Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺DIe sonde van Iuda is ghescreuen met een yseren greffie in een Diamant naghel, wtghegraueert op die breetheyt haers herten, ende op die hornen van haren outaren.

+ A

2

Als hen kinderen sullen ghedachtich wesen haerder outaren ende haerder bosschelkens, ende der die gheloouerder boomen op die hooghe berghen, sacrificie doende int velt,

3

soo sal ick v stercheyt ende alle v scatten tot eenen roof gheuen, v hoochden om die sonden in allen uwe palen.

4

Ende ghy sult alleen verlaten worden van v erffenisse, die v ghegheuen hebbe, ende ick sal v doen dienen uwen vianden int dlant dat ghy niet en kent, want ghy hebt een vier ontsteken in mijn rasende gramscap, het sal tot inder eewicheyt bernen.

5

Dit seyt die Heere, Vermalendeyt is die mensch die hem betrouwet op eenen mensch, ende stelt het vleesch tot sijnen arm, ende wiens herte van den Heere scheydt.

6

Want hy sal wesen als die heyde in die wildernisse, ende hy en salt niet hen alst goet comen sal. Maer hy sal in de droochte woonen, ⁺in die wildernisse int sout lant, ende dat ombewoonlijck is.

+ B

7

Ghebenedijt is die man die inden Heere betrouwen heeft, ende die Heere sal sijn betrouwen sijn.

8

Ende hy sal wesen als een hout dat verplant is by die wateren, dat sijn wortelen sciet nae die vochticheyt, ende ten sal niet vreesen als die hitte coemt. Ende sijn loof sal groen wesen, ende inden tijt der droochten en salt niet besorcht wesen, noch ten sal tot gheenen tijden ophouden van vruchten voert te brenghen.

9

Dat herte des menschen is arch ende ongrondeerlijck, wie sal dat kennen?

10

Ick ben die Heere, therte ondersoeckende ende die nieren proeuende, die eenen ieghelijcken gheue nae sijnen wech, ende nae die vrucht sijnder vonden.

11

Het velthoen heeft ghebroedt tghene dat niet gheleyt en heeft, het heeft rijcdommen ghemaect, ende niet int ordeel, int midden sijnder daghen salt die verlaten, ende in sijn laetste salt onwijs wesen.

12

Den stoel van die glorie der hoocheyt vant beghinsel is die plaetse van onser heylichmakinghe.

13

⁺O Heere ghy sijt Israels verwachten, alle die v verlaten sullen bescaemt worden. Die van v sceyden, sullen in deerde ghescreuen worden, want sij hebben verlaten die adere der leuender wateren, den Heere.

+ C

14

Gheneest my Heere ende ick sal ghenesen worden, behoudt my ende ick sal behouden wesen, want ghy zijt mijnen loff.

15

Siet sij segghen tot v, Waer is des Heeren woert? latet comen.

16

Ende ick en ben niet verbaest gheweest v volghende die de herder zijt, ende des menschen dach en heb ick niet begheert, ghy weetet, dat wt mijnen lippen ghegaen is dat heeft oprecht gheweest voer v aensicht.

17

En wilt my niet wesen tot een veruaernisse, ghy mijn hope inden dach des lijdens.

18

Laetse bescaemt worden die my veruolghen, ende en laet my niet bescaemt worden, laet hen vreesen, ende en laet my niet vreesen, brengt ouer hen den dach des lijdens ende verderftse met een dobbel verderffenisse.

19

Dit seyt die Heere tot my. Gaet henen, ende staet

[p. *602]

in die poorte van die kinderen des volcs, waerdoer dat die coninghen van Iuda ingaen ende wtgaen, ende in alle die poorten van Ierusalem,

20

ende ghy sult tot hen segghen. Hoort des Heeren woort ghy conincghen van Iuda, ende gheheel Iuda, ende alle ghy bewoonders van Ierusalem, die door dese poorten ingaet.

21

Dit seyt die Heere, Bewaert v zielen, ende en wilt gheen lasten draghen op den sabboth dach, noch en brenght die niet doer die poorten van Ierusalem.

22

Ende en wilt gheen lasten worpen wt uwen huysen op den sabboth dach, ende alle werck en suldi niet doen. Heylicht den Sabboth dach, alsoo ic uwen vaderen gheboden hebbe.

23

Ende sij en hebbens niet ghehoort, noch sij en hebben hen ooren niet gheneycht, maer sij hebben haren neck verhardt, dat sij my niet hooren en souden, ende dat sij gheen onderwijsinghe ontfanghen en souden.

24

Ende tsal sijn, eest dat ghy my hoort, seyt die Heere, dat ghy gheen lasten in en draecht doer die poorten van deser stadt opden Sabboth dach, ende ist dat ghy den Sabboth dach heylicht, ⁺dat ghy daer in gheen werck en doet.

+ D

25

Soe sullen daer coninghen ende princen doer die poorten van deser stadt incomen, sittende op Dauids throon, ende rijdende op waghenen ende peerden, sij ende hen princen die mannen van Iuda ende die bewoonders van Ierusalem, ende dese stadt sal bewoont worden inder eewicheyt.

26

Ende sij sullen comen van die steden van Iuda, ende van rontsom Ierusalem, ende van dlant Beniamin, ende van die platte velt landen, ende vanden gheberchten, ende van den suyden brenghende heelbrantoffer, ende slachtoffer, ende spijsoffer, ende wieroock, ende si sullent brenghen tot een offerande in des Heeren huys.

27

Maer ist dat ghy my niet en hoort, dat ghy den Sabboth dach soudt heylighen, ende gheenen lasten draghet, ende dat ghy niet in en brenghet doer die poorten van Ierusalem, op den Sabboth dach, soo sal ick een vier ontsteken in haer poorten, ende dat sal die huysen van Ierusalem verslinden, ende ten sal niet wtghebluscht worden.