Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺ENde tis ghesciet int vierde iaer van Ioacim Iosias sone den coninck van Iuda, dat dit woort ghedaen is gheweest tot Ieremiam vanden Heere segghende.

+ A

2

Neemt eenen scrijf boec ende ghy sult daer in scrijuen alle die woorden die ick v ghesproken hebbe teghen Israel ende Iudam, ende teghen alle die Heydenen, vanden dach dat ick tot v ghesproken hebbe, van Iosias daghen tot op desen dach toe.

3

Oft by auontueren het huys van Iuda hoorende alle tquaet dat ick dencke hen te doene, wilde wederkeeren een ieghelijck van sijnen alderquaetsten wech, ende ick sal haer boosheyt ghenadich wesen, ende haerder sonde.

4

Hierom heeft Ieremias gheroepen Baruch Nerias sone, ende Baruch heeft wt Ieremias mont ghescreuen alle des Heeren woorden, die hy tot hem ghesproken heeft in eenen scrijfboec.

5

⁺Ende Ieremias heeft Baruch beuolen seggende. Ic ben ghesloten, ende ick en mach in des Heeren huys niet gaen,

+ B

6

Daerom gaet ghi daer in, ende leest wten boeck die ghy ghescreuen hebt wt mijnen monde die woorden des Heeren daert het volck hoore in des Heeren huys, inden dach des vastens, daer bouen oock dattet gheheel Iuda hoore die van haren steden comen ghy sullet hen lesen,

7

Oft bi auontueren hen ghebedt vallen mocht voor Gods aensicht, ende dat een ieghelijck wederom keerde van sijnen quaetsten wech, want die rasende gramscap ende die verbolghentheyt is groot die de Heere ghesproken heeft teghen dit volck,

8

Ende Baruch die sone Nerie heeft ghedaen nae alle tghene dat hem Ieremias die propheet gheboden hadde lesende wten boecke des Heeren woorden in des Heeren huys.

9

Ende tis ghesciet int vijfste iaer van Ioacim Iosias sone des conincs van Iuda in die neghenste maent, dat si een vasten hebben vercondicht voor daenschijn des Heeren allen den volcke in Ierusalem, ende alle der menichten die daer te samen gecomen was wt die steden van Iuda in Ierusalem.

10

⁺Ende Baruch heeft ghelesen wt den boeck Ieremias woorden in des Heeren huys in die scadtcamer van Gamarias Saphans sone den scrijuer in dat ouerste portael, in den inganck vander nieuwer poorten van des Heeren huys daert alle tvolck hoorde.

+ C

11

Ende doen Micheas die sone Gamarie des soons Saphan gehoort hadde alle des Heeren woorden wten boecke

12

soo is hy nederghedaelt in des conincs huys, tot die scatcamer des scrijuers, ende siet daer saten allen die princen Elisama die scrijuer, ende Dalaias die sone Semeie, ende Elnathan Achobors sone, ende Gamarias Saphans sone, ende Sedecias Hananias sone, ende alle die princen.

13

Ende Micheas heeft hen ghebootscapt alle die woorden die hi Baruch wten boecke hadde hooren lesen in die ooren des volcs.

14

Hierom hebben alle die princen ghesonden tot Baruch, Iudi den sone Nathanie des soons Selemie, des soons Chusi, segghende. ⁺Den boeck daer ghy wtghelesen hebt, daert volc hoorde, neemt in v hant, ende coemt. Aldus heeft Baruch Nerias sone den boec in zijn hant ghedraghen, ende is tot henlieden ghecomen.

+ D

15

Ende si hebben tot hem gheseyt. Sidt ende leest dese woorden in onse ooren. Ende Baruch heeftse ghelesen in hen ooren.

16

Hierom doen si ghehoort hadden alle dese woorden soo zijn si verbaest gheweest een ieghelijck tot sijnen naesten, ende si hebben gheseyt tot Baruch. Wij moeten den coninck alle dese woorden bootscappen.

