Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺VVee den herderen diet cudde van mijnder weyden vernielen ende verscoren, seyt die Heere,

+ A

2

Daer om dit seyt die Heere Israels Godt, tot die herders die mijn volck weyden. Ghy hebt mijn cudde verstroyt, ende hebt die wt gheworpen, ende ghy en hebt die niet besocht. Siet ick sal op v lieden besoecken die quaetheyt uwer beneerstinghen, seyt die Heere,

3

Ende ick sal die bleuelinghen van mijn cudde vergaderen van alle landen, tot welcken ick die sal wtghedreuen hebben, ende ick salse wederom keeren tot hen velden, ende sij sullen wassen ende vermenichfuldicht worden.

4

Ende ick sal ouer hen herders verwecken, ende die sullense voeden, ende sij en sullen voertaen niet meer vreesen, ende sij en sullen niet beanxt sijn, ende daer en sal niemant wten ghetale ghesocht worden, seyt die Heere,

5

Siet die daghen comen, seyt die Heere, ende ick sal Dauid een rechtuerdich spruytsel verwecken, ende die coninck sal regneren, ende sal wijs zijn, ⁺ende hy sal recht ende rechtuerdicheyt doen op deerde.

+ B

6

In dien daghen sal Iuda behouden worden, ende Israel sal ghetrouwelijck woonen, ende dat is den naem den welcken sij hen noemen sullen onse rechtuerdighe Heere.

7

Daerom siet die daghen comen seyt die Heere, ende men en sal voertaen niet meer segghen. Die Heere leeft, die de kinderen van Israel gheleydt heeft wten lande van Egypten. Maer,

8

Die Heere leeft die tsaet des huys van Israel wtgheleyt ende aen ghebracht heeft van dat noorden lant, ende van alle die landen, tot die welcke icse wtghedreuen hadde, ende sij sullen woonen in hen lant.

9

Tot die propheten. Mijn herte is heel ghebroken int midden van my, alle mijn ghebeente heeft ghebeeft, ick ben gheworden als een droncken man, als een man die verwonnen is vanden wijne, ⁺van des Heeren aensicht, ende van daensicht zijnder heyligher woerden.

+ C

10

Want die eerde is vol van ouerspeelders, want die eerde heeft truerich gheweest van daensicht der vermalendijnghe, die velden der woestijnen zijn drooghe gheworden, haren loop is quaet gheworden, ende hen stercheyt onghelijck.

11

Want die propheet ende priester zijn besmet gheweest, ende in mijn huys heb ick hen quaet gheuonden, seyt die Heere,

12

Daerom sal haerlieder wech zijn als een slibberinghe in duysternisse, want sij sullen ghestooten worden, ende daer in vallen, want ick sal op hen quade dinghen brenghen het iaer van hen versoeckinge, seyt die Heere,

13

Ende in die Propheten van Samarien heb ic dwaesheyt ghesien, ende sij propheteerden doer Baal, ⁺ende bedrooghen mijn volck Israel.

+ D

14

Ende in die propheten van Ierusalem heb ick ghesien die gelijckenisse der gheender die ouerspel doen, ende den wech der loghenen, ende sij hebben die handen der alderquaetster versterct, dat een ieghelijck niet en soude bekeert worden van zijn quaetheyt, sij zijn my alle gheworden als Sodoma ende haer bewoonders als Gomorrha.

15

Hier om seyt die Heere der heyrscaren tot die propheten. Siet ick salse spijsen met alsen, ende ick salse drencken met galle. Want van die propheten van Ierusalem is die besmettinghe ghecomen op alle die aerde.

16

Dit seyt die Heere der heyrscaren. En wilt der propheten woerden niet hooren, die v lieden propheteren, ende v bedrieghen, sij spreken het visioen haers herten, niet wt des Heeren mont.

17

Sy segghen den ghenen die my blasphemeren. Die Heere heuet ghesproken. Vrede sal v lieden zijn, ende tot eenen ieghelijcken die in zijns herten archeyt wandelt, hebben sij gheseyt. Op v lieden en sal gheen quaet comen.

18

⁺Want wie heefter teghenwoerdich gheweest in des Heeren raet, ende heeft ghesien, ende ghehoort zijn redene? Wie heeft zijn woert aenmerct, ende ghehoort?

