Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

31

⁺DIt is dwoert dat ghesciet is tot Ieremiam vanden Heere segghende,

+ A

2

Dit seyt die Heere Israels Godt, segghende, Scrijft v alle die woerden die ick tot v ghesproken hebbe in eenen boeck.

3

Want siet die daghen comen seyt die Heere, ende ic sal wederom keeren die wederkeeringhe mijns volcs Israel ende Iuda, seyt die Heere, ende ic salse wederom keeren totten lande dat ic haren vaderen ghegheuen hebbe, ende sij sullen dat besitten.

4

Ende dit zijn die woerden welck die Heere ghesproken heeft tot Israel ende tot Iudam.

5

Want dit seyt die Heere, Wy hebben een stemme der veruaertheyt ghehoort, vreese, ende ten is gheenen vrede.

6

Vraecht ende besiet oft een man genereert. Waer om heb ick dan ghesien dat alle mans hant is op zijn lendenen als eender barender vrouwen, ende alle die aensichten zijn verkeert inder gheelsucht verwe.

7

Wee want dien dach is groot, noch daer en is ghenen zijns ghelijck, ⁺ende tis den tijt der tribulacien van Iacob ende wt haer sal hy behouden worden.

+ B

8

Ende tsal zijn in dien dach seyt die Heere der heyrscaren, dat ick zijn jock in stucken sal breken van uwen halse, ende zijn banden sal ic van een schoeren, ende die vreemde en sullen niet meer ouer hem heerscappie hebben,

9

maer zij sullen den Heere haren Godt dienen, ende Dauid haren coninck den welcken ick hen verwecken sal.

10

Daer om en vreest niet ghy mijn knecht Iacob, seyt die Heere, noch en verscrict v niet Israel. Want siet ick sal v verlossen van den verren lande, ende v saet van dlant haerder gheuanghenissen, ende Iacob sal wedercomen in rusten, ende ouervloeden van allen goeden, ende daer en sal niemant wesen die hy vreesen soude.

11

Want ick ben met v seyt die Heere, om v te behouden. Want ick sal een voleyndinghe maken met alle die Heydenen daer onder ick v verstroyt hebbe, maer ick en sal v niet maken tot een voleyndinghe, maer ick sal v castijden int ordeel, op dat ghy v niet en laet duncken dat ghy ontsculdich zijt.

12

⁺Want dit seyt die Heere, uwe quetsuere is ongheneselijc, v wonde is seer quaet.

+ C

13

Daer en is niemant die v vonnisse ordeelen mach om te verbinden, v en is gheen bate van ghenesinghe.

14

Alle v liefhebbers hebben v vergheten, ende sij en sullen v niet soecken. Want ick heb v gheslaghen met eens viants quetsuere, met een wreede castijnghe, om die menichte uwer boosheyt zijn v sonden hart worden.

15

Waer om roepti om uwe quetsinghe? uwe smerte is ongheneselijck om die menichte uwer boosheyt, ende om v harde sonden heb ick v dese dinghen ghedaen.

16

Daerom alle die v eten, sullen verslonden worden, ende alle uwe vianden sullen int gheuanghenisse gheleydt worden, ende die v verderuen sullen verdoruen worden, ende alle v roouers sal ick tot eenen roof gheuen.

17

Want ick sal v stramen heylen, ende van uwen wonden sal ic v ghenesen, seyt die Heere, Want sij hebben v Sion wtgheworpen ghenoemt. ⁺Dit is sij die gheenen versoecker en hadde.

+ D

18

Dit seyt die Heere. Siet ick sal wederkeeren die wederkeeringhe van Iacobs tabernakelen, ende zijnder daken sal ick ontfermen, ende die stadt sal ghetimmert worden in haer hoochde, ende den tempel sal nae zijn ordinancie ghefundeert worden.

19

Ende wt hen sal loff comen, ende een stemme der spelender, ende ick salse vermenichfuldighen, ende sij en sullen niet vermindert worden, ende ick salse glorificeren, ende sij en sullen niet versmaelt worden.

20

Ende haer kinderen sullen wesen als vanden beghinne, ende haer vergaderinghe sal voer my blijuen, ende ick salt versoeken teghen alle die ghene die hem quellen.

21

Ende zijn vorst sal wt hem wesen, ende een prince sal wt dat midden van hem voert ghebracht worden, ende ick sal hem aenbrenghen, ende hy sal tot by my comen. Want wie is dese die zijn herte daer aen legghe dat hy my ghenaken soude seyt die Heere?

[p. *611]

22

Ende ghy sult my tot een volck wesen, ende ick sal v tot eenen Godt wesen.

23

Siet den storm des Heeren die wtgaende rasende gramscap, eenen vallenden slachreghen sal opt hooft van die ongoddelijcke rusten.

24

Die Heere en sal die gramscap der verbolghenheyt niet affkeeren, tot dat hy doe ende volbrenghe dat ghedachte zijns herten, in duyterste der daghen suldi dese dinghen kennen.