Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

DIt seyt die Heere, ⁺Gaet ende neemt eens potbackers eerden fleschken vanden ouders des volcs, ende vanden ouders der priesteren.

+ A

2

Ende gaet wt tot die valleye van Ennoms sone, die daer is by den inganck der potbackers poorte, ende ghy sult daer preken die woerden die ick tot v sal spreken.

3

Ende ghy sult segghen, hoort die woerden des Heeren ghy coninghen van Iuda, ende bewoonders van Ierusalem, dit seyt die Heeren der heyrscaren Israels Godt. Siet ick sal een lijden brenghen ouer dese plaetse, alsoo dat hem zijn ooren sullen tuyten wie dat hooren sal,

4

om dat sij my verlaten hebben, ende hebben dese plaetse vreemt

[p. *603]

ghehouden, ende hebben daer in vochtighe offerande ghedaen den vreemden goden, die welcke sij niet ghekent en hebben, ende hen vaders, ende die coninghen van Iuda, ende sij hebben dese plaetse veruult metten bloede der onnozelen.

5

Ende sij hebben die hoochden van Baalim opghetimmert, om hen kinderen metten viere te verbranden tot eenen brantoffer Baalim, dat ick niet gheboden en hebbe, noch ghesproken, noch ten is in mijn herte niet opghecomen.

6

Daer om siet die daghen sullen comen seyt die Heere, ende dese plaetse en sal niet meer ghenoemt worden Topheth, ende die valleye der kinderen van Ennom, maer die valleye der doodinghen.

7

Ende ick sal den raet van Iuda ende Ierusalem verstroeyen in dese plaetse, ende ick salse metten sweerde te neder worpen in daenschijn van haren vianden, ende in die hant der gheender die hen zielen soecken, ende ick sal hen doode lichamen gheuen den voghelen des hemels, ⁺ende den beeesten der aerden.

+ C

8

Ende ick sal dese stadt stellen tot een verwonderinghe, ende tot een bespottinghe, alle die daer voer by gaet sal hen seer verwonderen ende wispelen ouer alle haer plaghe.

9

Ende ick salse spijsen metten vleesche van haren sonen, ende metten vleesche van haren dochteren, ende een ieghelijck sal zijns vrients vleesch eten, int belegh ende in die benautheyt, waer in dat hen vianden, ende die hen ziele soecken hen besluyten sullen.

10

Ende ghy sult dat eerden flescken breken in dooghen der mannen die met v gaen sullen. Ende ghy sult tot hen segghen.

11

Dit seyt die Heere der heyrscaren, Alsoo sal ick dit volck, ende dese stadt al in stucken breken, als eens potbackers pot ghebroken wort, datmen niet meer heel maken en can, ende in Topheth sullen sij begrauen worden, om datter gheen ander plaetse en is om te begrauen.

12

Alsoo sal ick deser plaetsen doen, ⁺seyt die Heere, ende haren bewoonders, ende ick sal dese stadt stellen ghelijck Topheth.

+ D

13

Ende die huysen van Ierusalem, ende die huysen der coninghen van Iuda sullen wesen als die plaetse van Topheth onsuyuer, alle die huyse op der welcker daken sij sacrificie ghedaen hebben, alle den heyre des hemels, ende drancofferen gheoffert den vreemden goden.

14

Maer Ieremias is comen van Topheth, waer henen dat hem die Heere ghesonden hadde om te propheteren, ende hy heeft ghestaen int voerhoff van des Heeren huys, ende hy heeft gheseyt tot alle tvolck.

15

Dit seyt die Heere der heyrscaren Israels Godt. Siet ick sal brenghen op dese stadt, ende op allen haer steden, alle die quaden die ick teghen haer ghesproken hebbe, want sij hebben haren neck verhart, dat zij mijn woerden niet hooren en souden.