Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺ENde tis ghesciet in dat iaer int beghinsel des rijcs van Sedecias den coninck van Iuda, int vierde iaer in die vijfste maent, dat tot my gheseyt heeft Hananias Azurs sone die propheet van Gabaon in des Heeren huys voer die priesters, ende alle tvolck, segghende,

+ A

2

Dit seyt die Heere der heyrscaren die Godt van Israel. Ic heb des conincs van Babilonien iock heel ghebroken.

3

Noch twee iaren der daghen, ende ick sal werderom brenghen tot dese plaetse alle die vaten van des Heeren huys, die Nabugodonosor die coninck van Babilonien wech ghedraghen heeft van deser plaetsen, ende heeft die ouerghevoert in Babilonien.

4

Ende Iechoniam Ioacims sone den coninck van Iuda, ende alle die ouervoeringhe van Iuda die in Babilonien gheghaen zijn, sal ick wederom keeren tot dese plaetse, ⁺seyt die Heere, Want ick sal des conincs van Babilonien iock heel in stucken breken.

+ B

5

Ende Ieremias die prophete heeft gheseyt tot Hananiam den Propheet in die ooghen der priesters, ende in die ooghen van alle tvolck datter stont in des heeren huys,

6

ende Ieremias die Propheet heeft gheseyt, Amen. Alsoo moet die Heere doen. Die Heere wil v woerden verwecken die ghy ghepropheteert hebt, dat die vaten wederom moghen ghebracht worden in des Heeren huys, ende alle die ouervoeringhe van Babilonien tot dese plaetse,

7

maer nochtans hoort dit woert dat ick spreke in v ooren, ende in alle des volcks ooren.

8

Die propheten die voer my ende voer v gheweest hebben vanden beghinsele, ende die ghepropheteert hebben op veel landen, ende ouer groote rijcken. Van orloghe ende van verdruckinghe ende van hongher,

9

⁺Een propheet die peys te voren gheseyt heeft, als zijn woert coemt dan salemen kennen den propheet den welcken die Heere ghesonden heeft inder waerheyt.

+ C

10

Ende Hananias die propheet heeft die ketene ghenommen van Ieremias hals, ende hy heeft die ghebroken.

11

Ende Hananias heeft gheseyt in daenschijn van alle tvolck segghende, Dit seyt die Heere, Alsoo sal Nabugodonosor des coninck van Babilonien iock breken, nae twee iaren der daghen, van alder volcken halse. Ende Ieremias die Prophete is zijnen wech henen ghegaen.

12

Ende des Heeren woert is ghesciet tot Ieremiam, nae dat Hananias die prophete die ketene ghebroken hadde van Ieremias des propheets halse, segghende,

13

Gaet henen, ende ghy sult Hananie segghen, Dit seyt die Heere, Ghy hebt die houten ketenen ghebroken, ende ghy sult daer voer yseren ketenen maken.

14

⁺Want dit seyt die Heere der heyrscaren Israels Godt. Ick heb een yseren iock gheleydt op den hals van alle dese volcken, dat sij dienen souden Nabugodonosor den coninck van Babilonien, ende sij sullen hem dienen, ende daer bouen heb ick hem die beesten der eerden ghegheuen.

+ D

15

Ende Ieremias die propheet heeft gheseyt tot Hananiam den propheet, Hoort Hanania, Die Heere en heeft v niet ghesonden, ende ghy hebt dit volck doen betrouwen in een loghene. Daer om dit seyt die Heere,

16

Siet ick sal v seynden van daensicht der aerden, in dit iaer suldi steruen, want ghy hebt teghen den Heere ghesproken,

17

ende Hananias die propheet is ghestoruen in dat iaer in die seuenste maent.