Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

ENde dit zijn die woerden des boecs, ⁺die Ieremias die Propheet ghesonden heeft van Ierusalem tot die bleuelinghen van die ouders, der ouervoeringhen, ende tot die priesters ende Propheten, ende tot alle tvolck dat Nabugodonosor ouerghevoert hadde van Ierusalem in Babilonien.

+ A

2

Nae dat Ieconias die coninck wtghegaen was ende die coninghinne, ende die ghesneden camerlinghen, ende die princen van Iuda ende Ierusalem, ende die constighe wercluyden ende die besluyters van Ierusalem

3

doer die hant van Elasa Saphans sone, ende Samarias Helchias sone, die welcke Sedecias die coninck van Iuda ghesonden heeft tot Nabugodonosor den coninck van Babilonien, in Babilonien segghende,

4

⁺Dit seyt die Heere der heyrscaren die Godt van Israel alle der ouervoeringhen die ick ouerghevoert hebbe van Ierusalem in Babilonien.

+ B

5

Timmert huysen, ende woont, ende plant houen ende etet die vruchten van die.

6

Neemt huysvrouwen ende wint sonen ende dochteren, ende gheeft uwen sonen huysvrouwen, ende v dochteren gheeft mannen, ende laetse sonen ende dochteren baren, ende wert daer vermenichfuldicht, ende en wilt niet luttel van ghetale wesen,

7

ende suect den vrede vander stadt tot die welcke ick v heb doen ouervoeren, ende bidt voer die tot den Heere. Want in haren vrede sal v lieden vrede zijn.

8

Want dit seyt die Heere der heyrscaren die Godt van Israel. En laet v niet verleyden van uwen propheten, die int midden van v lieden zijn, ⁺ende v waersegghers, ende en hebt gheen achte op v droomen die ghy droomt.

+ C

9

Want sij propheteren v valschelijck in mijnen naem, ende ick en hebse niet ghesonden seyt die Heere.

10

Want dit seyt die Heere, Als in Babilonien sullen beghinnen veruult te worden tseuentich iaren dan sal ic v besoecken, ende ick sal op v verwecken mijn goet woert, om v lieden weder om te leyden tot deser plaetsen.

11

Want ick weet die ghedachten die ick dencke op v lieden, seyt die Heere, ghedachten des vreedts, ende niet des lijdens, dat ick v gheue deynde ende verduldicheyt.

12

Ende ghi sult my aenroepen, ende gaen, ende ghy sult my bidden, ende ic sal v lieden verhooren.

13

Ghy sult my soecken, ende vinden, als ghy my sult ghesocht hebben in alle v herte.

14

Ende ick sal van v lieden gheuonden worden, ⁺seyt die Heere, ende ick sal v vergaderen van alle die Heydenen, ende van alle die plaetsen tot die welcke ick v wtghedreuen hebbe, seyt die Heere, ende ick sal v doen weder om keeren vander plaetsen tot die welcke ick v heb doen ouervoeren.

+ D

15

Om dat ghy gheseyt hebt. Die Heere sal ons Propheten verwecken in Babilonien.

16

Want dit seydt die Heere totten coninck die op Dauids stoel sidt, ende tot alle tvolck dat dese stad bewoont, tot uwe broeders die met v lieden niet en zijn ghegaen in die ouervoeringhe.

17

Dit seyt die Heere der heyrscaren. Siet ick sal op hen seynden tsweert, ende den hongher, ende die pestilencie, ende ic salse stellen als quade vijghen, die niet en moghen gheten worden, om datse seer

[p. *610]

quaet zijn.

18

Ende ick salse veruolghen metten sweerde ende metten hongher, ende metter pestilencien, ende ick salse gheuen tot een quellinghe alle den rijcken des lants, tot een vermalendijdinghe, ende tot een verwonderinghe, ende tot een bespottinghe, ende tot een versmaetheyt allen den Heydenen tot die welcke icse wtghestooten hebbe.

19

Om dat sij mijn woerden niet ghehoort en hebben, seyt die Heere, die ick tot hen ghesonden hebbe doer mijn knechten die propheten des nachts opstaende ende seyndende, ende ghi en hebbes niet ghehoort seyt die Heere,

20

Daer om ghy lieden hoort des Heeren woert, alle die ouervoeringhe die ick wtghesonden hebbe van Ierusalem in Babilonien.

21

⁺Dit seyt die Heere der heyrscaren Israels Godt tot Achab Colias sone, ende tot Sedeciam Maasias sone die v lieden propheteren in mijnen naem valschelijck. Siet ick salse leueren in Nabugodonosors des conincs van Babilonien hant, ende hy salse slaen in v ooghen.

+ E

22

Ende wt hen lieden sal een vermalendijndinghe opghenomen worden alle der ouervoeringhe van Iuda die in Babilonien is, der gheender die segghen. Die Heere stelle v ghelijc Sedeciam ende ghelijc Achab, die welcke die coninck van Babilonien gherooft heeft int vier,

23

om dat si dwaesheyt ghedaen hadden in Israel, ende dat sij ouerspel ghedaen hadden met die huysvrouwen van haren vrienden, ⁺ende sij hebben dwoert ghesproken in mijnen naem valschelijck, dat ick hen niet beuolen en hadde. Ic ben richter ende ghetuyghe seyt die Heere.

+ F

24

Ende tot Semeiam den Nehelamiter suldi segghen.

25

Dit seyt die Heere der heyrscaren die Godt van Israel. Om dat ghy boecken ghesonden hebt in uwen naem, tot alle tvolck dat in Ierusalem is, ende tot Sophoniam Maasias sone den priester, ende tot alle die priesters segghende,

26

Die Heere heeft v ghegheuen tot eenen priester, voer Ioiada den priester, dat ghy die ouerste soudt zijn in des Heeren huys ouer allen man die vanden waersegghenden gheest beroert wort, ende die propheteert, dat ghy hem soudt stellen inden veterstoc, ende inden kercker.

27

Ende nu waer om en hebdi Ieremiam den Anathothiter niet ghestraft die v lieden propheteert?

28

⁺Want daer bouen heeft hy ghesonden in Babilonien tot ons segghende, Tes noch langhe, timmert huysen ende woont daer, ende plant houen ende ret die vruchten van die.

+ G

29

Hier om heeft Sophonias die priester desen boeck ghelesen in die ooren Ieremie des propheets.

30

Ende dwoert des Heeren is ghesciet tot Ieremiam segghende, Sendt alle tot die ouervoeringhe segghende, Dit seyt die Heere tot Semeiam den Nehelamiter. Om dat v Semeias gepropheteert heeft, ende ic hem niet ghesonden en hebbe, ende heeft v doen betrouwen in loghentale.

31

Daer om dit seyt die Heere, Siet ic sal versoecken ouer Semeiam den Nehelamiter ende op zijn saet, ende hem en sal gheen man wesen sittende int midden van desen volcke, ende hy en sal tgoet niet sien dat ick mijnen volcke doen sal, seyt die Heere, want hy heeft een ouertredinghe ghesproken teghen den Heere.