Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *596]

Dat .viij. Capittel.

1

⁺IN dien tijde seyt die Heere sullen si wtworpen die ghebeenten des conincs van Iuda, ende die ghebeenten van sijnen princen, ende die ghebeenten der priesteren, ende die ghebeenten der propheten, ende die ghebeenten der gheender die in Ierusalem ghewoont hebben wt haren grauen.

+ A

2

Ende sij sullen die wtspreyden ter sonnen ende ter manen, ende tot alle dat heyr des hemels welc sij bemint hebben, ende den welcken sij ghedient hebben, ende nae die welcke si ghewandelt hebben, ende die si ghesocht hebben, ende aenghebeden, si en sullen niet verghadert worden, ende si en sullen niet begrauen worden, tot eenen mesthoop sullen si op daenschijn der eerden sijn.

3

⁺Ende si sullen die doot meer dan dleuen verkiesen alle die ouerghebleuen sullen zijn van dit alder quaetste gheslachte, in alle die plaetsen die verlaten sijn, tot die welcke ickse wtgedreuen hebbe, seyt die Heere der heyrscaren.

+ B

4

Ende ghy sult tot hen segghen. Dit seyt die Heere. En sal hy die valt niet opstaen? ende die affghekeert is, en sal hy niet wederkeeren?

5

waerom is dan dit volck in Iherusalem affghekeert met een crijghele affkeeringe. Sij hebben die loghene aenghenomen, ende si en hebben niet willen weder keeren.

6

⁺Ic heb toeghehoort ende gheluystert, niemant en spreecter dat goet is, daer en is niemant die penitencie doe van sijn boosheyt seggende. Wat heb ic ghedaen? Sij sijn alle ghekeert tot haren loop, als een peert met eenen ghedruyssche gaende ten strijde.

+ C

7

Die kiekendief heeft inden hemel sijnen tijt ghekent, die tortelduyue, ende die swalue, ende den oyuaer hebben de tijt van hen aencomen bewaert, maer mijn volck en heeft des Heeren ordeel niet ghekent.

8

Hoe segt ghi wij sijn wijs, ende des Heeren wet is bi ons? voorwaer die loghenachtighe greffie des scrijuers heeft een loghene ghewracht.

9

⁺Die wijse zijn bescaemt, si sijn veruaert ende gheuanghen, want des Heeren woort hebben si verworpen, ende daer en is gheen wijsheyt in hen lieden.

+ D

10

Daerom sal ick hen vrouwen gheuen den vreemdelinghen, hen ackeren den erffghenamen, want vanden minsten totten meesten volghen si alle die ghiericheyt, vanden propheet totten priester maken si alle logentalen.

11

Ende sij ghenasen die quetsinghe van die dochter mijns volcs ter scanden segghende. Vrede, vrede alst gheenen vrede en was.

12

Sij sijn beschaemt, want sij hebben affgrijselijcheyt ghedaen, Iae dat meer is si en sijn niet bescaemt met bescaemthede, ende si en hebben hen niet connen scamen. ⁺Daerom sullen sij vallen onder die ghene die tsamen vallen sullen, inden tijt der versoeckinghen sullen si tsamen vallen, seyt die Heere.

+ E

13

Ick salse vergaderende vergaderen seyt die Heere. Daer en is gheenen druyf aen die wijnstruycken, daer en zijn gheen vijghen inden vijchboom, dat loof is affgheuallen, ende ick heb hen ghegheuen datter ouerghegaen is.

14

Waerom sitten wij? coemt te samen, ende laet ons in een vaste stadt gaen, ende laet ons daer stille zijn, want die Heere onse God heeft ons doen swijgen, ende hy heeft ons te drincken ghegheuen water van galle, want wi hebben den Heere gesondicht.

15

⁺Wij hebben den vrede ghewacht, ende daer en was gheen goet, den tijt der ghenesinghen, ende siet tis anxt.

+ F

16

Van Dan is het snorcken van sijnen peerden ghehoort, van die stemme des crijsschens van sijnen strijders is gheheel aertrijck beroert gheweest, ende si zijn ghecomen ende hebben dlant verslint, ende zijn volheyt, die stadt ende haer bewoonders,

17

Want siet ic sal tot v lieden senden basiliscus serpenten, waer teghen gheen betooueringhe en is, ende die sullen v bijten, seyt die Heere,

18

mijnen rouwe is bouen rouwe, mijn herte is in my truerich.

19

Siet die stemme van die dochter mijns volcks van een verre lant. ⁺En is die Heere in Sion niet, oft en is haer coninck in haer niet? waerom hebben si my dan tot gramscappe verwect, in hen ghesneden beelden, ende in die vreemde ydelheden?

+ G

20

Den oochst is voorby ghegaen, den somer is voleynt ende wij en sijn niet verlost,

21

op die verderffenisse der dochter mijns volcs ben ick rouwich gheweest ende bedroeft, verbaestheyt heeft my beuanghen,

22

En isser gheen gomme in Galaad? of en is daer gheen medecijn? waerom en is dan het litteeken van mijns volcs dochter niet toe gheheylt?