Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺HEt woert dat ghesciet is tot Ieremiam van alle tvolck van Iuda int vierde iaer Ioacims des soens Iosie des conincs van Iuda, dit is dierste iaer van Nabugodonosor den coninck van Babilonien.

+ A

2

Dwelck Ieremias die Propheet ghesproken heeft tot alle tvolck van Iuda, ende tot alle die bewoonders van Ierusalem, seggende,

3

Van dat derthienste iaer Iosie Amons sone des conincs van Iuda tot op desen dach toe, dit is het drijentwintichste iaer, soo is dwoert des Heeren tot my ghesciet, ende ic heb tot v lieden ghesproken des nachts opstaende ende sprekende, ende ghy en hebbes niet ghehoort.

4

Ende die Heere heeft tot v lieden ghesonden alle zijn dienaren die propheten, des morghens vroech opstaende ende seyndende, ende ghy en hebbes niet ghehoort, noch ghy en hebt v ooren niet gheneycht om te hooren als hy seyde.

5

Keert een ieghelijck wederom van zijnen quaden wech, ende van uwe alderquaedste ghedachten, ende ghy sult int lant woonen dat die Heere v ende uwen vaderen ghgheuen heeft, van die eewe ende tot in die eewicheyt.

6

⁺Ende en wilt niet gaen nae die vreemde goden, om die te dienen, ende hen te aenbidden, noch en verwect my ter gramscappen niet in die wercken uwer handen, ende ick en sal v niet pijnighen.

+ B

7

Ende ghy en hebt my niet ghehoort, seyt die Heere, om dat ghy my tot gramscap verwecken soudt in die wercken uwer handen, tot uwen quade.

8

Daerom dit seyt die Heere der heyrscaren. Om dat ghy nae mijn woerden niet ghehoort en hebt.

9

Siet ick sal seynden ende opnemen alle die natien vanden noorden lande, seyt die Heere, ende Nabugodonosor den coninck van Babilonien mijnen knecht, ende ick sal die brenghen tot op dit lant, ende op die ghene die dat bewoonen, ende ouer alle die natien die daer rontsomme zijn, ende ick salse dooden ende die stellen tot een verwonderinghe, ende een bespottinghe, ende tot eewighe wildernissen.

10

Ende ick sal wt hen lieden te niet doen die stemme der blijscappen, ⁺ende die stemme der vrolijckeyt, die stemme des brudegoms, ende die stemme der bruyt, die stemme vander molen, ende dlicht vanden lichtuate.

+ C

11

Ende alle dit lant sal wesen tot een woestijne ende een groote verwonderinghe, ende alle dese volcken sullen Nabugodonosor den concinck van Babilonien dienen tseuentich iaren.

12

Ende als die tseuentich iaren veruult sullen wesen, dan sal ick versoecken ouer den coninck van Babilonien, ende op dat volck, seyt die Heere, hen boosheyt, ende opder Chaldeen lant, ende ick sal die stellen tot eewighe woestijnen.

13

Ende ick sal tot op dat lant brenghen alle mijn woerden, die ic daer teghen ghesproken hebbe, alle datter ghescreuen is in desen boeck, al dat Ieremias ghepropheteert heeft teghen alle die Heydenen.

14

Want sij hebben dien ghedient als die Heydenen veel waren, ende groote coninghen, ende ick sal hen verghelden nae hen wercken, ende nae die maecselen van haren han-

[p. *607]

den.

15

Want aldus seyt die Heere der heyrscaren, die Godt van Israel. Neemt den kelck van desen wijn der rasender gramscappen van mijnder hant, ende ghy sult van dien scencken alle den Heydenen, tot die welcke ick v seynden sal.

16

Ende sij sullen drincken ende verbaest worden, ende sij sullen rasen van daenschijn des sweerts dwelck ick onder hen lieden seynden sal.

17

Ende ick heb den kelck ghenomen wt des Heeren hant, ende ick heb dien ghesconcken alle den Heydenen, tot die welcke die Heere my ghesonden heeft,

18

Ierusalem ende den steden van Iuda, ende haren coninghen, ende haren princen, om dat ick die gheuen soude tot een woestijne, ende tot een groote verwonderinghe ende tot een bespottinghe, ende tot een vermalendijdinghe, ghelijck desen dach is.

