Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺HOort het dwoort dat die Heere ghesproken heeft ouer v lieden ghy huys van Israel.

+ A

2

Dit seyt die Heere. Nae die weghen der Heydenen en wilt niet leeren, ende van die teekenen des hemels en wilt niet vreesen, die de Heydenen vreesen,

3

want die wetten der volcken zijn ydel, want het hantwerc des wercmans heeft den boom des wouts affghehouwen met een bijl,

4

met siluer ende gout heeft hy dat verciert, met naghelen ende hameren heeft hijt te samen geuoecht, dat niet van een sceyden en soude.

5

In die ghelijckenisse van eenen palmboom sijn sij ghemaect, ende sij en sullen niet spreken, si sullen al dragende wech genomen worden want si en connen niet gaen, daerom en wilt die niet vreesen, want sij en moghen noch qualijc noch wel doen,

6

ws ghelijc en is niemant Heere. Ghi sijt groot, ende groot is uwen naem in stercheyt,

7

Wie en sal v niet vreesen o ghy coninc der volcken? want die cierlijcheyt is uwe onder alle die wijse der Heydenen, ⁺ende in alle hen rijcken en isser niemant ws ghelijc.

+ B

8

Te samen sullen die wijse ende die onwijse gheproeft worden, die leeringhe haerder ydelheyt is een hout.

9

Omwonden siluer wort van Tharsis ghebracht, ende tgout van Ophaz, des constenaers werc, ende die hant des metaelgieters, iacinthus ende purpure is hen cleedinge. Alle dese sijn der constigher wercluyden werc,

10

maer die Heere is een warachtich God, hi is een leuende God ende een eewich coninc van sijn verbolghentheyt sal deerde beroert worden, ende die Heydenen en sullen sijn dreyghinge niet verdragen.

11

Hierom suldi hen aldus segghen. Die goden die de hemelen ende deerde niet ghemaect en hebben, moeten vergaen vander eerden, ende van tghene dat onder den hemel is.

12

Die deerde maect in sijn stercheyt die de werelt bereyt in zijn wijsheyt, ende in sijn voorsienicheyt die hemele wtspandt.

13

Tot zijn stemme gheeft hy een menichte der wateren inden hemel, ende hi verheft die neuelen van die wterste der eerden, ⁺hy maect die blixemen tot regenen, ende hy brengt den wint wt sijn scatten.

+ C

14

Alle mensch is dwaes gheworden van die wetenheyt, alle wercman is bescaemt gheweest in dat ghesneden affgods beelt want het is valsch dat hy ghegoten heeft, ende in hen en is gheenen gheest.

15

Het sijn ydel dinghen, ende een werck weerdich om te belachen, inden tijt haerder vloeckinghe sullen sij vergaen.

16

Desghelijcs en is Iacobs deel niet, want die alle dinghen ghemaect heeft, hy eest selue, ende Israel is die roede van sijnder erffenissen. Die Heere der heyrscaren is sijnen naem.

17

Vergadert vander eerden v bescaemtheyt, die int belegh woont,

18

want dit seyt die Heere. Siet ic sal die bewoonders van desen lande verre worpen te deser reyse, ende ic salse quellen, also dat si niet en sullen gheuonden worden,

19

Wee my van mijnder quetzinghe, mijn plaghe is dalderquaetste. Maer ic heb gheseyt. Waerlijc dit is mijn crancheyt, ende ick salse draghen,

20

Mijn tabernakel is verdoruen ende alle mijn zeelkens sijn van een ghebroken, mijn kinderen sijn wtgheghaen van my, ende sij en sijn niet meer, ⁺ende daer en is niemant die voortaen mijn tente wtspanne, ende mijn vellen oprechte,

+ D

21

want die herders hebben dwaselijc ghedaen, ende den Heere en hebben sij niet ghesocht, daerom en hebben sijt niet verstaen ende alle hen cudde is verstroeyt.

22

Siet die stemme des ghehoors is ghecomen, ende een groote beroerte vanden noorden lande, dat hy die steden van Iuda stelle in verwoestheyt, ende tot een woonstede der draken.

23

Ick weet wel Heere dat eens menschen wech in sijn macht niet en is, noch ten is des mans macht niet dat hy wandele, ende te rechte bescicke sijn wegen.

24

Straft my Heere, maer nochtans int ordeel, ende niet in v rasende gramscap, dat ghy my by auontueren niet te niete en brenget.

25

Stort v verbolgentheyt wt op die Heydenen die v niet ghekent en hebben, ende op die lantscappen die uwen naem niet aengheroepen en hebben, want sij hebben Iacob gheten, ende hem verslint, ende si hebben hem heel verteert, ende sijn cierlijcheyt hebben sij verstroeyt.