Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *599]

Dat .xiij. Capittel.

1

⁺DIt seydt die Heere tot my. Gaet henen ende crijcht voor v een lijnen nedercleedt, ende ghy sult dat legghen om v lendenen, ende ghy en sult dat int water niet steken.

+ A

2

Ende ick heb een lijnen nedercleedt ghecreghen nae des Heeren woort, ende ick heb dat ghestelt om mijn lendenen.

3

Ende des Heeren woort is tot my gheschiet ten tweedenmael segghende.

4

Neemt dat nedercleedt dat ghi ghecreghen hebt, dwelc omtrent v lendenen is, ende opstaende gaet henen totten Euphraten, ende bercht dat aldaer, in een gat van die steenrootse.

5

Ende ick ben wech ghegaen, ende heb dat gheberghen in Euphrate ghelijck my die Heere beuolen hadde.

6

Ende tis ghesciet nae veel daghen, dat die Heere gheseyt heeft tot my. Staet op ende gaet totten Euphraten, ende neemt van daer dat nedercleedt, dat ick v beuolen hebbe dat ghi dat daer berghen soudt.

7

Ende ic ben wech ghegaen totten Euphraten, ende ic heb ghegrauen, ende heb ghenomen dat nedercleedt, vander plaetsen daer ict gheborghen hadde, ende siet dat nedercleet was heel verrot, alsoo dattet tot gheen ghebruyck bequaem en was.

8

Ende dwoort des Heeren is tot mi ghesciet segghende.

9

⁺Dit seyt die Heere. Alsoo sal ick doen rotten die hoouerdie van Iuda, ende die seer groote hoouerdie van Ierusalem.

+ B

10

Dit seer quaet volc die mijn woorden niet hooren en willen, ende wandelen in die archeyt haers herten, ende zijn wech ghegaen nae die vreemde goden, dat si hen dienen souden, ende hen aenbidden, ende si sullen wesen ghelijck dit nedercleet, dat tot gheen ghebruyck bequaem en is.

11

Want ghelijck een nedercleedt vast hangt aen des mans lendenen, also hadde ick aen my vast ghemaect, tgheheel huys van Israel, ende tgheheel huys van Iuda, seydt die Heere, dat sij my souden wesen tot een volck ende tot eenen naem, ende tot eenen loff, ende tot een glorie, ende sij en hebbent niet ghehoort.

12

Hierom suldi tot hen segghen dit woort. Dit seyt die Heere die God van Israel, alle flessche sal met wijne gheuult worden. Ende sij sullen tot v segghen. En weten wij niet dat alle flessche met wijne gheuult sal worden?

13

Ende ghy sult tot hen segghen. Dit seyt die Heere. Siet ick sal veruullen alle die bewoonders van desen lande, ende die coninghen die van Dauids stamme sitten op sijnen throon ende die priesters ende propheten, ende alle die bewoonders van Iherusalem, met dronckenheyt,

14

⁺ende ick salse verstroyen elcken man van sijnen broeder, ende die vaders ende die kinderen te samen, seyt die Heere. Ic en sal niet sparen, noch ick en sal niet toegheuen, noch ick en sal niet ontfermen dat icse niet en soude vernielen.

+ C

15

Hoort ende vaet metten ooren. En wilt v niet verheffen, want die Heere heuet ghesproken.

16

Gheeft den Heere uwen God glorie, eert doncker beghinne te werden, ende eer v voeten struyckelen aen die doncker berghen, ghy sult het licht verwachten, ende hi sal dat stellen in die scaduwe des doots, ende in een duysterheyt.

17

Ist dat ghy dat niet en hoort, soo sal mijn ziele int heymelijcke weenen van daensicht der hoouerdien, weenende sal sij weenen, ende mijn ooghe sal tranen wtlaten, om dat des Heeren cudde gheuanghen is.

18

Segt den coninck ende der coninghinnen. Wert vernedert, sidt, want die croone uwer glorien is van uwen hoofde nederghedaelt.

19

Die steden vant suyden sijn ghesloten, ende daer en is niemant diese open doe, gheheel Iuda is ouergheuoert met een volcomen oueruoeringhe.

20

Heft v ooghen op, ende besiet die vanden noorden coemt, waer is tcudde dat v ghegheuen is, v edel vee?

21

⁺Wat suldi seggen als hy v besoecken sal? want ghi hebtse gheleert teghen v, ende ghy hebtse onderwesen teghen v hooft, en sullen die pijnen v niet beuanghen als een vrouwe? die in barens noode is?

+ D

22

Ist dat ghy segt in v herte. Waerom zijn mi dese dinghen gecomen? Om die menichte uwer ongherechticheyt zijn v scamelijcheden ontdect, die planten uwer voeten zijn besmet.

23

Ist dat een Moriaen mach zijn huyt veranderen, oft eenen lupaert zijn ghespekeltheyt, soo sult ghy lieden oock moghen weldoen, als ghy quaet gheleert hebt.

24

Ende ick salse verstroeyen als stoppelen die van den wint wech ghenomen worden in die woestijne.

25

Dits v lot ende het deel uwer maten van my, seydt die Heere, want ghy hebt mijns vergheten, ende ghy hebt betrouwen ghehadt in die loghene.

26

Daerom heb ick v dgyen ontdect teghen v aensicht, ende v scandelijcheyt is gheopenbaert,

27

v ouerspelen, ende v wrenschen, die misdaet uwer oncuysscheyt, op die hueuelen inden acker heb ick v affgrijselijcheden ghesien. Wee v Ierusalem, ghy en sult nae my niet ghesuyuert worden. Hoe langhe salt noch zijn?