Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde Phassur Emmers sone die Priester die een prince ghestelt was in des Heeren huys, heeft Ieremiam ghehoort dese woerden propheterende.

+ A

2

Ende Phassur heeft Ieremiam den Prophete gheslaghen, ende hy heeft hem inden veterstock ghesteken, die daer was in Beniamins ouerste poorte, in des Heeren huys.

3

Ende alst morghenstont gheworden was, soo heeft Phassur Ieremiam wtghebracht wten veterstock, ende Ieremias heeft tot hem gheseyt, Die Heere en heeft uwen naem niet ghenoemt Phassur, maer veruaertheyt van alle sijden.

4

Want dit seyt die Heere, Siet ic sal v tot een veruarenisse gheuen, v ende alle uwe vrienden, ende sij sullen vallen metten sweerde van haren vianden, ende v ooghen sullent sien, ende gheheel Iuda sal ick gheuen in des conincs van Babilonien hant, ende hy salse ouervoeren in Babilonien, ende hy salse metten sweerde slaen,

5

ende alle dat goet van deser stadt ende allen haren arbeyt, ende alle haer costelijcheyt, ende alle die scatten der coninghen van Iuda, ⁺sal ick gheuen in die handen haerder vianden, ende sij sullense beroouen, ende wech draghen, ende brenghen in Babilonien.

+ B

6

Maer ghy Phassur ende alle v huysghenooten sult in die gheuanghenisse gaen, ende in Babilonien suldi comen, ende aldaer suldi steruen, ende aldaer suldi begrauen worden, ghy ende alle v vrienden, den welcken ghy loghenen ghepropheteert hebt.

7

Ghy hebt my verleyt Heere, ende ick ben verleydt gheweest, ghy hebt stercker gheweest dan ick, ende ghy hebt my verwonnen, ick ben gheworden tot eenen spot alle den dach, sij bespotten my allegader.

8

Want ick spreke nu van langhe te voren luyde roepende boosheyt, ende verwoestheyt roep ick, ende des Heeren woert is my gheworden tot een verwijt, ende tot een bespottinghe alle den dach.

9

Ende ick heb gheseyt, Ick en sal zijns niet ghedachtich wesen, noch ick en sal voerts niet meer spreken in zijnen naem. ⁺Ende tis in mijn herte gheworden als een blakende vier, ende besloten in mijn ghebeente, ende ick worde flauw, niet connende verdraghen.

+ C

10

Want ic heb scimpernien van vele ghehoort, ende een veruaertheyt al rontsomme. Veruolchten ende laet ons hem veruolghen, van allen die mannen die mijn vreedtsamighe waren, ende mijn sijde bewarende, oft hy eenichsins mocht bedroghen worden, ende dat wy mochten machtich worden teggen hem, ende dat wy wrake van hem crijghen mochten.

11

Maer die Heere is met my als een sterck vechter, daer om sullen sij vallen die my veruolghen, ende cranck wesen, sij sullen crachtelijck bescaemt worden, om dat sij het eewich verwijt niet verstaen en hebben, dwelck nemmermeer en sal wtghewischt worden.

12

Ende ghy Heere der heyrscaren proeuer vanden rechtuerdighen, die die nieren ende therte siet. Laet my (dat bidde ic v) die wrake sien van hen lieden, ⁺want ic heb v mijn sake gheopenbaert.

+ D

13

Singt den Heere, loeft den Heere, want hy heeft die ziele van den armen verlost wt der quader hant.

14

Vermalendijt sij den dach daer ick in gheboren ben, den dach inden welcken mijn moeder my ghebaert heeft en sij niet ghebenedijt.

15

Vermalendijt sij die man die mijnen vader ghebootscapt heeft segghende, V is een manlijkc kint gheboren, ende heeft hem als met een blijscap verblijt.

16

Die mensch sij ghelijck die steden welck die Heere omgheworpen heeft, ende ten is hem niet berouwen, laet hem den roep des morghens hooren, ende tghehuyl in den tijt des middaechs,

17

die my niet ghedoot en heeft van mijn moeders lichaem, alsoo dat mijn moeder my een graff hadde gheworden, ende haer lichaem een eewighe ontfanghenisse.

18

Waer om ben ick wter moeder lichaem ghecomen, dat ick arbeyt ende smerte sien soude, ende dat mijn daghen in bescaemtheyt souden ouerghebrocht worden.