Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde dwoert des Heeren is tot my ghesciet seggende.

+ A

2

Ghy en sult gheen huysvrouwe nemen, ende ghy en sult gheen sonen noch dochteren hebben in dese plaetse,

3

want dit seyt die Heere, op die sonen ende dochteren die ghewonnen worden in dese plaetse, ende ouer hen moeders diese ghebaert hebben, ende ouer hen vaders van welcker gheslachte sij gheboren sijn in dit lant.

4

Met die

[p. *601]

dooden der siecheden sullen sij steruen, sij en sullen niet beweent worden, ende sij en sullen niet begrauen worden, tot eenen mesthoop sullen sij wesen op daensicht der aerden, ende metten sweerde ende vanden hongher sullen sij vernielt worden, ende hen doode lichamen sullen wesen tot aes den ghevoghelte des hemels, ende den beesten der aerden.

5

Want dit seyt die Heere. En wilt niet gaen int huuys des maeltijts, noch en gaet niet om te beweenen, noch en troostse niet, want ick heb mijnen vrede affghenomen van desen volcke, seyt die Heere, die bermherticheyt, ende bermhertighe wercken.

6

Ende die groote ende cleyne sullen steruen in dit lant, sij en sullen niet begrauen worden, noch beweent, noch sij en sullen hen niet snyden, noch daer en al gheen caluheyt ghemaect worden om henlieden.

7

⁺Ende sij en sullen onder hen lieden den beweenende gheen broot breken, om te vertroosten ouer den dooden, ende sij en sullen hen den dranck des kelcs niet gheuen, om te vertroosten ouer haerlieden vader ende moeder.

+ B

8

Ende int huys des maeltijts en wilt niet gaen om met hen lieden te sitten, ende teten, ende te drincken.

9

Want dit seyt die Heere der heyrscaren die Godt van Israel. Siet ick sal van deser plaetsen in uwe ooghen, ende in uwe daghen wechnemen die stemme der blijscappen, ende die stemme der vrolijcheit die stemme des brudegoms ende die stemme der bruyt.

10

Ende als dhi desen volcke alle dese woerden sult vercondicht hebben, ende sij v segghen. Waer om heeft die Heere op ons alle dit groot quaet ghesproken? welck is onse boosheyt ende welc is onse sonde die wy gesondicht hebben den Heere onsen Godt?

11

Soo suldi tot hen segghen. Om dat v vaders my ghelaten hebben, seyt die Heere, ende wech ghegaen sijn nae vreemde goden, ende hebben dien ghedient ende die aenghebeden, ⁺ende hebben my verlaten, ende en hebben mijn wet niet bewaert.

+ C

12

Maer ghy lieden oock hebt noch qualijcker ghedaen dan v vaderen, want siet een ieghelijck wandelt nae die archeyt van sijn quaet herte, dat hy my niet hooren en soude.

13

Ende ich sal v wtiaghen wt dit lant, int dlant dat ghy noch v vaderen niet en kent, ende aldaer suldi den vreemden goden dienen dach ende nacht, die v lieden gheen ruste gheuen en sullen.

14

Daer om siet die daghen sullen comen seyt die Heere, ende men en sal niet meer segghen, Die Heere leeft, die de kinderen van Israel wtgheleyt heeft wten lande van Egypten. Maer,

15

Die Heere leeft die de kinderen van Israel wt gheleyt heeft vant noorden lant, ende van alle die landen, tot die welcke ick hen wtghedreuen hadde, ende ick salse wederom leyden tot hen lant, dwelck ick haren vaderen ghegheuen hebbe.

16

Siet ick sal veel vischers seynden, ⁺seyt die Heere, ende die sullense visschen, ende daer naer sal ic hen veel iaghers seynden, ende die sullense iaghen van alle berghen, ende van alle hueuelen, ende van die holen der steenrootsen.

+ D

17

Want mijn ooghen sijn op allen hen weghen, sij en sijn niet verborghen van mijnen aensicht, ende hen boosheyt en is niet verborghen gheweest van mijnen ooghen.

18

Ende ick sal ten iersten verghelden hen tweeuondighe boosheden ende sonden, want sij hebben mijn lant besmet met die doode prijen van haren affgoden, ende met haren affgrijselijcheden hebben sij mijn erffenisse veruult.

19

Heere mijn stercheyt ende mijn cracht, ende mijn toevlucht inden dach der tribulacien tot v sullen die Heydenen comen van duyterste der aerden, ende sij sullen segghen, Voerwaer onse vaderen hebben die loghene beseten, ydelheyt die hen niet ghebaert en heeft.

20

Sal een mensch sij seluen goden maken ende die gheen goden en sijn?

21

Daer om siet ick sal hen toonen tot desen mael. Ick sal hen toonen mijn hant, ende mijn cracht, ende sij sullen weten dat mijnen naem is die Heere.