Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺DIe Heere heeft mij ghetoont, ende siet twee coruen vol vijghen ghesedt voer des Heeren tempel. Nae dat Nabugodonosor die coninck van Babilonien ouer ghevoert hadde Iechoniam Ioacims sone den conicnk van Iuda, ende zijn princen, ende die constighe wercluyden, ende besluyters van Ierusalem, ende die ghebracht heeft in Babilonien.

+ A

2

Den eenen corff hadden vijghen bouen maten seer goet, ghelijck die vijghen vanden iersten tijt pleghen te sijne, ende den eenen corff hadde vijghen wter maten seer quaet, ⁺diemen niet eten en mocht, om dat sij quaet waren.

+ B

3

Ende die Heere heeft gheseyt tot my, wat siet ghy Ieremia? Ende ick heb gheseyt, Goede vijghen, seer goet, ende quade seer quaet, diemen niet eten en mach, omdat sij quaet zijn.

4

Ende dwoert des Heeren is tot my ghesciedt segghende,

5

Dit seyt die Heere Israels Godt. Ghelijck dese vijghen die goet sijn, alsoo sal ick bekennen die ouervoeringhe van Iuda, die welcke ick wtghesonden hebbe wt deser plaetsen, ⁺inder Chaldeen lant int goede.

+ C

6

Ende ick sal mijn ooghen op hen stellen om te versoenen, ende ic sal se werderom leyden in dit lant, ende ic salse timmeren ende niet verderuen, ende ic salse planten ende niet wt roeyen.

7

Ende ick sal hen een herte gheuen dat sij my kennen, dat ic die Heere ben, ende sij sullen my tot een volcke wesen, ende ic sal hen tot eenen Godt wesen, want sij sullen wederom tot my keeren in allen hen herte.

8

Ende ghelijc die alderquaetste vijghen diemen niet eten en mach, om dat sij quaet sijn, Dit seyt die Heere, alsoo sal ic Sedeciam den coninck van Iuda gheuen ende sijn princen ende dander van Ierusalem, ⁺die ouerghebleuen zijn in dese stadt, ende die int lant van Egypten woonen.

+ D

9

Ende ick salse gheuen tot een quellinghe ende pijninghe alle den rijcken vander eerden, tot een versmaetheyt ende tot een ghelijckenisse, ende tot een ghemeyn segwoert, ende tot een vermalendijdinghe, in alle die plaetsen tot die welcke icse wt gheworpen hebbe.

10

Ende ic sal onder hen senden tsweert, ende den hongher, ende die pestilencie, tot dat sij heel vernielt sullen wesen van den lande dat ic hen ende haren vaderen ghegheuen hebbe.