Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺IN dien tijt seyt die Heere, sal ick een Godt wesen alle den gheslachten van Israel, ende sij sullen my tot een volck wesen.

+ A

2

Dit seyt die Heere, Het volck dat vanden sweerde ouerghebleuen was heeft gratie gheuonden in die woestijne, Israel sal tot zijn ruste gaen.

3

Die Heere heeft my van verre gheopenbaert. Ende met een eewighe liefde heb ick v lief ghehadt, daer om heb ick v aenghehaelt ontfermende.

4

Ende ick sal v wederom optimmeren, ende ghy sult opghetimmert worden ghy maghet van Israel, ghy sult noch verciert worden met uwen tamboeren, ende ghy sult wtgaen in den dansse der gheender die spelen.

5

Ghy sult noch wijngaerden planten op die berghen van Samarien, sy sullen plantende planten, ende tot dat den tijt coemt en sullen sij den wijn niet snyden.

6

Want tsal eenen dach wesen in den welcken die wachters roepen sullen opden berch Ephraim. Staet op ende laet ons opclimmen in Sion totten Heere onsen Godt.

7

Want dit seyt die Heere, Verhuecht v met blijscap Iacob, ende wrenscht teghen thooft der Heydenen, gheeft ouer al gheluyt, ende singt, ende segt. Verlost Heere v volck die bleuelinghen van Israel.

8

Siet ick salse aenbrenghen van dat noorde lant, ende ick salse vergaderen van duyterste der eerden, onder die welcke sullen wesen blinde ende cruepele, ende die bevruchte ende barende te samen, een groote vergaderinghe herwaerts wederkeerende,

9

⁺met een ghescrey sullen sij comen, ende in bermherticheyt sal icse wederom leyden, ende ick salse aen brenghen doer die beken der wateren inden rechten wech, ende sij en sullen hen daer teghen niet stooten. Want ick ben Israel een vader gheworden, ende Ephraim is mijn ierste gheboren sone.

+ B

10

Hoort des Heeren woert ghy Heydenen, ende vercondighet in die eylanden die verre zijn, ende segt. Die Israel verstroeyt heeft die sal hem weder vergaderen, ende hy sal hem bewaren als een herder sijn cudde.

11

Want die Heere heeft Iacob verlost, ende hy sal hem verlossen wt die hant des gheens die machtigher was.

12

Ende sij sullen comen ende louen opden berch Sion, ende sij sullen tsamen comen tot des Heeren goeden, op die tarwe ende wijn ende olie, ende die vrucht van tcleyn ende groot vee, ende hen ziele sal sijn als eenen versschen hof, ende sij en sullen voertaen niet meer hongher hebben.

13

Dan sal die maghet haer verblijden inden reyedans, die ionghers, ende ouderste samen, ende ick sal hen droeffheyt in blijscap verkeeren, ende ick salse troosten, ende blijde maken van haren rouwe.

14

Ende ick sal die ziele der priesteren droncken maken met vetticheyt, ende mijn volc sal van mijnen goeden veruult worden, seyt die Heere,

15

⁺Dit seyt die Heere, Daer is een stemme des beclaghens ghehoort in die hoochden, des rouws ende des weenens, Rachels beweenende haer sonen, ende niet willende ghetroost zijn ouer die, want sij niet en zijn.

+ C

16

Dit seyt die Heere, Laet v stemme rusten van screyen, ende v ooghen van tranen. Want daer is loon voer v werck, seyt die Heere, ende sij sullen wederom comen van des viants lande.

17

Ende uwen wtersten is hope, seyt die Heere, ende die kinderen sullen wederkeeren tot hen palen.

18

Hoorende heb ick Ephraim ghehoort ouer varen. Ghy hebt my ghecastijt ende ick ben onderwesen, als een onghetempt ionck stierken bekeert my, ende ic sal bekeert worden. Want ghi sijt die Heere mijn Godt.

19

Want nae dat ghy my bekeert hebt, soo heb ick penitencie ghedaen, ende nae dat ghijt my ghetoont hebt soo heb ick mijn hoepe gheslaghen. Ick ben bescaemt gheweest ende heb my ghescaemt, want ick heb tverwijt mijnder ioncheyt gheleden.

20

⁺Is Ephraim my een eerlijck sone, ist een teer kint, want van dat ick tot hem ghesproken hebbe, soo sal ick sijns noch ghedachtich wesen. Daer om zijn die binnenste mijns herten ontstelt gheweest ouer hem. Ontfermende sal ick zijnder ontfermen, seyt die Heere.

