Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺HEt woort des Heeren dat ghesciet is tot Ieremiam, van die spraken der droocheyt.

+ A

2

Dat Ioetsche lant heeft gheweent, ende zijn poorten sijn veruallen, ende sij sijn verduystert in die eerde, ende den roep van Ierusalem is opgheclommen.

3

Die meeste hebben hen minste ghesonden ten watere, sij sijn ghecomen om te putten, sij en hebben gheen water gheuonden, si hebben hen vaten ydel wederom ghedraghen, si sijn bescaemt gheweest ende ghepijnicht ende si hebben hen hoofden bedect,

4

om die verwoestinghe der aerden, want daer en is gheenen reghen op deerde ghecomen, die ackerluyden sijn bescaemt gheweest, si hebben hen hoofden bedect,

5

want dat hinde baerde opt velt, ende het heuet achterghelaten, om datter gheen cruyt en was.

6

Ende die wilde ezelen hebben ghestaen in die steenrootsen, sij hebben den wint ghetrocken ghelijck die draken, hen ooghen hebben hen begheuen, om datter gheen cruyt en was,

7

eest dat onse boosheden ons antwoorden, Heere so doetet om uwen naem, want onse affkeeringhen sijn vele. Wij hebben v ghesondicht,

8

die verwachtinghe van Israel, ⁺zijn salichmaker inden tijt der tribulatien waerom suldi als een vreemdelinck wesen op die eerde, ende als een wandelaer affwijckende om te herberghen?

+ B

9

Waerom suldi wesen als een onghestadich man als een stercke die niet verlossen en can? maer ghy Heere sijt in ons, ende uwen naem is aengheroepen ouer ons, en verlaet ons niet.

10

Dit seyt die Heere desen volcke, dwelc bemint heeft zijn voeten te roeren, ende dat niet gherust en heeft, ende den Heere niet behaecht en heeft. Nv sal hy ghedachtich wesen haerder boosheden, ende hen sonden versoecken.

11

Ende die Heere heeft tot my gheseydt. En wilt voor dit volck niet bidden int goede.

12

Als sij vasten soo en sal ick hen ghebeden niet verhooren, ende eest dat sij brantofferanden ende slachofferanden offeren, soo en sal ic die niet ontfanghen, want ick salse metten seerde ende hongher, ende pestilencie vernielen.

13

Ende ick heb gheseydt. Ay ay ay Heere Godt, die propheten segghen hen. Ghy en sult gheen sweert sien, ende daer en sal gheenen dieren tijt onder v lieden wesen, maer warachtighen vrede sal hy v gheuen in dese plaetse. Ende die Heere heeft tot my gheseyt.

14

⁺Die propheten propheteren valsche-

+ C

[p. *600]

lijck in mijnen naem, ick en hebse niet ghesonden, ende ick en hebs hen niet gheboden, noch ick en heb tot hen niet ghesproken, een loghenachtich visioen, ende die bedrieghelijcke prophetie, ende die verleydinghe haers herten propheteren sij v lieden.

15

Hierom seyt die Heere vanden propheten, die in mijnen naem propheteren, die ic niet ghesonden en hebbe, segghende, Tsweert ende den dieren tijt en sal in dit lant niet sijn, Metten swerde ende metten hongher sullen die propheten vernielt worden.

16

Ende die volcken den welcken sij propheteren sullen gheworpen sijn in die weghen van Ierusalem van honger ende ende van sweert, ende daer en sal niemant sijn diese begraue, sij ende hen huysvrouwen, hen sonen ende hen dochteren, ende ick sal op hen wtstorten hen eyghen quaet.

17

Ende ghy sult tot henlieden segghen dit woert. Laet mijn ooghen tranen voertbrenghen, nacht ende dach, ende en laetse niet swijghen, want die maghet die dochter mijns volcs is met een groote verderffenisse verdoruen met een seer wtnemende quaede quetsuere.

18

⁺Ist dat ick wtgae tot die velden, siet daer sijn die verslaghene metten sweerde, ende ist dat ick in die stadt gae, siet soo sijn sij daer die wtghemercht sijn van hongher. Want die propheten ende priesters sijn wech ghegaen int lant dat sij niet en kenden.

+ D

19

Hebdi verworpende Iudam verworpen? oft heeft v ziele Sion veronwaerdicht? waer om hebdi ons dan gheslaghen, alsoo datter gheen ghesontheyt en is? Wy hebben vrede verwacht, ende daer en is gheen goet, ende den tijt der ghenesinghen, ende siet daer is verstooringhe.

20

Heere wy hebben onse ongoddelijcheden bekent, onser vaderen boosheden, want wy hebben teghen v ghesondicht.

21

En geeft ons niet ten verwijte om uwen naem, noch en maect ons niet een versmaetheyt des stoels uwer glorien, weest ghedachtich, dat ghy v verbont met ons niet crachteloos en maect.

22

Sijnder oock onder die ghesneden affgoden der Heydenen die reghenen? oft moghen die hemels slachreghenen gheuen? En sijt ghy niet die Heeren onse Godt, den welcken wy ghewacht hebben? want ghy hebt alle dese dinghen ghedaen.