Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺HEt woort dat ghesciet is tot Ieremiam van den Heere int thienste iaer Sedecie des conincs van Iuda, dit is het achthienste iaer van Nabugodonosor.

+ A

2

Doen omleydde Nabugodonosors heyr Iherusalem, ende Ieremias die prophete was ghesloten int voorhof des kerkers, die in des conincs van Iuda huys was,

3

want Sedecias die coninck hadde hem besloten segghende. Waerom propheteerdi, segghende. Dit seyt die Heere. Siet ic sal dese stadt gheuen in des conincks van Babilonien hant, ende hy sal die innemen?

4

Ende Sedecias die coninc van Iuda en sal wt der Chaldeen hant niet ontulieden, maer hy sal gheleuert worden in des conincs van Babilonien handen, ende sijnen mont sal spreken met des conincs mont, ende zijn ooghen sullen des conincs ooghen sien.

5

Ende hy sal Sedeciam in Babilonien leyden, ende hy sal daer zijn tot dat ick hem besoecken sal, seyt die Heere, Maer ist dat ghy teghen die Chaldeen strijdt, soo en suldy gheen voorspoet hebben.

6

Ende Ieremias heeft gheseyt. Des Heeren woort is tot my ghesciet segghende.

7

Siet Hanameel Sellums ws ooms sone sal comen tot v segghende. Coopt voor v mijnen acker die in Anathoth is int lant van Beniamin, want hy behoort v toe van naerderscap dat ghy dien coopt.

8

Ende Hanameel mijns ooms sone is tot my ghecomen, na des Heeren woort tot dat portael des kerckers, ⁺ende hy heeft tot my gheseyt. Besidt mijnen acker die in Anathoth is int lant van Beniamin, want die erffenisse behoort v toe, ende ghy sijt die naemaghe om te besitten. Ende ick heb verstaen dattet des Heeren woort was.

+ B

9

Ende ick heb den acker ghecocht van mijns ooms sone, die in Anathoth is, ende ick heb hem gheweghen seuen stateren siluers, ende thien silueren penninghen.

10

Ende ick hebt in eenen boeck ghescreuen ende gheteekent, ende ick heb daer ghetuyghen toe ghenomen, ende ick heb tsiluer in een waghe gheweghen.

11

Ende ick heb ontfanghen den boec der besittinghen gheteekent, ende die voorwaerden des coops, ende die beloften, ende die warantschap ende die seghelen van buyten.

12

Ende ick heb den boeck der besittinghen ghegheuen Baruch, den sone Neri des soons Maasie, voor die ooghen van Hanameel mijns ooms sone ende in die ooghen der ghetuyghen die inden boec des coops ghescreuen waren, in die ooghen van alle die Ioden die int portael des kerckers saten.

13

Ende ick heb Baruch voor hen gheboden seggende.

14

Dit seyt die Heere der heyrscaren Israhels Godt. Neemt dese boecken, desen gheseghelden boeck des coops, ende desen boeck die open is, ende leght die in eenen eerden ghebacken pot dat sij blijuen moghen veel daghen,

15

want dit seyt die Heere der heyrscharen Israhels Godt. Noch sullen in dit lant beseten worden huysen ende ackers ende wijngaerden.

16

Ende ic heb totten Heere ghebeden nae dat ick den boec der besittinghen Baruch den sone van Neri ghegheuen hadde segghende.

17

⁺Ay ay ay Heere Godt, siet ghy hebt hemel ende eerde gescapen in v groote stercheyt, ende in uwen wtghestrecten arm, gheen woort en sal v swaer om doen sijn

+ C

18

die bermherticheyt doet in duysenden, ende verghelt der vaderen boosheyt in haerder kinderen schoodt na hen. Alderstercste, groot, ende machtighe, Heere der heyrscaren is uwen naem.

19

Groot van rade, ende ombegrijpelijck van ghedachte, wiens ooghen open sijn ouer alle die weghen van Adams kinderen, om dat ghy eenen ieghelijcken soudt betalen nae sijn weghen ende nae die vrucht van sijnen vonden.

20

Die teekenen ende wonderlijcke wercken ghestelt hebt int lant van Egipten tot op desen dach toe, ende in Israel, ende in die menschen ende ghy hebt v seluen eenen naem ghemaect ghelijc desen dach is,

21

ende ghy hebt v volck Israel wtgheleyt wten lande van Egipten, door teekenen ende wonder wercken, ende door v stercke handt, ende met eenen wtghestrecten arm, ende met grooter veruaertheyt.

22

Ende ghy hebt hen dit lant ghegheuen dwelck ghy haren vaderen ghesworen hebt dat ghy hen dat gheuen soudt, een lant vloeyende van melck ende honich.

23

⁺Ende si sijn daer inne ghegaen ende hebben dat beseten, ende si en sijn uwer stemmen niet onderdanich gheweest, ende sij en hebben in v wet niet ghewandelt, alle dat ghy hen gheboden hebt dat sij doen souden, dat en hebben sij niet ghedaen, ende alle dese quade dinghen sijn op hen ghecomen.

