Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺DWoort dat ghedaen is tot Ieremiam vanden Heere als Nabugodonosor die coninc van Babilonien, ende alle zijn heyr, ende alle die rijcken des lants die onder die macht van sijnder hant waren, ende alle tvolc streden teghen Ierusalem ende teghen allen haer steden segghende.

+ A

2

Dit seydt die Heere die Godt van Israel. Gaet henen ende spreect tot Sedeciam den coninck van Iuda, ende ghy sult tot hem segghen. Dit seydt die Heere. Siet ick sal dese stadt leueren in des conincs van Babilonien hant, ende hy sal die metten vier ontsteken.

3

Ende ghi en sult sijnen handen niet ontulieden, maer ghy sult met een gheuanghenisse gheuanghen worden, ende ghy sult in sijn handen gheleuert worden, ende v ooghen sullen des conincs van Babilonien ooghen sien, ende sijnen mont sal met uwen mont spreken, ende ghy sult in Babilonien gaen,

4

Nochtans hoort des Heeren woort o Sedecia coninc van Iuda. Dit seyt die Heere tot v. Ghy en sult metten sweerde niet steruen,

5

maer ghy sult in vreden steruen, ende nae die verbrandinghe uwer vaderen der voorledender coninghen die voor v gheweest hebben alsoo sullen si v verbranden, ende beclaghen wee Heere, ⁺want ick heb dwoort ghesproken seyt die Heere.

+ B

6

Ende Ieremias die prophete heeft gesproken tot Sedeciam den coninc van Iuda, alle dese woorden in Ierusalem.

7

Ende des conincs van Babilonien heyr streedt tseghen Ierusalem, ende teghen alle die steden van Iuda die daer ouerbleuen waren, teghen Lachis, ende teghen Azecha, want dese waren daer noch ouerbleuen van die steden van Iuda, vaste besloten steden.

8

Dwoort datter ghesciet is tot Ieremiam vanden Heere, nae dat die coninck Sedecias tverbont ghemaect hadde met alle den volcke in Ierusalem,

9

prekende dat een ieghelijc sijnen eyghen knecht, ende een ieghelijck sijn eyghen dienstvrouwe, die hebreeussche mans oft hebreeussche vrouwen waren souden vrij laten, ende dat sij gheensins en souden heerscappie ouer hen hebben, dat is inden Iode ende in sijnen broedere.

10

Aldus hebbent alle die princen ende alle tvolck ghehoort die tverbont aenghenomen hadden dat een ieghelijck sijnen knecht ende een ieghelijck sijn dienstwijf souden vrij laten, ende dat si voorts gheen heerscappie ouer hen hebben en souden, aldus hebben sijt gehoort, ⁺ende si hebbense vrij ghelaten.

+ C

11

Ende si zijn daer na wederom ghekeert, ende si hebben hen knechten ende dienstwijuen wederom ghetrocken, die si vrij ghelaten hadden, ende hebbense onder hen bedwanck ghebracht tot knechten ende dienstvrouwen.

12

Ende dwoort des Heeren is ghesciet tot Ieremiam vanden Heere segghende.

13

Dit seyt die Heere die God van Israel. Ick heb een verbont ghemaect met uwen vaderen inden dach dat ickse wtgheleydt hebbe wten lande van Egipten, wt den huyse der slauernien seggende.

14

Als die seuen iaren veruult sullen zijn soo verlate een ieghelijck sijnen broeder den hebreeusschen die hem vercocht is, ende hy sal v ses iaren dienen, ende ghy sult hem van v vrij laten, ende v vaderen en hebben my niet ghehoort, noch si en hebben hen oore niet gheneycht

15

Ende ghy sijt heden omghekeert, ende hebt ghedaen dat recht was in mijn ooghen, dat ghi vrijcheyt soudt vercondighen een ieghelijck tot sijnen vrint, ende ghy hebt een verbont ghemaect in mijn aensicht, int huys waer in dat mijnen naem aengheroepen is ouer haer,

16

ende ghy sijt wederom ghekeert ende hebt mijnen naem besmedt, ende ghi hebt wederom ghebracht een ieghelijck sijnen knecht, ende een ieghelijck zijn dienstwijf, die ghy ghelaten hadt om vrij te sijne, ende hensselfs machtich, ende ghy hebtse onder bedwanc ghebracht, dat si souden wesen v lieder knechten ende dienstwijuen.

17

Daerom dit seydt die Heere. Ghy en hebt my niet gehoort, dat ghy vrijcheyt preken soudt een ieghelijck sijnen broeder, ende een ieghelijck sijnen vrint, siet ick vercondighe v een vrijcheyt, ⁺seydt die Heere, ten sweerde, ter pestilencien, ende ten hongher ende ick sal v gheuen tot een beweeninghe alle den rijcken der aerden.

+ D

18

Ende ick sal die mannen die mijn verbont ouertreden hebben, ende niet ghehouden en hebben die woorden des verbonts, tot den welcken si consent ghegheuen hadden voor mijn aensicht, het calf dat si ghehouwen hebben in twee stucken, ende zijn doorghegaen tusschen zijn deelen.

19

Die princen van Iuda, ende die princen van Iherusalem, die ghesneden camerlinghen, ende die priesters, ende alle tvolck des lants die doorghegaen sijn tusschen die deelen des calfs.

20

Ende ick salse gheuen in die handen van haren vianden, ende in die handen der gheender die hen zielen soecken, ende hen doot lichaem sal wesen tot een spijse den voghelen des hemels, ende den beesten der eerden.

21

Ende Sedeciam den coninck van Iuda ende sijn princen, sal ick gheuen in haerder vianden hant, ende in die hant der gheender die hen zielen soecken, ende in die hant van die heyren des conincs van Babilonien die van v wech ghegaen zijn.

22

Siet ick ghebiedt seydt die Heere, ende ick salse wederom brenghen in dese stadt, ende si sullen daer teghen strijden, ende die innemen, ende metten viere verbranden, ende die steden van Iuda sal ick tot verwoesthede stellen, om datter gheen bewoonder wesen en sal.