Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

INt beghinsel des rijcs van Ioacim Iosias sone des conincs van Iuda, ⁺is dit woert ghesciet vanden Heere segghende,

+ A

2

Dit seyt die Heere, Staet int voerhoff van des Heeren huys, ende ghy sult spreken tot alle die steden van Iuda, van die welcke sij comen om te aenbidden in des Heeren huys, alle die redenen die ick v beuolen hebbe, dat ghy die tot hen spreken soudt. En wilt het woert niet achterwaerts houden,

3

oft sij bijauontueren hoorden, ende bekeert worden een ieghelijck van zijnen quaden wech ende dat my berouwe van tquaet, dat ick dencke hen te doene om die quaetheyt haerder neersticheden.

4

Ende ghy sult tot hen segghen, Dit seyt die Heere. Eest dat ghy my niet en hoort, dat ghy wandelt in mijn wet, die ick v ghegheuen hebbe,

5

alsoo dat ghy die woerden van mijn dienaers die Propheten hoort, ⁺die ick tot v lieden ghesonden hebbe des nachts opstaende, ende bescickende, ende ghy en hebtse niet ghehoort.

+ B

6

Soo sal ick dit huys gheuen als Silo, ende dese stadt sal ick gheuen tot een vermalendijdinghe alle den natien der aerden.

7

Ende die priesters ende propheten ende alle tvolck hebben Ieremiam ghehoort dese woerden sprekende in des Heeren huys.

8

Ende doen Ieremias sprekende voleynt hadde alle dat hem die Heere beuolen hadde, dat hy spreken soude, tot alle den volcke, soo hebben hem die priesters ende propheten, ende alle tvolck gheuanghen ghenomen segghende,

9

Laet hem die doot steruen. Waerom heeft hy in des Heeren naem ghepropheteert segghende, Ghelijck Silo sal dit huys wesen, ende dese stadt sal verwoest worden, om datter gheen bewoonder en sal sijn? Ende alle tvolck is vergadert teghen Ieremiam in des Heeren huys.

10

⁺Ende die Princen van Iuda hebben dese woerden ghehoort, ende sij zijn opgheclommen van des conincks huys in des Heeren huys, ende sij hebben gheseten inden inganck van der poerten des nieuwe huys des Heeren.

+ C

11

Ende die priesters ende propheten hebben ghesproken tot die princen, ende tot alle tvolck segghende, Dese man is het ordeel der doot sculdich, want hy heeft ghepropheteert teghen dese stadt, alsoo ghy ghehoort hebt met uwen ooren.

12

Ende Ieremias heeft gheseyt tot alle die princen ende tot alle tvolck segghende. Die Heere heeft my ghesonden dat ick propheteren soude tot dit huys, ende tot dese stadt alle die woerden die ghy ghehoort hebt.

[p. *608]

13

Daer om maect nu v weghen, ende v neersticheden goet, ende hoort die stemme des Heeren ws Godts, ende de Heere sal berouw hebben van tquaet dar hy ghesproken heeft teghen v.

14

Maer siet ick ben in uwe handen, doet my dat goet ende recht is in v lieder ooghen.

15

⁺Maer nochtans weet ende bekent dat ghy (eest dat ghy my doodt) onnosel bloet sult leueren teghen v seluen, ende teghen dese stadt, ende haer bewoonders. Want die Heere heeft my inder waerheyt tot v ghesonden, dat ick in v ooren spreken soude alle dese woerden.

+ D

16

Ende die princen ende alle tvolck hebben gheseyt tot die priesters ende propheten. Dese man en is het ordeel des doodts niet sculdich. Want inden naem des Heeren ons Gods heeft hy tot ons ghesproken.

17

Hier om zijn daer mannen vanden ouders des lants opghestaen, ende hebben gheseyt tot alle die vergaderinghe des volcs sprekende,

18

Micheas van Morasthi heeft een propheet geweest in die daghen Ezechie des conincs van Iuda, ⁺ende hy seyde tot alle tvolck van Iuda segghende, Dit seyt die Heere der heyrscaren. Sion sal als eenen acker gheackert worden, ende Ierusalem sal tot eenen hoop steenen wesen, ende den berch des huys tot hoochden der bosschagien.

+ E

19

Heeft hem Ezechias die coninck van Iuda ende gheheel Iuda ter doot verwesen? En hebben sij niet den Heere ghevreest, ende des Heeren aensicht ghebeden, ende theeft den Heere berouwen van tquaet dat hy teghen henlieden ghesproken hadde? ⁺Daer om wy doen een groot quaet teghen onse zielen.

+ F

20

Ende daer was oock een man propheterende inden naem des Heeren. Vrias die sone Semei van Cariathiarim ende hy heeft ghepropheteert teghen dese stad, ende teghen dit landt ghelijck alle die woerden van Ieremias.

21

Ende die coninck Ioacim heuet ghehoort, ende alle zijn machtighe, ende princen alle dese woerden. Ende die coninck socht hem te dooden. Ende Vrias heuet ghehoort ende heeft heeft ghevreest, ende hy is ghevloden ende ghegaen in Egypten.

22

Ende die coninck Ioacim heeft mannen ghesonden in Egypten, ⁺Elnathan Achobors sone ende mannen met hem in Egypten.

+ G

23

Ende sij hebben Vriam wt Egypten gheleyt, ende hem ghebracht tot den coninck Ioacim, ende hy heeft hem metten sweerde gheslaghen, ende hi heeft zijn doot lichaem gheworpen in die grauen van den onnedelen ghemeynen volcke.

24

Hier om heeft die hant van Ahicam Saphans sone met Ieremia gheweest, dat hi niet gheleuert en soude worde in des volcs hant, ende dat sij hem dooden souden.