+ D

24

Siet die bolwercken zijn opghericht teghen die stadt, datse soude inghenomen worden, ende die stadt is inder Chaldeen handen gheleuert, die teghen haer strijden van daensicht des sweerts, des honghers, ende der pestilencien, ende al wat ghi ghesproken hebt dat is hen ghesciet, ghelijc ghy selue siet.

25

Ende ghy Heere God segt my. Coopt den acker om siluer, ende neemt daer ghetuyghen toe, als die stadt ghegheuen is in die hant der Chaldeen?

26

Ende des Heeren woort is ghesciet tot Ieremiam seggende.

27

Siet ic ben die Heere Godt van allen vleesche, sal my eenich woort swaer vallen?

28

Daerom dit seyt die Heere. Siet ick sal dese stadt leueren in der Chaldeen hant, ende in des conincs van Babilonien hant, ende si sullen die innemen.

29

⁺Ende die Chaldeen sullen comen strijdende teghen dese stadt, ende si sullen die metten viere ontsteken, ende die verbranden, ende die huysen op der welcker daken si sacrificie deden Baal, ende offerden den vreemden goden drancofferanden, om my te creyten,

+ E

30

want die kinderen van Israel ende die kinderen van Iuda waren altijt quaetdoende in mijn ooghen van hen ionckheyt aen, die kinderen van Israel die tot nv toe my creyten in die wercken haerder handen, seyt die Heere.

31

Want in mijn rasende gramscap ende in mijn verbolghentheyt is my dese stadt gheworden, vanden dach dat sij die ghetimmert hebben tot op desen dach toe, inden welcken si sal wech ghenomen worden van mijnen aenschijn,

32

om die quaetheyt der kinderen van Israel, ende der

[p. *613]

kinderen van Iuda, die sij ghedaen hebben my tot gramscap verweckende, si ende hen coninghen, ende hen princen, ende hen priesteren, ende hen propheten, die mannen van Iuda ende die bewoonders van Ierusalem.

33

Ende si hebben tot my die rugghen ghekeert ende niet die aensichten, doen ickse inden dagheraet leerde, ⁺ende onderwees, ende sij niet hooren en wilden dat si onderwijs ontfanghen souden.

+ F

34

Ende si hebben hen affgoden int huys ghestelt waer in mijnen naem aengheroepen is, om dat sij dat ontsuyueren souden.

35

Ende si hebben die hoochden van Baal ghetimmert die in die valleye des soons Ennom sijn, op dat si hen sonen ende dochteren souden wijden Moloch, dat ick hen niet gheboden en hebbe, noch ten is in mijn herte niet gheclommen, dat si dese afgrijselijcheyt doen souden, ende dat si Iudam tot sonde brenghen souden.

36

Ende nv om dese dinghen, dit seyt die Heere Israels Godt tot deser stadt, van die welcke ghi segt dat si in die hant des conincs van Babilonien gheleuert wordt doort sweert, ende door den hongher, ende door die pestilencie.

37

Siet ick salse vergaderen van alle die landen, tot die welcke ickse wtghedreuen hebbe in mijn rasende gramscap, ende in mijnen torn, ende in mijn groote verbolghentheyt, ende ick salse wederom brenghen tot deser plaetsen, ende ick salse doen ghetrouwelijck woonen.

38

Ende si sullen my tot een volc wesen, ende ick sal hen tot eenen Godt wesen.

39

Ende ic sal hen een herte gheuen ende eenen wech, dat si my vreesen tot allen daghen, ende dat hen wel si, ende haren kinderen nae hen.

40

Ende ick sal met hen een eewich verbont maken, ende ick en sal niet ophouden van hen wel te doen, ende mijn vreese sal ick in hen herte gheuen dat si van my niet wech en ghaen.

41

⁺Ende ick sal ouer henlieden blijde wesen, als ick hen sal wel ghedaen hebben, ende ick salse in dit lant planten inder waerheyt in alle mijn herte ende in alle mijn ziele,

+ G

42

Want dit seydt die Heere. Ghelijck ick ouer dit volck alle dit groot quaet ghebracht hebbe, alsoo sal ick ouer henlieden brenghen alle tgoet dat ick tot henlieden spreke.

43

Ende die ackeren sullen beseten worden in dit lant waer aff dat ghy segt dattet verwoest is, om datter gheen mensch noch beeste ghebleuen en is, ende dat het ghegheuen is inder Chaldeen hant.

44

Die ackeren sullen met ghelde ghecocht worden, ende sij sullen in eenen boeck ghescreuen worden, ende daer sal den zeghel opghedruct worden, ende daer sal ghetuyghe toe ghenomen worden, int lant van Beniamin ende rontsomme Ierusalem, in die steden van Iuda, ende in die steden der gheberchten, ende in die velt steden, ende in die steden die aent suyden sijn, want ick sal hen gheuanghenisse weder keeren, seyt die Heere.