Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺DWoort dat ghesciet is tot Ieremiam vanden Heere in die daghen Ioacim Iosias sone des conincs van Iuda segghende.

+ A

2

Gaet henen totter Rechabiten huys, ende spreect tot henlieden, ende ghy sultse leyden in des Heeren huys in een vanden scatcameren, ende ghi sult henlieden wijn te drincken gheuen.

3

Ende ick heb tot my ghenomen Iezoniam den sone Ieremie des soons Habsanie, ende zijn broeders, ende alle zijn sonen, ende alle tgheheel huys der Rechabiten.

4

Ende ick hebse in des Heeren heys gheleydt, tot die scadtcamer der kinderen Hanan des soons Iegedelie des mans Godts, die by die scadtcamer der princen was ouer den scadt Maasie Sellums sone, die de bewaerder des portaels was.

5

Ende ick heb voor die kinderen vander Rechabiters huys scalen vol wijns ghestelt ende kelcken, ende ick heb tot henlieden gheseyt. Drinct wijn.

6

Die welcke hebben gheantwoort. Wij en sullen gheenen wijn drincken, want Ionadab Rechabs sone onse vader heeft ons gheboden segghende. ⁺Ghy en sult gheenen wijn drincken, nocht v kinderen tot inder eewicheyt.

+ B

7

Ende

[p. *615]

ghy en sult gheen huys timmeren, ende gheen saet saeyen, ende gheen wijngaerden planten noch hebben, maer ghy sult in tabernakelen woonen alle uwe daghen, op dat ghi veel daghen leuen moecht op daensicht der eerden, inde welcke ghi pelgrims sijt.

8

Hierom hebben wij onderdanich gheweest der stemmen van Ionadab des soons Rechab onsen vadere, in alle dat hy ons beuolen heeft alsoo dat wij gheenen wijn en souden drincken tot allen onse daghen, wij ende onse huysvrouwen, onse sonen ende dochteren,

9

ende dat wij gheen huysen en souden timmeren om te bewoonen, ende wijngaert, ende ackerlant, ende saet en hebben wij niet ghehadt,

10

⁺maer wi hebben ghewoont in tabernakelen, ende wij hebben onderdanich gheweest nae alle die dinghen die ons Ionadab onse vader beuolen hadde.

+ C

11

Maer doen Nabugodonosor die coninc van Babilonien opghecomen was tot ons lant soo hebben wij gheseyt. Coemt ende laet ons in Ierusalem gaen van daensicht des heyrs der Chaldeen, ende van des heyrs van Sirien aensicht, ende wij zijn in Ierusalem ghebleuen.

12

Ende dwoort des Heeren is ghesciet tot Ieremiam segghende.

13

Dit seyt die Heere der heyrscaren Israels Godt. Gaet henen, ende segt den mannen van Iuda, ende den bewoonders van Ierusalem. En suldi gheen onderwijsinghe ontfanghen, om mijnen woorden ghehoorsaem te zijn, seydt die Heere?

14

Ionadab Rechabs soons woorden die hy sijnen kinderen beuolen heeft dat si gheenen wijn drincken en souden, hebben machtich gheweest, ende si en hebben gheenen wijn ghedroncken tot op desen dach toe, om dat si haers vaders ghebode onderdanich gheweest hebben, maer ick heb tot v lieden ghesproken van smorghens vroech opstaende ende sprekende, ende ghy en hebt my niet onderdanich gheweest.

15

Ende ick heb tot v lieden ghesonden alle mijn dienaers die propheten, des morghens vroech opstaende, ende sendende, ende segghende. ⁺Bekeert v een ieghelijck van sijnen alderquaetsten wech, ende maect v neersticheden goet ende en wilt die vreemde goden niet volghen, noch en dient die niet, ende ghy sult woonen int lant, dat ick v lieden ende uwen vaderen ghegheuen hebbe, ende ghi en hebt v oore niet gheneycht, noch ghy en hebt mi niet ghehoort.

+ D

16

Aldus hebben die kinderen van Ionadab Rechabs sone haers vaders ghebodt dat hi hen gheboden hadde vast ghemaect, maer dit volck en heeft my niet onderdanich gheweest.

17

Daerom dit seyt die Heere der heyrscaren Israels Godt. Siet ic sal op Iudam ende ouer alle die bewoonders van Ierusalem aenbrenghen alle dit lijden dat ick ghesproken hebbe teghen hen, om dat ic tot hen lijden ghesproken hebbe, ende si en hebbens niet ghehoort, ick hebse gheroepen, ende si en hebben mi niet gheantwoort,

18

Maer den huyse der Rechabiters heeft Ieremias gheseyt. Dit seyt die Heere der heyrscaren Israels Godt. Om dat ghy onderdanich gheweest hebt Ionadabs ws vaders ghebode, ende hebt alle sijn beuelingen bewaert, ende hebt gedaen alle tgene dat hy v lieden beuolen hadde.

19

Daerom dit seyt die Heere der heyrscaren Israels God. Daer en sal gheen man ghebreken van Ionadabs Rechabs soons gheslachte staende voor mijn aensicht tot allen daghen.