Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺DIt seyt die Heere, Gaet nederwaerts in des concincs van Iuda huys, ende ghy sult daer spreken dit woert, ende segghen.

+ A

2

Hoort des Heeren woert ghy coninck van Iuda, die opden stoel van Dauid sidt, ghi ende v dienaers, ende v volck die ingaet doer dese poorten.

3

Dit seyt die Heere, Doet recht ende rechtuerdicheyt, ende verlost den ghenen die met ghewelt verdruct is van die handt des onrecht doenders, ende den vreemdelinck, ende die weese, ende die weduwe en wilt niet bedroeuen, oft en verdructse niet tonrecht, ende het oonnosel bloet en wilt niet wtstorten in dese plaetse.

4

Want ist dat ghy doende dit woerdt doet, soe sullen doer dese poorten coninghen ingaen van Dauids gheslachte sittende op zijnen throon, ende rijdende op waghenen, ⁺ende peerden, sij ende hen dienaers ende hen volck.

+ B

5

Ist dat ghy dese woerden niet en hoort, soo heb ick by my seluen ghesworen, seyt die Heere, dat dit huys sal tot een verwoestheyt wesen.

6

Want dit seyt die Heere ouer thuys des conincs van Iuda. Galaad ghy sijt my thooft van Libanus, ist dat ick v niet en stelle tot een verwoestheyt, tot onbewoonlijcke steden.

7

Endeick sal ouer v heylighen den man die dootslaet, ende zijn wapenen, ende sij sullen v wtghecoren ceder boomen aff houwen, ende die neder int vier worpen.

8

Ende daer sullen veel luyden doergaen doer dese stadt, ende een ieghelijck sal tot zijnen naesten segghen. ⁺Waer om heeft die Heere alsoo deser grooter stadt ghedaen?

+ C

9

Ende sij sullen antwoerden, Om dat sij tverbondt des Heeren haers Godts verlaten hebben, ende hebben vreemde goden aenbeden, ende hen ghedient.

10

En wilt den dooden niet beweenen, noch en maect gheen rouwich misbaer op hem met een ghescrey, beclaecht den ghenen die wt gaet, want hy en sal voertaen niet wederkeeren, noch hy en sal dlant zijnder gheboerten niet sien.

11

Want dit seyt die Heere, tot Sellum den sone Iosie den coninck van Iuda, die gheregneert heeft voor Iosia zijnen vader, die wtgehegaen is van deser plaetsen.

12

Hy en sal hier niet meer binnen comen, maer in die plaetse tot die welcke ic hem ouer gheuoert hebbe, daer sal hy steruen, ende dit lant en sal hy niet meer sien.

13

⁺Wee den ghenen die sijn huys timmert in onrechtuerdicheyt, ende zijn eetplaetsen niet int ordeel, zijnen vrient sal hy sonder sake verdrucken, ende zijnen loon en sal hy hem niet gheuen.

+ D

14

Die daer seyt, Ick sal my een wijt huys timmeren, ende ruyme eetcameren die zij seluen vensteren opendoet, ende maect die balcken der solderinghen van cederen, ende scildert die met rooden sinober.

15

Suldi regneeren om dat ghy v ghelijct by den cederboom? v vader en heeft hy niet gheten en ghedroncken, ende ghedaen ordeel ende rechtuerdicheyt, doen alst hem wel was?

16

Hy heeft die sake vanden armen ende behoeftighen gheordeelt hem te goede en was dat niet daer om, want hy my ghekent heeft seyt die Heere?

17

⁺Maer v ooghen ende v herte zijn ter ghiericheyt, ende om donnoosel bloet te storten, ende tot onrecht ende ten loop vanden quaden wercke.

+ E

18

Daerom dit seyt die Heere tot Ioacim den sone Iosie den concinck van Iuda. Sy en sullen hem niet bescreyen. Wee broeder, ende wee suster, sij en sullen hem te samen niet roepen. Wee Heere, ende wee edel man.

19

Met eens ezels begrauenisse sal hy begrauen worden, verrot ende verworpen buyten die poorten van Ierusalem.

20

Climt op Libanum ende roept, ende in Basan gheeft v stemme, ende roept tot die voerbijgaende, want alle v beminders zijn vernielt.

21

Ick heb tot v ghesproken in uwe ouervloedicheyt, ghy hebt gheseyt. Ick en sals niet hooren, ⁺dits uwen wech van uwer ioncheyt aen, want ghy en hebt mijn stemme niet ghehoort.

+ F

22

Allen v uwe herders sal den wint voeden, ende v lief hebbers sullen in die ghevanghenisse gaen, ende dan suldi bescaemt worden, ende ghy sult v scamen van alle uwe quaetheyt.

23

Ghy die op den Libano sidt, ende nestelt in die cederboomen, hoe hebdi te samen ghesucht als v die pijnen ouerghecomen waren, als die pijnen der barender vrouwe.

24

Ick leue seyt die Heere, want al waer Iechonias die sone Ioacim des conincs van Iuda

[p. *605]

eenen rinck in mijn rechte hant, soo sal ick hem daer wt trecken.

25

Ende ick sal v gheuen in die hant der gheender die v ziele soecken, ende in hen hant der welcker aensicht ghy ontsiet, ende in Nabugodonosors des conincs van Babilonien hant ende in die hant der Chaldeen.

26

Ende ick sal v ende v moeder die v ghebaert heeft seynden in een vreemt lant, daer ghy niet in gheboren en sijt, ende daer suldi steruen,

27

ende int lant waer toe sij hen ziele opheffen dat sij derwaerts wederkeeren souden, en sullen sij niet wederkeeren.

28

⁺Is dese man Iechonias een eerden ghebacken ende ghebroken vat? is hy een vat sonder alle wellusticheyt. Waer om zijn hy ende zijn saet, verworpen, ende verre wech gheworpen in een lant dant sij niet ghekent en hebben?

+ G

29

Aerde, aerde, aerde, hoort des Heeren woerdt.

30

Dit seyt die Heere, Scrijft desen man onvruchtbaer eenen man die in zijn daghen niet voerspoedich wesen en sal. Want wt sijnen sade en sal gheen man wesen, die op Dauids stoel sitte, ende die voerts meer macht hebbe in Iuda.