Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiij. Capittel.

1

⁺ENde dwoort des Heeren is ghesciet tot Ieremiam ten tweeden doen hy noch ghesloten was int voorbucht des kerckers segghende.

+ A

2

Dit seyt die Heere die dat maken sal, ende sceppen, ende bereyden, Heere is sijnen naem.

3

Roept tot my, ende ick sal v verhooren, ende ick sal v groote dinghen vercondighen, ende vaste dinghen die ghy niet en weet

4

want dit seyt die Heere Israels God tot die huysen van deser stadt, ende tot die huysen des conincks van Iuda die verdoruen zijn, ende die stercten, ende tot dat sweert

5

der gheender die comen dat si strijden souden metten Chaldeen, ende veruullen die met doode lichamen der menschen die ic gheslaghen hebbe in mijn rasende gramscap, ende in mijn verbolghentheyt, verberghende mijn aensicht van deser stadt om allen hen quaetheyt.

6

Siet ic sal hen litteekenen ende ghesontheyt ouertrecken, ende ick salse ghenesen, ende ick sal openbaren dat verbidden des vreedts, ende der waerheyt,

7

Ende ick sal wederom bekeeren die bekeeringhe van Iuda, ende die bekeeringhe van Ierusalem, ende ic salse optimmeren als vanden beghinne,

8

ende ick salse suyueren van allen hen boosheyt, in die welcke si my ghesondicht hebben, ende ick sal allen haren boosheden ghenadich wesen, in die welcke si my verlaten hebben, ende my versmaedt.

9

⁺Ende het sal my wesen tot eenen naem, ende tot een blijscap, ende tot eenen loff, ende tot een verhueghen alle den Heydenen der eerden, die ghehoort sullen hebben alle die goede dingen die ick hen doen sal, ende si sullen veruaert sijn ende verbaest in alle die goeden, ende in alle den vrede die ic hen doen sal.

+ B

10

Dit seyt die Heere. Noch sal in dese plaetse (die welcke ghi segt dat verwoest is, om datter gheen mensch noch beeste en is, in die steden van Iuda, ende buyten Ierusalem, die verlaten sijn sonder mensche ende sonder bewoonder, ende sonder vee) ghehoort worden

11

die stemme der blijschappen, ende die stemme der vrolijcheyt, die stemme des bruydegoms ende der bruyt die stemme der gheender die segghen. Belijdt den Heere der heyrscaren, want die Heere is goet, want inder eewicheyt is sijn bermherticheyt, ende der gheender die beloefde gauen draghen in des Heeren huys want ick sal wederom brenghen die omkeeringe des lants ghelijct van tbeghinsel was, seydt die Heere.

12

Dit seyt die Heere der heyrscaren. Noch sal in dese verlaten plaetse sonder mensche ende sonder behelpighe beeste ende in alle haer steden wesen een wooninghe der herders van die rustende cudden.

13

⁺In die berchsteden, ende in die veltsteden, ende in die steden die ten suyden zijn, ende int lant van Beniamin, ende rontsom Ierusalem, ende in die steden van Iuda, sullen noch cudden gaen door die hant des gheens diese tellen sal, seyt die Heere.

+ C

14

Siet die daghen sullen comen, seydt die Heere, ende ick sal tgoet woort verwecken dat ick ghesproken hebbe totten huyse van Israel, ende totten huyse van Iuda.

15

In die daghen ende in dien tijt sal ick Dauid doen groeyen een groeytsel der rechtuerdicheyt, ende dat sal ordeel ende rechtuerdicheyt doen int lant.

16

In dien daghen sal Iuda behouden worden, ende Ierusalem sal vrijlijck woonen, ende dats den naem di en si hem noemen sullen. Die Heere onse rechtuerdighe,

17

want dit seyt die Heere. Van Dauid en sal gheen man ghebreken die sitte opden throon des huys van Israel.

18

Ende vanden priesters ende van den Leuiten en sal gheen man ghebreken van mijn aensicht, die brantofferanden offere, ende het sacrificie ontsteke, ende slachofferanden slae tot allen daghen.

19

Ende dwoort des Heeren is ghesciet tot Ieremiam seggende.

20

Dit seyt die Heere. Ist dat mijn verbont mach van onweerden ghemaect worden metten dach, ende mijn verbont metten nacht, alsoo dat gheenen dach ende nacht en soude wesen te sijnen tijde.

21

⁺Soo sal oock mijn verbont moghen van onweerden wesen met Dauid mijnen knecht dat wt hem gheenen sone en si, die regneere in sijnen throon, ende Leuiten, ende priesters mijns dienaers.

+ D

22

Ghelijck die sterren des hemels niet en moghen gheteldt worden, ende dat tsant der zee ghemeten, alsoo sal ick vermenichfuldighen Dauids mijns knechts saet, ende die Leuiten mijn dienaers.

23

Ende dwoort des Heeren is ghesciet tot Ieremiam seggende.

24

En hebdi niet ghesien wat dit volck ghesproken heeft segghende. Die

[p. *614]

twee gheslachten die de Heere vercoren hadde zijn verworpen, ende mijn volck hebben sij versmaedt, om dat voortaen gheen volck meer en is voor henlieden.

25

Dit seyt die Heere. Eest dat ic mijn verbont tusschen den dach ende den nacht, ende die wetten den hemel ende der eerden niet ghestelt en hebbe, soo sal ick voorwaer Iacobs ende Dauids mijns knechts saet oock verworpen, alsoo dat ick van sijnen sade niet nemen en sal princen van Abraham, Isaac, ende Iacobs sade, want ic sal hen bekeeringhe wederom brenghen, ende ick sal haerlieder ontfermen.