Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺GHy zijt rechtuerdich Heere, eest dat ic met v disputere, maer nochtans sal ick rechtuerdighe dinghen tot v spreken. Waerom wort der ongoddelijcker wech voorspoedich, waerom is wel alle den ghenen die ouertreden ende booslijck doen?

+ A

2

Ghy hebtse gheplant ende sij hebben wortelen ghescoten, sij nemen toe, ende brenghen vrucht voorts, ghy zijt haren mont nae by, ende verre van hen nieren.

3

Ende ghy Heere kent my, ghy heb my ghesien, ende ghy hebt mijn herte met v gheproeft. Verghadertse als een cudde ter slachofferanden, ende heylichtse inden dach der doodinghen.

4

Hoe langhe sal die eerde droeue wesen, ende hoe lange sal tcruyt van tgheheel lantscap verdorren, om die quaetheyt der gheender die daer in woonen? tghedierte is vernielt ende tgheuoghelte, want sij hebben gheseydt. Hy en sal ons wterste niet sien.

5

Eest dan ghy metten voetuolcke loopende ghearbeyt hebt, ⁺hoe sult ghy moghen te strijde loopen metten peerden? ende als ghy int lant des vreedts vrij sonder sorghe gheweest hebt, wat suldy doen in die hoouerdie der iordanen?

+ B

61

Want v broeders, ende ws vaders huys, die hebben oock selue ghestreden teghen v, ende sij hebben nae v gheroepen met volder stemmen, en ghelooft henlieden niet, als sij v goede dinghen spreken.

7

Ick heb mijn huys verlaten, ick heb mijn erffenisse ghelaten ick heb mijn beminde ziele ghegheuen in die handt van haren vianden.

8

Mijn erffenisse is my gheworden als eenen leeuw int bosch, si heeft teghen my een stemme ghegheuen, daerom heb ickse ghehaedt.

9

Is mijn erffenisse my eenen voghel van versceyden colueren? oft ist eenen voghel ouer al gheuerwet? Coemt ende wert vergadert alle ghy beesten der eerden, haest v om te verslinden.

10

⁺Veel herders hebben mijnen wijnghaert verdoruen, sij hebben mijn deel vertreden, sij hebben mijn lustich deel ghegheuen tot een verlaten plaetse der woestijnen.

+ C

11

Sij hebben die ghestelt tot een verstroyinghe, ende si heeft ouer my gheweent, met een verwoestinge is alle die eerde verwoest, want daer en is niemant diet metter herten ouerdenct.

12

Op alle die weghen der woestijnen zijn die verderuers ghecomen, want des Heeren sweert sal verslinden van dat wterste der eerden tot haer wterste, daer en is gheenen vrede allen vleessche.

13

Sij hebben tarwe ghesaeyt ende doornen ghemaeyt, sij hebben een erffenisse ontfanghen, ende ten sal hen niet baten, ghy sult bescaemt worden van uwen vruchten om die gramschap vanden rasenden toren des Heeren.

14

Dit seyt die Heere teghen alle mijn alderquaetste ghebueren, ⁺die de erffenisse aentasten die welcke ick bedeylt hebbe mijnen volcke Israel. Siet ic salse wtroeyen wt haren lande, ende het huys van Iuda sal ick wttrecken wt dat midden van henlieden.

+ D

15

Ende als ick hen sal wtghetrocken hebben, soo sal ick omghekeert worden, ende sal haerder ontfermen, ende ick salse wederom leyden den man in zijn erffenisse ende den man in zijn lant.

16

Ende tsal wesen, ist sake dat sij gheleert zijnde leeren die weghen mijns volcs dat sij sweren by mijnen naem. Die Heere leeft, ghelijck si mijn volck hebben leeren sweren in Baal, soo sullen si ghetimmert worden int midden mijns volcs.

17

Maer eest sake dat si niet hooren, soo sal ic dat volc wtroeyen met een wtroeyinghe, ende met een verderffenisse seydt die Heere.