19

Pharaoni den coninck van Egypten, ende zijnen knechten, ⁺ende zijnen princen, ende alle zijnen volcke,

+ D

20

ende alle te samen int ghemeyne, alle den coninghen des lants Ansicidis, ende alle den coninghen des lants van Philisthijm, ende van Ascalon, ende van Gaza ende van Accaron, ende den ouerbleuelinghen van Azoten,

21

ende Idumeen, ende Moab, ende der kinderen Ammon.

22

Ende alle den coninghen van Thyrien, ende alle den coninghen van Sidon, ende den coninghen des lants der eylanden die ouer die zee zijn.

23

Ende Dedan, ende Thema, ende Buz, ende alle die ghene die thair aff ghescoren hebben.

24

Ende alle den coninghen van Arabien, ende alle den coninghen vant westen die in die woestijne woonen.

25

Ende alle den coninghen van Zambri, en alle den coninghen van Elam, ende alle den coninghen van die Meden,

26

ende oock alle den coninghen van den noorden van by ende van verre, ⁺eenen ieghelijcken teghen zijnen broeder, ende alle den rijcken der eerden die op haer aenschijn zijn, ende die coninck Sesach sal nae hen drincken.

+ E

27

Ende ghy sult tot hen segghen. Dit seyt die Heere der heyrscaren Israels Godt, Drinct ende wort droncken, ende braket wt ende valt, ende en staet niet op, van daensicht des sweerts dwelck ick onder v lieden seynden sal.

28

Ende als sij den kelck niet en willen nemen van v hant om te drincken, soe suldi tot hen segghen, Dit seyt die Heere der heyrscaren. Ghy sullet drinckende drincken.

29

Want siet in die stadt waer in mijnen naem aengheroepen is, sal ick beghinnen te pijninghen, ende suldi ghy lieden als onnosele ende vrij gaen? ghy en sult niet vrij gaen, want ick roep tsweert ouer alle die bewoonders der eerden, seyt die Heere der heyrscaren.

30

Ende ghy sult tot hen propheteren alle dese woerden, ende tot hen lieden segghen. ⁺Die Heere sal van die hoochde briesschen, ende van zijn heylighe wooninghe sal hy zijn stemme gheuen, hy sal briesschende briesschen ouer zijn cieraet daer sal eenen blijden sanck ghesonghen worden als der wijntreders, teghen alle die bewoonders der eerden.

+ F

31

Tgheluyt is ghecomen tot dat wterste der aerden. Want die Heere heeft een ordeel met den heydenen, hy wort gheordeelt met alle vleesch, die ongoddelijcke heb ick den sweerde gheleuert, seyt die Heere.

32

Dit seyt die Heere der heyrscaren. Siet daer sal een pijninghe wt gaen van deen volck tot in dandere, ende eenen grooten storm salder wt gaen van wterste der eerden.

33

Ende die verslaghene des Heeren in dien daghe sullen wesen van deen eynde der eerden tot haer ander eynde, sy en sullen niet bescreyt worden ende sij sullen niet opghenomen worden, noch begrauen worden, tot eenen meesthoop sullen sij op daensicht der eerden legghen.

34

⁺Huylt ghy herders ende roept, ende bestroyt v met asschen ghy edelste der cudden, want v daghen zijn veruult, dat ghy sult ghedoodt worden, ende v verstroynghen, ende ghy sult vallen als costelijcke vaten.

+ G

35

Ende die vlucht sal vergaen van die herders, ende die behoudenisse van die edelste der cudden.

36

Die stemme van der herderen gheroep, ende tgehuyl van die edelste der cudden, om dat die Heere hen weyden verdoruen heeft.

37

Ende die beemden des vreedts hebben tsamen stil ghesweghen van daensicht der gramscappen van des Heeren rasende torn.

38

Hy heeft als eenen leeuw zijn hutteken verlaten. Want hen landt is gheworden tot een verwoestinghe, van daensicht der gramscap van die duyne, ende van daensicht der gramscap van des Heeren rasenden torn.