Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺VIe sal mijnen hoofde water gheuen, ende mijnen ooghen een fonteyne der wateren, ende ic sal beweenen dach ende nacht die gedoode van mijns volcs dochter?

+ A

2

Wie sal my gheuen in die woestijne een herberghe der wandelaren, ende dat ick mijn volc verlate, ende van hen sceyde? want het sijn alle ouerspeelders, een vergaderinge der ouertreders.

3

Ende si hebben hen tonghe wtgespannen als eenen boge der loghenen, ende niet der waerheyt, si zijn versterct op deerde, want si sijn van deen quaet tot den anderen wtgegaen, ende mi en hebben si niet gekent, seyt die Heere.

4

Een iegelijc wachte hen seluen van sijnen naesten, ende hi en hebbe gheen betrouwen in elcken sijnen broeder, want elck broeder sal vertredende vertreden,

5

ende elc vrint sal bedrieghelijc wandelen. ⁺Ende een man sal sijnen broeder bespotten ende si en sullen die waerheyt niet spreken, want si hebben hen tonghe gheleert loghenen spreken, om onrechtelijck te doen hebben si ghearbeydt.

+ B

6

V wooninghe is int midden des bedrochs, int bedroch en hebben si my niet willen kennen, seyt die Heere.

7

Daerom dit seyt die Heere der heyrscaren. Siet ick salse smelten ende ick salse proeuen, want wat sal ick anders doen van daensicht der dochter mijns volcs?

8

Eenen wondende pijl is hen tonghe, si heeft bedroch ghesproken in haren mont spreect si vrede met haren vrint, ende heymelijc stelt si hem laghen.

9

En sal ic ouer dese dinghen niet versoecken, seyt die Heere? oft en sal in sulc volc mijn ziele haer niet wreken?

10

Op die berghen sal ic een weeninge ende een claghinge aennemen, ⁺ende op die scoone plaetsen der woestijnen een iammerlijc geclach, want si verbrant sijn, om datter gheen man en is die daer door gaet, ende si en hebben die stemme des besitters niet ghehoort, vanden vogel des hemels tot dat cleyn vee toe sijn si al ouergeuaren ende wechgegaen.

+ C

11

Ende ic sal Ierusalem gheuen tot hoopen des sants, ende tot nesten der draken, ende die steden van Iuda sal ick gheuen ter verwoestinghe, om datter gheen bewoonder en is.

12

Wie isser een wijs man die dat verstae, ende tot wien mocht dwoort vanden mont des Heeren ghescieden, dat hi dit vercondige, waerom dat die aerde vergaen is, ende verbrant als die woestijne, om datter niemant en is die daer door gae.

13

Ende die Heere heeft gheseyt om dat si mijn wet verlaten hebben, die ic hen ghegeuen hebbe, ⁺ende en hebben mijn stemme niet gehoort, ende en hebben daer in niet ghewandelt,

+ D

14

ende si sijn wechghegaen nae die boosheyt haers herten, ende nae Baalim dwelck si gheleert hebben van haren vaderen.

15

Daerom dit seyt die Heere der heyrscaren, die Godt van Israel. Siet ick sal dit volck spijsen met alsen, ende ick sal hen te drincken gheuen water van galle.

16

Ende ick salse verstroeyen onder

[p. *597]

die Heydenen die sij niet ghekent en hebben, noch hen vaders, ende ick sal na hen tsweert senden, tot dat si vernielt sullen wesen.

17

Dit seyt die Heere der heyrscaren. ⁺Aenscouwet ende roept die beclagherssen, dat si comen, ende sendt tot die vrouwen die wijs zijn, ende dat si haestelijck comen,

+ E

18

ende hen haesten, ende ouer ons een beclaghinghe aennemen, laet onse ooghen tranen voortsbrenghen, ende laet ons oochscelen van wateren nederuloeden,

19

want een stemme des clachtich beweenens is ghehoort van Sion. Hoe seer sijn wij verdoruen ende bescaemt? om dat wij dlant verlaten hebben want ons tabernakelen zijn afgheworpen.

20

Daerom hoort ghy vrouwen het woort des Heeren, ende laet v oore vaten die sprake zijns monts, ende leert v dochteren die beclaghinge, ⁺ende een ieghelijc haer gebuerinne die clachtige beweeninge,

+ F

21

want die doot is opgeclommen door onse vinsteren, si is gegaen in onse huysen om te vernielen die cleyn kinderen van buyten die iongelinghen van die straten.

22

Spreect dit seyt die Heere. Ende dat doode lichaem eens menschs sal vallen als drec op daenschijn des lants, ende als hoy achter des maeyers rugge, ende daer en is niemant diet vergadere.

23

Dit seyt die Heere. Die wijse en beroeme hem niet in zijn wijsheyt ende die stercke glorieere in zijn stercheyt niet, ende die rijcke en glorieere in sijn rijcdommen niet,

24

maer die glorieert sal daer in glorieeren, ⁺dat hy my weet ende kent dat ick die Heere ben die bermherticheyt doe, ende recht, ende rechtuerdicheyt op die eerde, want dese dinghen behaghen mi, seyt die Heere.

+ G

25

Siet die daghen sullen comen, seyt die Heere, ende ic sal versoec doen op alle die gene die een ombesneden voorhuyt heeft.

26

Op Egipten, ende op Iudam, ende op Edom, ende op die kinderen van Ammon, ende Moab, ende op alle die ghescoren hair hebben woonende in die wildernisse, want alle Heydenen zijn ombesneden, maer alle tgheheel huys van Israel zijn ombesneden van herten.