Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺INt beghinsel van den rijcke Ioacims Iosias sone des conincs van Iuda, is dit woert ghesciet tot Ieremiam vanden Heere segghende.

+ A

2

Dit seyt die Heere tot my. Maect voer v banden ende ketenen, ende ghy sult die legghen in uwen hals.

3

Ende ghy sult die seynden totten coninck van Edom, ende totten coninck van Moab, ende totten coninck der kinderen van Ammon, ende tot den coninck van Tyrien, ende totten coninck van Sydon, doer die hant der boden die te Ierusalem ghecomen sijn tot Sedeciam den coninck van Iuda.

4

Ende ghi sult hen ghebieden dat sij tot hen heeren spreken. Dit seyt die Heere der heyrscaren Israels Godt, Dit suldi segghen tot uwen heeren.

5

Ick heb deerde ghemaect, ende die menschen, ende die beesten, die op daensicht der aerden zijn in mijn groote stercheyt, ende in mijnen wtghestrecten arm, ende ic heb die ghegheuen den ghenen die my in mijnen ooghen ghenoecht heeft.

6

Ende nu daerom heb ic alle dese landen ghegheuen in Nabugodonosor des conincs van Babilonien mijns knechts hant, ⁺daer toe heb ick ooc die beesten des velts ghegheuen datse hem dienen.

+ B

7

Ende alle die Heydenen sullen hem dienen, ende zijnen sone, ende zijns soens sone, tot dat zijns lants ende zijnen tijt come, ende veel volcken ende groote conincghen sullen hem dienen.

8

Maer het volck ende het rijck dat Nabugodonosor den coninck van Babilonien niet en dient, ende soo wie zijnen hals niet en buycht onder des conincs van Babilonien iock, op dat volck sal ict versoecken metten sweerde ende metten hongher, ende metter pestilencien, seyt die Heere, tot dat icse verniele in zijn hant.

9

Daer om ghy lieden en wilt niet hooren v propheten, ende v waersegghers ende die droomers, ende die bedieders wter voghelen sanck, ende die tooueraers die v lieden segghen. Ghy en sult den coninck van Babilonien niet dienen.

10

Want sij v loghenen propheteren dat sij v verre soude maken van uwen lande, ende dat sij wtdrijuen souden, ende dat ghy vergaen soudt.

11

Maer tvolck dat zijnen necke onderworpt onder des conincs van Babilonien iock, ende hem dient, dat sal ick laten gaen in zijn lant, seyt die Heere, ende het sal dat lant bouwen ende daer in woonen.

12

⁺Ende tot Sedeciam den coninck van Iuda heb ick ghesproken nae alle dese woerden segghende, Buyghet v halsen onder des conincs van Babilonien iock, ende dient hem, ende zijnen volcke, ende ghy sult leuen.

+ C

13

Waerom sult ghy ende v volck steruen metten sweerde, ende metten hongher, ende met die pestilencie, ghelijck die Heere ghesproken heeft, totten volcke dat niet dienen en wilt den coninck van Babilonien?

14

En wilt niet hooren die woerden der propheten die tot v segghen. Ghy en sult den coninck van Babilonien niet dienen, want sij spreken v loghenen.

15

Want ick en hebse niet ghesonden, seyt die Heere, ende sij propheteren in mijnen naem valselijck dat sij v wtdrijuen souden ende dat ghy vergaen soudt, soe wel ghy lieden als die propheten die v propheteren,

16

ende tot die priesters, ende tot dit volck heb ic ghesproken seggende, Dit seyt die Heere, En wilt niet hooren die woerden van uwen propheten, die v lieden propheteren segghende, ⁺Siet des Heeren vaten sullen wederkeeren van Babilonien nu ter stont.

+ D

17

Want sij propheteren v een loghene. Daer om en wiltse niet hooren, maer dient den coninck van Babilonien, opdat ghu leuen moecht. Waer om wort dese stadt tot een verwoestinghe ghegheuen?

18

Ende eest dat sij propheten zijn, ende dat des Heeren woert in hen is, soo laetse te ghemoete gaen den Heere der heyrscaren, dat die vaten die ghelaten waren in des Heeren huys, ende in des conincs van Iuda huys, ende in Ierusalem, niet en comen van Babilonien.

19

Want dit seyt die Heere der heyrscaren tot die columnen, ende tot die zee, ende tot die Basementen, ende tot die andere ghereetscappen die ghebleuen zijn in dese stadt,

20

die Nabugodonosor die coninck van Babilonien niet wech ghenomen en heeft, doen hy Iechoniam Ioacims sone den coninc van Iuda ouervoerde van Ierusalem in Babilonien, ende alle die edelste van Iuda en Ierusalem.

21

Want dit seyt die Heere der heyrscaren Israels Godt, tot die ghereetscap-

[p. *609]

pen die ghebleuen zijn in des Heeren huys, ende in des conincs van Iuda huys, ende in Ierusalem,

22

in Babilonien sullen zij ouerghevoert worden, ende daer sullen sij zijn totten dach van hen besoekinghe, seyt die Heere, ende ick sal die doen brenghen, ende werderom stellen in dese plaetse.