Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺HEt woort dat ghesciet is vanden Heere tot Ieremiam segghende.

+ A

2

Hoort die woorden van desen verbonde, ende spreect tot die mannen van Iuda, ende tot die bewoonders van Ierusalem

3

ende ghy sult tot hen segghen. Dit seydt die Heere die Godt van Israhel. Vermalendijt sij die man die die woorden van dit verbont niet en hoort,

4

dwelc ic gheboden hebben uwen vaderen, inden dach als ickse wtleydde wten lande van Egipten, wten yseren forneyse seggende. Hoort mijn stemme ende doet alle die dingen die ic v ghebiede, ende ghy sult my tot een volc sijn, ende ic sal v tot eenen Godt sijn.

5

Dat ic verwecke den eedt den welcken ic ghesworen hebbe uwen vaderen, dat ic hen geuen soude een lant vloeyende van melc ende honich, alsoot desen dach is.

6

Ende ic heb gheantwoort ende geseyt. Amen Heere. Ende die Heere heeft tot my gheseyt. Roept luyde alle dese woorden in die steden van Iuda, ende buyten Iherusalem segghende. Hoort die woorden van desen verbonde ende doet die,

7

want ic heb uwe vaders betuyghende betuycht, inden dach als ickse gheleyt hebbe wten lande van Egipten tot

[p. *598]

desen dach toe, ⁺des morghens vroech opstaende heb icse betuycht ende heb geseyt. Hoort mijn stemme

+ B

8

ende sij hebben niet ghehoort, noch sij en hebben hen ooren niet gheneycht, maer sij sijn wech ghegaen, een ieghelijck in die boosheyt van sijn quaet herte, ende ick heb ouer hen ghebracht alle die woorden van dit verbont, dwelc ick gheboden hebbe dat zijt doen souden, ende si en hebbens niet ghedaen.

9

Ende die Heere heeft tot my gheseyt, daer is een ghesworen muyterie gheuonden onder die mannen van Iuda, ende onder die bewoonders van Ierusalem.

10

Sij zijn wederghekeert tot die ierste boosheden haerder vaderen, die niet en hebben willen hooren mijn woorden, ende hier om hebben die oock wech ghegaen nae die vreemde goden, dat sij hen dienen souden. Dat huys van Israel ende het huys van Iuda hebben mijn verbont van onweerden ghemaect, dwelc ick vast ghemaect hadde met haren vaderen,

11

daerom dit seydt die Heere. Siet ick sal ouer hen quade dinghen brenghen, daer sij niet en sullen connen wtcomen, ende sij sullen tot mi roepen, ende ick en salse niet verhooren.

12

Ende die steden van Iuda ende die bewoonders van Ierusalem sullen gaen, ende roepen tot hen den welcken sij vochtighe offeranden doen, ⁺ende sij en sullen hen niet verlossen in den dach van hen verdriet,

+ C

13

want nae tghetal van uwen steden, waren v goden o Iuda, ende nae tghetal der weghen van Iherusalem hebdi die outaeren der scandelijcheden ghesteldt, outaeren om Baalim offerande te doen.

14

Daerom en wilt ghy niet bidden voor dit volck, ende en neemt gheenen lof, ende ghebedt aen voor henlieden, want ic en salt niet verhooren ten tijde van haren roep tot my, inden tijt van haren lijden.

15

Wat eest dat mijn beminde in mijn huys veel groote misdaden ghedaen heeft? sal dat heylich vleesch v quaetheden van v affnemen, in die welcke ghy gheglorieert hebt?

16

Eenen weeldigen olijfboom schoone, vruchtbarich, ende wel ghedaen heeft die Heere uwen naem ghenoemt, tot die stemme van een groote sprake heefter een vier in haer ontsteken gheweest, ende alle sijn spruytsels zijn verbrant gheweest.

17

Ende die Heere der heyrscaren die v gheplant heeft, heeft op v quaet ghesproken, om die quaeden des huys van Israhel ende des huys van Iuda, die welcke sij hen seluen ghedaen hebben om my te terghen, offerende natte sacrificien Baalim.

18

⁺Maer ghy Heere hebbet my ghethoont, ende ic hebt ghekent ghy hebt my hen naersticheden bewesen.

+ D

19

Ende ick was als een saechtmoedich lam dat ghedraghen wort ter slachoffer, ende ick en hebt niet gheweten dat sij raden op my ghedacht hadden segghende. Laet ons hout in zijn broot doen, ende laet ons hem wtscrabben van dlant der leuender, ende en laet sijnen naem niet meer vermaent worden,

20

Maer ghy Heere Sabbaoth die rechtuerdelijck ordeelt, ende proeft die nieren ende die herten, laet my v wrake sien van henlieden. Want v heb ick mijn sake gheopenbaert.

21

Daerom seyt dit die Heere tot die mannen van Anathoth, die v ziele soecken ende segghen. Ghy en sult niet propheteren inden naem des Heeren, ende ghy en sult niet steruen in onse handen.

22

Daerom dit seyt die Heere der heyrscharen. Siet ick sal versoec doen op henlieden, die ionghelinghen sullen steruen metten sweerde, hen sonen ende hen dochteren sullen van honger steruen,

23

ende daer en sullen gheen bleuelinghen wesen van henlieden, Want ick sal een quaet brenghen ouer die mannen van Anathoth, het iaer van haerlieder versoeckinghe.