerdt segghende. Ghy vliedt tot die Chaldeen.

+ C

14

Ende Ieremias heeft gheantwoort. Tis loghen, ic en vliede tot die Chaldeen niet. Ende hy en heeft hem niet ghehoort, maer Ierias heeft Ieremiam ghegrepen, ende hem ghebracht tot die princen.

15

Waerom die princen ghestoort zijnde teghen Ieremiam hebben hem gheslaghen doen steken inden kercker die in Ionathan des scrijuers huys was, want hy was die ouerste van den kercker.

16

Aldus is Ieremias gheghaen int huys vanden poel ende in die gheuanghenisse, ende Ieremias heeft daer gheseten veel daghen,

17

Maer Sedecias die coninck sendende heeft hem doen halen, ende hy heeft hem in zijn huys int heymelijc gheuraecht ende gheseyt. Meyndy oock datter eenich woort is vanden Heere? Ende Ieremias heeft gheseyt. Iaet ⁺Ende hi seyde. In des conincs van Babilonien hant suldi gheleuert worden.

+ D

18

Ende Ieremias heeft gheseyt totten coninc Sedeciam. Wat heb ick v misdaen, ende uwen knechten, ende uwen volcke, dat ghi my in des kerckers huys ghesteken hebt?

19

waer zijn v lieder propheten die v lieden propheteerden ende seyden. Die coninc van Babilonien en sal op v lieden niet comen, ende op dit lant?

20

Daerom hoort nv (bid ic) mijn heere die coninc laet mijn ghebedt van weerden zijn in v aensicht, ende en sendt mi niet wederom in Ionathas des scrijuers huys dat ick daer niet en sterue.

21

Hierom heeft die coninc Sedecias gheboden dat Ieremias soude gheleuert worden in dat voorbucht des kerckers, ende datmen hem eenen wronc broots gheuen soude alle daghe, sonder die toespijse, tot dat alle die brooden vander stadt soude verteert zijn, ende Ieremias is gebleuen in die voorbucht des kerckers.