17

Ende si hebben hem gheuraecht segghende. Gheeft ons te kennen, hoe dat ghy alle dese woorden ghescreuen hebt wt sijnen mont.

18

Ende Baruch heeft hen gheseyt. Hy sprack wt sijnen monde als lesende tot my alle dese woorden, ende ic screefse in eenen boec met inct.

19

Ende die princen hebben tot Baruch gheseyt. Gaet henen ende verbercht v ghy ende Ieremias, ende nie-

[p. *616]

mant en wete waer ghy sijt.

20

⁺Ende si zijn ghegaen totten coninc in dat voorhoff, maer den boec hebben si te bewaren ghegeuen in die scadtcamer Elisame des scrijuers, ende si hebben alle die woorden vercondicht daert die coninck hoorde.

+ E

21

Ende die coninck heeft Iudi ghesonden dat hi den boec halen soude, die welcke nemende dien wt die scatcamer Elisame des scrijuers heeften ghelesen daert die coninc hoorde, ende alle die princen die omtrent den coninck stonden.

22

Ende die coninc sadt int winter huys in die neghenste maent, ende daer was een heerdeken voor hem ghesteldt vol vierighe colen.

23

Ende als Iudi drij bladerkens oft vier ghelesen hadde, soo sneet hy den boec met des scrijuers scrabmesken, ende hy wierp dat int vier datter op dat heerdeken was, tot dat alle den boeck verdaen was metten viere dat int heerdeken was.

24

Ende die coninck ende alle zijn knechten die alle dese redenen ghehoort hebben, en hebben niet gheureest, noch hen cleederen ghescoort,

25

Maer nochtans Elnathan ende Dalaias, ende Samarias hebben teghen den coninck ghesproken, dat hy den boeck niet verbranden en soude, ende hy en heeftse niet ghehoort.

26

⁺Ende die coninck heeft beuolen Ieremiel den sone Amalech ende Saraie Ezriels sone ende Selemie Abdeels sone, dat si Baruch den scrijuer souden vanghen ende Ieremiam den prophete, maer die Heere haddese gheborghen.

+ F

27

Ende des Heeren woort is gheschiet tot Ieremiam den prophete nae dat die coninck den boeck verbrant hadde ende die woorden die Baruch ghescreuen hadde wt Ieremias mont, segghende.

28

Neemt wederom eenen anderen boeck, ende scrijft daer inne alle die ierste woorden die inden iersten boeck waren, den welcken Ioacim die coninck van Iuda verbrant heeft.

29

Ende tot Ioacim den coninck van Iuda suldi segghen. Dit seyt die Heere. Ghy hebt dien boeck verbrant segghende. Waerom hebdi daer in ghescreuen vercondighende. Die coninck van Babilonien sal haestelijck comen, ende hy sal dit lant bederuen, ende hy sal wt haer doen ophouden die menschen ende beesten?

30

Daerom dit seydt die Heere teghen Ioacim den coninck van Iuda. ⁺Daer en sal van hem niemant zijn die op Dauids throon sitte, ende sijnen lichaem sal gheworpen worden totter hitte des daechs ende totter vorst des nachts.

+ G

31

Ende ick sal versoecken teghen hem, ende teghen zijn saet, ende teghen zijn knechten haerlieder boosheden, ende ick sal brenghen ouer hen, ende ouer die bewoonders van Ierusalem, ende ouer die mannen van Iuda, alle tquaet dat ick tot hen ghesproken hebbe, ende si en hebbens niet ghehoort.

32

Ende Ieremias heeft eenen anderen boeck ghehaelt, ende heeft dien ghegheuen Baruch Nerias sone den scrijuer, die welcke heeft daer in ghescreuen wt Ieremias mont alle die redenen van den boeck den welcken Ioacim die coninck van Iuda verbrant hadde metten viere, ende daer toe sijnder noch veel meer redenen toeghedaen dan daer te voren waren.