Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺HEt woert datter ghesciet is tot Ieremiam vanden Heere als die coninc Sedecias tot hem ghesonden heeft Phassur Melchias sone, ende Sophoniam den sone Maasie den priester

+ A

[p. *604]

segghende,

2

Vraecht voer ons den Heere. Want Nabugodonosor die conick van Babilonien strijdt teghen ons, oft die Heere bijauontueren met ons dede nae alle zijn wonderlijcheden, ende dat hy van ons trocke.

3

Ende Ieremias heeft tot henlieden gheseyt, Aldus suldi Sedecie segghen.

4

Dit seyt die Heere die God van Israel. Siet ic sal die orloochsche ghereertscapppen ommekeeren die in v lieder handen zijn, ende met die welcke ghy strijdt teghen den conicnk van Babilonien, ⁺ende teghen die Chaldeen, die v beleghen rontsomme die mueren, ende ick sal die vergaderen int midden van deser stadt.

+ B

5

Ende ick sal v bestrijden met een wtghestrecte hant, ende met eenen stercken arm, ende in een rasende gramscap, ende met verbolghentheyt, ende in eenen grooten torn.

6

Ende ick sal die bewoonders van deser stadt slaen, die menschen ende die beesten sullen van die groote pestilencie steruen.

7

Ende daer nae, seyt die Heere, sal ick gheuen Sedeciam den coninck van Iuda, ende zijn knechten, ende sijn volck die in dese stadt ouerghebleuen zijn vander pestilencien, ende vanden sweerde, ende den hongher in Nabugodonosor des conincs van Babilonien, ende in haerder vianden handen, ende in die hant der gheender die hen ziele soecken, ⁺ende hy salse slaen metten scerpe vanden sweerde, ende hy en sal niet ghebuycht worden, noch hy en sal niet sparen noch ontfermen.

+ C

8

Ende tot dit volck suldi segghen. Dit seyt die Heere, Siet ick gheue voer v lieden den wech des leuens, ende den wech der doot.

9

Soe wie in dese stadt woont die sal steruen doert sweerdt, ende den hongher, ende die pestilencie, maer wie wtgaet ende ouer vliedt tot die Chaldeen die v lieden belegghen, die sal leuen, ende zijn ziele sal hem wesen als eenen roof.

10

Want ic heb mijn aensicht ghestelt op dese stadt tot quaet, ende niet tot goet, seyt die Heere, In die handt vanden coninck van Babilonien sal die ghegheuen worden, ende hy salse metten viere verbranden.

11

Ende den huyse des conincs van Iuda.

12

Hoort des Heeren woert ghy huys van Dauid. ⁺Dit seyt die Heere, Ordeelt vroech het ordeel, ende verlost den ghenen die met ghewelt verdruct is wt die hant vanden onrecht doender, dat bijauontueren mijn verbolghentheyt niet wt en gae, als een vier, ende ontsteken en worde, ende datter niemant en sij die wtblussche om die quaetheyt van uwe beneerstinghen.

+ D

13

Siet ick spreeck tot v ghy bewoonstere der vaster ende veltachtigher valleyen, seyt die Heere die daer segghet. Wie sal ons slaen? ende wie sal in onse huysen gaen?

14

Ende ic sal ouer v versoecken nae die vrucht uwer beneerstinghen, seyt die Heere, ende ick salt vier ontsteken in zijnen bosch, ende dat salt al verslinden rontsomme hem.