Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺DWoert dat ghedaen is tot Ieremiam van den Heere segghende.

+ A

2

Staet op ende gaet nederwaerts int potbackers huys, ende daer suldi mijn woerden hooren.

3

Ende ick ghinck neder in des potbackers huys, ende siet hy maecte een werck op die wiele,

4

ende het vat brack dat hy maecte vander eerden met zijn handen, ende omghekeert zijnde heeft hy daer een ander vat aff gemaect, alsoot hem ghenoechde in zijn ooghen dat hy maken soude.

5

Ende des Heeren woert is tot my gheschiet segghende.

6

En sal ick v lieden niet connen ghedoen ghelijck dese potbacker, seyt die Heere? Siet ghelijck die potaerde in des potbackers hant is, alsoo sijdi in mijn hant, ghy huys van Israel.

7

Onuersienlijck sal ick spreken teghen een volck ende teghen een conincrijck dat ick dat sal wtroeyen, ende verderuen, ende vernielen.

8

Ist dat dit volck penitentie doet van zijn quaet, ⁺dat ick teghen hen ghesproken hebbe, soe sal ick oock roouwe hebben van tqaet dat ick ghedacht heb dien te doen.

+ B

9

Ende ick sal onuersienlijck spreken van een volck ende rijck dat ick optimmeren sal, ende planten.

10

Ist dattet quaet doet in mijn ooghen, alsoe dattet mijn stemme niet en hoort, soo sal ick rouwe hebben van tgoet dat ick ghesproken hebbe hen te doen.

11

Daer om nu segt den mannen van Iuda ende den bewoonders van Ierusalem segghende, Dit seyt die Heere, Siet ick verdencke quaet teghen v lieden, ende ick peyse teghen v lieden een ghepeys, een ieghelijck keere weder om van zijnen quaden wech, ende maect recht v weghen, ende v naersticheden.

12

Die welcke hebben gheseyt, Wij hebben mishoept want wy sullen nae onse ghedachten gaen, ende een ieghelijck sal die archeyt van zijn quaet herte doen.

13

Daer om dit seyt die Heere, vraghet die Heydenen. Wie heeft sulcke grouwelijcke dinghen ghehoort, welck die maghet van Israel te vele ghedaen heeft?

14

Sal den sneuw van Libanus vergaen van den steen des ackers? ⁺oft machmen wtroeyen het wtberstende cout water, ende nederwaerts vloeyende?

+ C

15

Want mijn volck heeft mijns vergheten, te vergeefs vochtighe offerande doende, ende hen stootende in hen weghen, in die paden der werelt, om dat sij daer doer wandelen souden inden onghebaenden wech,

16

op dat hen lant worden soude tot een verwoestinghe, ende tot een eewighe bespottinghe, alle die doer haer vorbijgaet sal hem seer verwonderen, ende zijn hooft scudden.

17

Als eenen brandenden wint sal icse verstroeyen voer den viant, ick sal hen den rugghe ende niet het aensicht toonen inden dach van hen verderffenisse.

18

Ende sij hebben gheseyt, Coemt ende laet ons teghen Ieremiam ghedachten dencken, want die wet en sal niet vergaen vanden priester, noch den raet vanden wijsen, noch dwoert vanden Propheet, Coemt ende laet ons hem slaen metter tonghen, ende en laet ons niet hooren nae alle zijn redenen,

19

aenmerct Heere op my, ende hoort die stemme van mijne teghenpartijders.

20

Betaeltmen voer goet quaet, ⁺dat sij mijnder zielen een grachte ghgrauen hebben? Weest ghedachtich dat ick in v aenschijn ghestaen hebbe, om voer hen lieden goet te spreken, ende om v verbolghentheyt van hen te keeren.

+ D

21

Daer om gheeft hen kinderen ten hongher, ende gheleytse in die hant des sweerts, laet hen huysvrouwen wesen sonder kinderen, ende weduwen, ende laet hen mans verslaghen worden metter doot, laet hen jonghelinghen metten sweerde doersteken worden inden stijdt.

22

Laet den roep ghehoort worden van haren huysen, want ghy sult ouer hen den mordenaer haestelijck brenghen, want sij hebben een grachte ghegrauen dat sij my vangen souden, ende sij hebben stricken verborghen mijnen voeten.

23

Maer ghy Heere weet alle haren raet, teghen my ter doot, en wilt haerder boosheden niet ghenadich wesen, ende laet hen sonde van v aensicht niet wtghewischt worden, laetse tsamen vallen voer v aensicht, in den tijt van uwer rasender gramscap soo misbruyctse.