+ D

21

Stelt v een hooghe wachtplaetse. Sedt voer v bitterheden. Scict v herte inden rechten wech daer ghy in ghewandelt hebt, keert wederom ghy dochter van Israel, keert wederom tot dese uwe steden.

22

Hoe langhe wordi met weeldicheden onghebonden ghy wilde dochter, want die Heere heeft een nieuwe dinck ghescapen opder aerden. Een vrouwe sal eenen man omuanghen.

23

Dit seyt die Heere der heyrscaren Israels Godt. Sy sullen noch dit woert segghen int lant van Iuda ende in zijn steden als ic hen gheuanghenisse sal omghekeert hebben. ⁺Die Heere ghebenedijde v ghy schoonheyt der rechtuerdicheyt, heylighen berch,

+ E

24

ende in hem sullen woonen Iudas ende alle sijn steden te samen, die ackerluyden ende die drijuers der cudden.

25

Want ick heb die vermoeydde ziele droncken ghemaect, ende alle hongherighe ziele heb ic versaedt.

26

Daerom ben ick als wt eenen slaep ghewect, ende ic hebt ghesien ende mijnen slaep was my soete.

27

Siet die daghen comen seyt die Heere, ende ic sal thuys van Israel, ende thuys van Iuda besaeyen met menschen saet, ende metten sade der behelpigher beesten.

28

Ende ghelijck ick op hen ghewaect heb om hen wt te trecken, ende aff te breken, ende te verstroyen, ende te vernielen, ende te pijnighen, alsoe sal ic op hen waken, om te planten ende te timmeren, seyt die Heere.

29

In die daghen en sullen sij voertaen niet meer segghen. Die vaderen hebben eenen sueren druyf gheten, ende der kinderen tanden sijn verboomt gheworden,

30

maer een ieghelijck sal in zijn boosheyt steruen, alle mensch die eenen sueren druyf etet diens tanden sullen boomich worden.

31

⁺Siet die daghen comen seyt die Heere, ende ic sal den huyse van Israel, ende den huyse van Iuda een nieu verbont maken,

+ F

32

niet ghelijck tverbont dat ic met uwen vaderen ghemaect hebbe, inden dach als ick hen hant ghenomen hebbe, dat icse wten lande van Egypten leyden soude, tverbont dat sij ghebroken hebben, ende ick heb heerscappie ouer hen gehadt, seyt die Heere,

33

Maer dit sal tverbont sijn dat ick maken sal metten huyse van Israel nae die daghen, seyt die Heere, Ick sal mijn wet gheuen in hen binnenste, ende in hen herten sal ic die scrijuen, ende ick sal hen tot eenen Godt wesen, ende sij sullen my tot een volck wesen,

34

Ende een man en sal voertaen zijnen naesten niet meer leeren, ende een man sijnen broeder segghende, Kent den Heere, want sij sullen my alle kennen van haren minsten totten meesten, seyt die Heere, want ic sal haerder boosheyt genadich wesen, ende haerder sonden en sal ick niet meer ghedencken.

35

Dit seyt die Heere die de sonne gheeft tot een licht des daechs,

[p. *612]

dordinancie der manen ende der sterren tot des nachts licht, die de zee verstoort, ende haer baren gheuen gheluyt. ⁺Die Heere der heyrscharen is sijnen naem.

+ G

36

Ist dat dese wetten vergaen voor my, seyt die Heere, dan sal Israels saet ooc verghaen, seydt die Heere, dattet gheen volck en sij voor my tot allen daghen.

37

Dit seyt die Heere. Ist datmen die hemelen bouen meten mach, ende ondersocht moghen worden die fundamenten der aerden beneden, soo sal ick ooc wechworpen alle tsaet van Israel, om alle dat sij ghedaen hebben, seyt die Heere.

38

Siet die daghen comen seyt die Heere, ende den Heere sal een stadt ghetimmert worden van den torre Hananeel tot aen die poorte des hoecs.

39

Ende die meet coorde sal voorts ouer wtgaen in zijn aenscouwen opden hueuele Gareb, ende tsal omgaen Goatha.

40

Ende alle die valleye der dooder lichamen, ende die asschen, ende alle die contreye der doot totter beken van Cedron, ende tot den hoeck van die oostpoorte der peerden, en sal des Heeren heylichdom niet wt ghetrocken worden, ende ten sal voorts niet verdoruen worden inder eewicheyt.