Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde die Heere heeft tot my ghesijt. Al waert dat Moyses ende Samuel voer my stonden, soo en is mijn ziele tot desen volcke niet, drijftse wt van mijnen aensichte ende laetse wt gaen.

+ A

2

Ist dat sij tot v segghen, Waer henen sullen wy wtgaen? Soe suldi tot hen segghen, Dit seyt die Heere, Die ter doot ghescict is ter doot, ende die ten sweerde ghescict is ten sweerde, ende die ten hongher ghescict is ten honger, ende die ter gheuanghenissen ghescict is ter gheuanghenissen.

3

Ende ic sal ouer henlieden versoecken vier manieren seyt die Heere, Tsweert ter doodinghen, ende die honden om te verscoeren, ende die voghelen des hemels, ende die beesten der eerden om te verslinden, ende te verstroyen,

4

ende ick salse gheuen tot een hitte alle den conincrijcken der aerden, om Manasses wille Ezechias sone des conincs van Iuda, ouer alle dat hy gedaen heeft in Ierusalem,

5

Want wie sal ws ontfermen Ierusalem? oft wie sal voer v bedroeft zijn? oft wie salder gaen om te bidden voer uwen vrede?

6

Ghy hebt my verlaten seyt die Heere, ghy sijt achterwaerts geghaen, ⁺ende ick sal mijn hant wtstrecken op v, ende ick sal v dooden, ick heb ghearbeyt biddende.

+ B

7

Ende ick salse verstroyen met eenen wanne in die poorten van eertrijck. Ick heb mijn volck ghedoodt, ende verstroyt, ende nochtans en zijn sij van haren weghen niet wederghekeert.

8

Sijn weduwen sijn my vermenichfuldicht bouen tsandt der zee. Ick heb henlieden ouerghebracht ouer des ionghelincs moeder eenen verderuere inden middach, ick heb op die steden ouersienlijck veruaertheyt ghesonden.

9

Sy is cranck gheworden die daer seuen kinderen ghebaert hadde, haer ziele is flau gheworden, die sonne is haer onderghegaen, alst noch dach was, sij is bescaemt gheweest, ende sij heeft haer ghescaemt, ende haer ouerghebleuene sal ick ten swaerde gheuen, voer daensicht van haren vianden, seyt die Heere.

10

Wee my mijn moeder, waer om hebt ghy my ghebaert eenen man des ghekijfs, eenen man des twists in alle dlant? ⁺Ick en heb ten woecker niet gheleent, noch niemant en heeft my ghewoeckert, sij vermalendijden my aller gader.

+ C

11

Die Heere seyt, Ist dat v bleuelinghen niet en sullen wesen ten goede. Ist dat ick v niet ontmoet en hebbe in den tijt des lijdens, ende inden tijt der quellinghen teghen den viant.

12

Sal het yser metten yser vanden noorden versaemt worden doer een verbont ende het coper?

13

V rijckdommen ende v scatten sal ick gheuen ten rooue om niet in alle uwe sonden, ende in alle uwe palen.

14

Ende ick sal uwe vianden aenbrenghen vanden lande dat ghy niet en kent. Want daer is een vier onsteken in mijnen rasenden torn, op v lieden salt bernen.

15

Ghy weetet Heere, weest mijns ghedachtich, ende versoect my, ende bescermt my van die ghene die my veruolghen, en wilt my in v verduldicheyt niet ontfanghen, weet dat ick voer v verwijt gheleden hebbe.

16

V redenen sijn gheuonden, ende ick hebse gheten. Ende v woert is my gheworden tot een blijscap mijns herten, want uwen naem is op my aengheroepen Heere,

17

⁺Godt der heyrscaren. Ick en heb niet gheseten in den raet der speelders, ende ick heb gheglorieert van daensicht uwer hant, ick sadt alleen, om dat ghy my veruult hadt met dreyghinghe.

+ D

18

Waerom is mijnen rouwe eewich gheworden, ende waer om heeft mijn wonde sonder hope van ghenesen gheweyghert ghenesen te worden? sij is my gheworden als een loghene der onghetrouwer wateren.

19

Hier om dit seyt die Heere, Ist dat ghi v bekeert, soe sal ick v bekeeren, ende ghy sult voer mijn aensicht staen, ende ist dat ghy tcostelijck sceydt vanden snooden, soe suldi als mijnen mont wesen, sij sullen selue tot v bekeert worden, ende ghy en sult tot hen niet bekeert worden.

20

Ende ick sal v desen volcke gheuen tot eenen metalen stercken muer, ende sij sullen strijden teghen v, ende sij en sullen v niet verwinnen. Want ick ben met v om v te behouden, ende om v te verlossen seyt die Heere,

21

Ende ick sal v verlossen wt die handt van die alderquaedste, ende ick sal v verlossen van die hant der stercker.