+ E

19

Siet den storm van des Heeren verbolghenheyt sal wtgaen, ende een wtberstende tempeest sal op die hoofden der ongoddelijcker comen.

20

Den rasenden torn des Heeren en sal niet wederkeeren tot dat hijt doe, ende tot dat hy volbrenghe dat ghedachte zijns herten, in die laetste daghen suldi zijnen raet verstaen.

21

Ick en sandt die propheten niet, ende sij liepen, ick en sprack tot hen niet, ende sij propheteerden.

22

Waert dat sij ghestaen hadden in mijnen raet, ende hadden mijnen volcke te kennen ghegheuen mijn woerden, soo soude ic voerwaer hen affghekeert hebben van haren quaden wech, ende van hen alderquaetste ghedachten.

23

Meyndi dat ick een Godt ben van by seyt die Heere? ende niet een Godt van verre?

24

Sal een man verborghen worden int heymelijck ende dat ick hem niet sien en sal, seyt die Heere? En veruulle ick niet hemel ende aerde, seyt die Heere?

25

Ick heb ghehoort dat die propheten, propheteerende gheseyt hebben in mijnen naem loghenen, ende segghende. Ic heb ghedroomt, ick heb ghedroomt.

26

⁺Hoe lange is dit in die herten der propheten, die loghenen te voren segghen, ende propheteren die verleydinghen haers herten?

+ F

27

Die maken willen dat mijn volck mijns naems verghete, om hen droomen die welcke een ieghelijck tot zijnen naesten vertelt, ghelijck hen vaderen mijnen naem vergheten hebben om Baal.

28

Een propheet die eenen droom heeft, die vertelle dien droom, ende die mijn woert heeft die spreke mijn woert warachtelijck. Wat is tcaff te achten teghen die tarwe, seyt die Heere?

29

En zijn mijn woerden niet als vier seyt die Heere, ende als eenen hamer den steeen heel in stucken brekende?

30

Daer om siet ick spreke tot den propheten, seyt die Heere, die mijn woerden stellen een ieghelijck van sijnen naesten seyt die Heere,

31

Daer om siet ick seg totten propheten, seyt die Heere, die hen tonghen aennemen ende segghen. Die Heere

[p. *606]

seyt,

32

Siet ick seg tot die Propheten die loghenen droomen, seyt die Heere, die dese vertelt hebben, ende hebben mijn volck verleydt met hen loghene, ende in hen myrakelen, als icse niet ghesonden en hadde, noch hen beuolen en hadde, die mijnen volcke niet ghebaet en hebben, seyt die Heere,

33

Daerom ist dat v dit volck, oft eenich propheet oft priester vraecht segghende, Wat is des Heeren last? soo suldi tot hen segghen, waer toe dient v den last? Want ick sal v voerwaer wech worpen, seyt die Heere,

34

Ende die Propheet ende die priester ende tvolck datter seyt, Des Heeren last, op dien man sal ick versoecken, ende op zijn huys.

35

Dit suldi segghen een ieghelijck tot zijnen naesten ende tot zijnen broeder. Wat heeft die Heere gheantwoert? Ende wat heeft die Heere ghesproken?

36

⁺Ende den last des Heeren en salmen niet meer ghedencken. Want eenen ieghelijcken sal zijn woert eenen last wesen, ende ghy hebt verkeert die woerden des leuende Godts des Heeren der heyrscaren ons Godts.

+ G

37

Dit suldi segghen totten Propheet. Wat heeft v die die Heere gheantwoert? ende wat heeft die Heere ghesproken?

38

Maer ist dat ghy des Heeren last segghet, daer om, dit seyt die Heere. Om dat ghy dit woert gheseyt hebt, Des Heeren last, ende ick heb tot v lieden ghesonden segghende, En wilt niet segghen, Des Heeren last,

39

daer om siet ick sal v lieden draghende wech halen, ende ick sal v verlaten, ende die stadt die ick v ende uwen vaderen ghegheuen hebbe van mijn aensicht.

40

Ende ick sal v lieden gheuen tot een eewich verwijt, ende tot een eewighe scande die nemmermeer en sal doer verghetelijcheyt wtghewischt wordt.